గ్రామీణ చెరువుకు రూ.30 లక్షలతో అభివృద్ధి
పూడిక తీయడంతో భారీగా పెరిగిన జలాలు
యాసంగిలోనూ పంటలకు సాగు నీరు
సిర్గాపూర్, మే8: ప్రభుత్వం ప్రవేశపెట్టిన మిషన్ కాకతీయ పథకంతో చెరువులు, కుంటలు బాగానే అభివృద్ధి చెందాయి. మిషన్ కాకతీయ పథకం పుణ్యమా అని ఇంత మండు టెండల్లో కూడా చెరువుల్లో జలాలు ఉన్నాయి. చెరువు కింద ఉన్న ఆయకట్టుకు వానకాలమే కాకుండా యాసంగిలోనూ పంటలకు సాగు నీరందుతున్నది. దీంతో ఆయకట్టు రైతులు ఆనందం వ్యక్తం చేస్తున్నారు. ఇది మండల కేంద్రమైన సిర్గాపూర్లోని సాకీ చెరువు అభివృద్ధిని చూస్తే కళ్లకు అద్దం పట్టినట్లుగా కనిపిస్తుంది. ప్రస్తుతం ఈ చెరువులో నీళ్ల పుష్కలంగా ఉన్నాయి.
సాకీ చెరువుకు జలకళ
ఎన్నో ఏండ్ల కిందట నిర్మించిన సాకీ చెరువుకు గతంలో పాలకులు ఎలాంటి శాశ్వత అభివృద్ధి పనులు చేపట్టలేదు. ఏదో మొక్కుబడిగా పనులను గుత్తేదార్లు చేసి చేతులు దులుపుకొన్న పరిస్థితులు. టీఆర్ఎస్ సర్కారు వచ్చాక మిషన్ కాకతీయ పథకాన్ని సీఎం కేసీఆర్ ప్రతిష్టాత్మకంగా రూపొందించి, అమలు చేయడంతో చెరువుల అభివృద్ధికి ఈ పథకం జీవం పోసినట్టయ్యింది. ఇందులో భాగంగా సాకీ చెరువుకు మిషన్ కాకతీయ పథకంలో దాదాపు రూ.30 లక్షల నిధులు వెచ్చించి అభివృద్ధి పనులు చేపట్టారు. సాకీ చెరువు నిర్మించినప్పటి నుంచి ఎన్నడూ తీయలేనంత పూడిక మట్టిని తీశారు. మిషన్ కాకతీయ అభివృద్ధిలో అన్ని పనులు పూర్తిచేశారు. పంట కాల్వల నిర్మాణం, తూముకు, అలుగుకు మరమ్మతులు, సాగు నీటి కాల్వలో పూడిక, బండ్పై మొరం వేయుట తదితర పనులు చేపట్టారు. ఈ చెరువు కింద మొత్తం 60 ఎకరాల ఆయకట్టు ఉంది. ఈ యాసంగిలో దాదాపు 25 ఎకరాల వరకు వరి పంటకు ఈ చెరువు ద్వారా నీరందుతున్నది. రెండేండ్లుగా సాకీ చెరువులో ఎండకాలం సైతం సరిపడా నీళ్లు ఉంటున్నాయని స్థానికులు ఆనందం వ్యక్తం చేస్తున్నారు.
గతంలో ఎవరూ పట్టించుకోలేదు
గత ప్రభుత్వాలు చెరువులు కుంటల అభివృద్ధిని ఏ మాత్రం పట్టించుకోలేదు. గ్రామీణ ప్రాంత చెరువులు, కుంటల అభివృద్ధి కోసం లక్షల కొలది నిధులు మంజూరు చేసి అభివృద్ధి చేపట్టిన దాఖలాలు ఎక్కడ లేవు. అసలు ఇక్కడి రైతులు సాగు నీరందించాలని రైతుల సంక్షేమ పట్టించుకోవాలనే పాపాన పాలకులు పోలేదు. తెలంగాణ ప్రభుత్వం వచ్చాక చెరువులు, కుంటలు బలోపేతమై అభివృద్ది చెందాయి. అందులో భాగంగానే సిర్గాపూర్లోని సాకీ చెరువు అభివృద్ధి చెంది ప్రస్తుతం జలాలు సమృద్ధిగా ఉన్నాయి. – అబ్దుల్ గపూర్, రైతు సిర్గాపూర్
మిషన్ కాకతీయ చెరువులకు వరం
ఏండ్ల తరబడి చెరువుల్లో పేరుకుపోయిన మట్టితో వేసవిలో చుక్క నీరు ఉండేది కాదు. మిషన్ కాకతీయ పథకం వచ్చాక చెరువులకు జీవం పోసింది. సిర్గాపూర్ సాకీ చెరువులో సమృద్ధిగా నీరు ఉండడంతో పక్కనే ఉన్న తమ లొం క తండా శివారులో బోర్లలో నీళ్లు పుష్కలంగా ఉంటున్నా యి. ఈ చెరువు తో సాగు నీరు తమకు అవకాశం లేకపోయినా, ఈ చెరువులో నీళ్లు ఉంటే చాలు.. తమ చేలల్లో బోర్లు గ్యాప్ లేకుండా నడుస్తాయి. ప్రస్తుత యాసంగిలో చెరుకు, జొన్న తదితర పంటలు సాగులో ఉన్నాయి.
– శాంతాబాయి, రైతు లొంకతండా, సిర్గాపూర్