సిద్దిపేట అర్బన్, జూన్ 27: పంట సాగుకు చేసే ముందే రైతుభరోసా కింద పంట పెట్టుబడి సాయం అందించాలని సిద్దిపేట జిల్లా పరిషత్ సర్వసభ్య సమావేశం ఏకగ్రీవంగా తీర్మానించినట్లు జడ్పీ చైర్పర్సన్ వేలేటి రోజా రాధాకృష్ణశర్మ తెలిపారు. గురువారం జిల్లా కేంద్రంలోని రెడ్డి సంక్షేమ భవన్లో జడ్పీ చైర్పర్సన్ వేలేటి రోజాశర్మ అధ్యక్షతన జిల్లా పరిషత్ సర్వసభ్య సమావేశం జరిగింది. ఈ మేరకు పలు శాఖల అధికారులు తమ పురోగతిని సభ్యులకు వివరించారు. ముందుగా వ్యవసాయం, విద్యాశాఖ, గ్రామీణాభివృద్ధి శాఖ, అటవీశాఖ, స్త్రీ శిశు సంక్షేమ శాఖ, విద్యుత్ శాఖ, పంచాయితీరాజ్, ఇంజినీరింగ్ శాఖల అధికారులు పురోగతిని వివరించారు. రైతుభరోసా కింద పెట్టుబడి సాయం రైతులకు పంట సాగుకు ముందే వేయాలని సభ్యులు ఏకగ్రీవంగా తీర్మానించారు. గత సీజన్లో పంట చివరి వరకు కూడా రైతుభరోసా పూర్తిగా రాలేదని.. ఈ సీజన్కు కూడా పంట సాగు ప్రారంభమైనా ఇంకా రైతుభరోసా వేయడం లేదని సభ్యులు అధికారులను ప్రశ్నించారు. అంతే కాకుండా సఫాయి కార్మికుల జీతాలు సకాలంలో చెల్లించాలని జిల్లా పరిషత్ సర్వసభ్య సమావేశం ఏకగ్రీవంగా తీర్మానించింది. జడ్పీ చైర్పర్సన్ రోజాశర్మ మాట్లాడుతూ.. రైతును రాజు చేయడమే లక్ష్యంగా బీఆర్ఎస్ ప్రభుత్వం రైతుబంధు పథకాన్ని ప్రారంభించిందన్నారు. రైతులు విత్తనాలు, ఎరువులు కొనుగోలు చేసేందుకు పంట పెట్టుబడి సాయాన్ని పంట సాగుకంటే ముందే వేయాలని డిమాండ్ చేశారు. నాణ్యమైన విద్యను అందించడమే లక్ష్యంగా సీఎం కేసీఆర్ ‘మనఊరు మన బడి’ పథకాన్ని ప్రారంభించి, అన్ని సదుపాయాలు కల్పించారన్నారు. సిద్దిపేట పట్టణంలోని కొన్ని పాఠశాలల్లో ప్రతి సంవత్సరం నో అడ్మిషన్ బోర్డులు కనిపిస్తున్నాయన్నారు. తెలంగాణ రాష్ర్టాన్ని సాధించిన వ్యక్తి కేసీఆర్ అని..పాఠ్య పుస్తకాల మీద తెలంగాణ తొలి ముఖ్యమంత్రి కేసీఆర్ పేరును ఉంచితే బాగుండేదని ఆమె అభిప్రాయం వ్యక్తం చేశారు.
రైతులకు ఇవ్వాల్సిన పంట పెట్టుబడి సాయం సాగుకు ముందు వేస్తారా.. పంట కోతకు వచ్చిన తర్వాత వేస్తారా.. అని అధికారులను మాజీమంత్రి హరీశ్రావు ప్రశ్నించారు. జిల్లాలో జీలుగ, జనుము విత్తనాలు కొరత ఎందుకు ఏర్పడిందని అడిగారు. సిద్దిపేట జిల్లా పదోతరగతి ఫలితాల్లో రెండో స్థానంలో నిలిచినందుకు అధికారులను, ఉపాధ్యాయులను అభినందించారు. వరుసగా ఆరోసారి జిల్లా ప్రథమ, ద్వితీయ స్థానంలో నిలిచిందన్నారు. మధ్యాహ్న భోజన కార్మికులకు ఏడు నెలల నుంచి జీతాలు ఎందుకు రావడం లేదని, వెంటనే జీతాలు వేసేలా చర్యలు తీసుకోవాలని అధికారులను ఆదేశించారు. చివరిదశలో ఉన్న మనఊరు మనబడి పనులకు పూర్తి చేయాలన్నారు. ఈజీఎస్ కింద చేపట్టిన సీసీ రోడ్డు పనులకు సంబంధించిన బిల్లులు వెంటనే చెల్లించే విధంగా చొరవ చూపాలని కలెక్టర్ను కోరారు. ఇంట్లో ఇద్దరికి పెన్షన్ ఇస్తామని చెప్పి.. ఇప్పుడు వచ్చే పెన్షన్ను సకాలంలో ఇవ్వకపోవడంతోపాటు రెండు నెలల పెన్షన్ ఇవ్వలేదని మండిపడ్డారు. కాంగ్రెస్ ప్రభుత్వం వచ్చినప్పటి నుంచి ఇప్పటివరకు గ్రామ పంచాయితీలకు ఒక్క రుపాయి నిధులైన ఇచ్చారా అని అడిగారు. బీఆర్ఎస్ ప్రభుత్వం సకాలంలో నిధులు ఇవ్వడం వల్ల గ్రామ పంచాయితీ ట్రాక్టర్ల ఇన్స్టాల్మెంట్ చెల్లించారని గుర్తు చేశారు. సఖి సెంటర్ ఉద్యోగులకు ఏడునెలల నుంచి జీతాలు రావట్లేదని అడిగారు. ఒకటో తారీఖునే జీతాలు అని గొప్పలు చెప్పే ప్రభుత్వం ఏం సమాధానం చెబుతారన్నారు. గృహజ్యోతి పథకాన్ని అర్హులైన అందరికీ వర్తింపజేయాలన్నారు. అసెంబ్లీలో సీఎం రేవంత్రెడ్డి సిద్దిపేట ప్రజలు బిల్లులు చెల్లించలేదని బదనాం చేశారని..రాష్ట్ర ప్రభుత్వ కార్యాలయాలు బిల్లులు చెల్లించకపోతే ఎందుకు ప్రజలకు ఆపాదించారని ఆగ్రహం వ్యక్తం చేశారు. ఫ్రొటోకాల్ లేని వ్యక్తి పనులను ప్రారంభిస్తే ఎంబీ రికార్డు ఎలా చేస్తారని అధికారులను ప్రశ్నించారు.
కేసీఆర్, మాజీమంత్రి హరీశ్రావు కృషితో నూతనంగా ఏర్పడిన సిద్దిపేట జిల్లాకు మొదటి జడ్పీ చైర్పర్సన్గా ఎన్నిక కావడం తన పూర్వ జన్మ సుకృతమని జడ్పీ చైర్ పర్సన్ రోజాశర్మ అన్నారు. ఈ స్థాయిలో ఉండేందుకు తన కుటుంబసభ్యులు ఎంతో సహకరించారని, కొత్త జిల్లాలు ఏర్పడిన తర్వాత ఇంతటి అరుదైన అవకాశం కల్పించిన కేసీఆర్కు ధన్యవాదాలు తెలిపారు. అభివృద్ధి అనేది నిరంతర ప్రక్రియ అని.. సిద్దిపేట జిల్లాను అభివృద్ధిలో ముందుండేందుకు ఎల్లవేళలా కలిసికట్టుగా పని చేశామన్నారు. ఇందుకు సహకరించిన ప్రజాప్రతినిధులందరికీ కృతజ్ఞతలు తెలిపారు.
పంట రుణమాఫీ చేసేందుకు క్యాబినెట్ నిర్ణయం తీసుకుందని రవాణా, బీసీ సంక్షేమ శాఖ మంత్రి పొన్నం ప్రభాకర్ అన్నారు. ప్రజాప్రతినిధులుగా ఐదేండ్లు పూర్తి చేసుకున్న ఎంపీపీ, జడ్పీటీసీలకు శుభాకాంక్షలు తెలిపారు. భవిష్యత్లో మరింత ఉన్నతస్థాయిలో ఎదగాలన్నారు. పదవి ఉన్నా.. లేకున్నా., ప్రజా సమస్యలు పరిష్కరించడంలో ముందుండాలని సూచించారు. జిల్లా మంత్రిగా సిద్దిపేట అభివృద్ధికి తనవంతు కృషి చేస్తానన్నారు. రాబోయే రోజుల్లో ఆరు గ్యారెంటీల అమలుతోపాటు ఇతర ప్రభుత్వ పథకాల అమలులో ఎటువంటి సమస్య ఉన్నా తన దృష్టికి తీసుకు రావాలన్నారు. రూ.1100కోట్లతో అమ్మ ఆదర్శ పాఠశాలల ద్వారా ఆయా గ్రామాల్లోని పాఠశాలల్లో పనులు జరుగుతన్నాయని తెలిపారు. అనంతరం జడ్పీ చైర్పర్సన్ రోజాశర్మ మాట్లాడుతూ.. ఐదేండ్లుగా జిల్లా అభివృద్ధి కోసం ఎంతో కృషి చేశామని, ఇందుకు సహకరించిన ప్రతి ఒక్క ప్రజాప్రతినిధికి ధన్యవాదాలు తెలిపారు.
సిద్దిపేట జిల్లా కేంద్రంలోని రెడ్డి సంక్షేమ భవన్లో జరిగిన జిల్లా పరిషత్ సర్వసభ్య సమావేశానికి అధికారులు రాకపోవడంపై మాజీమంత్రి హరీశ్రావు అసహనం వ్యక్తం చేశారు. సర్వసభ్య సమావేశం ఉదయం 10.30 గంటలకు ప్రారంభంకావడంతో 11 గంటల వరకు కూడా అధికారులు రాకపోవడంతో హరీశ్రావు ఎందుకు రాలేదని అడిగారు. పేరుపేరునా అధికారి సమావేశానికి వచ్చారా.. లేదా అని అడిగి తెలుసుకున్నారు. అధికారుల అలసత్వంపై కలెక్టర్ మనుచౌదరికి హరీశ్రావు ఫిర్యాదు చేశారు.
ఏ సంబంధం లేని వ్యక్తులు కొబ్బరికాయలు పట్టుకొని శంకుస్థాపనలు చేస్తున్నారని, ఇదెక్కడి సంస్కృతి అని జనగామ ఎమ్మెల్యే పల్లా రాజేశ్వర్రెడ్డి ఆగ్ర హం వ్యక్తం చేశారు. పార్టీలకతీతంగా ప్రజాప్రతినిధులను గౌరవించాలని, ఫ్రొటోకాల్ విషయంలో అధికారులు అత్యుత్సాహం ప్రదర్శించకూడదన్నా రు. ప్రొటోకాల్ పాటించకుండా ప్రారంభించన పనులకు ఎంబీ రికార్డు చేయవద్దని ఎమ్మెల్యే అధికారులకు తెలిపారు. చేర్యాల, కొమురవెళ్లి, ధూల్మిట్ట, మద్దూర్ మండలాల్లో పెండింగ్లో ఉన్న రోడ్లు, ఇతర పనులను పూర్తి చేయాలని అధికారులను ఆదేశించారు.
బీఆర్ఎస్ ప్రభుత్వం ప్రతిష్టాత్మకంగా హరితహారం మొక్కలు నాటి పెంచితే వాటిని విద్యుత్ శాఖ అధికారులు ఇష్టారీతిన నరికివేస్తున్నారని, ఇది మంచి పద్ధతి కాదని దుబ్బాక ఎమ్మెల్యే కొత్త ప్రభాకర్రెడ్డి అన్నారు. మళ్లీ ఇలాంటివి పునరావృతం కాకుండా జాగ్రత్తలు తీసుకోవాలని సూచించారు. దుబ్బాక నియోజకవర్గంలో రోడ్ల పరిస్థితి అధ్వానంగా ఉందని, అధికారులు వాటిని పరిశీలించి తగు చర్యలు తీసుకోవాలన్నారు. సిద్దిపేట జిల్లాకు ఇన్చార్జి మంత్రి ఉన్నారా.. లేరా.. ఉంటే సర్వసభ్య సమావేశానికి ఎందుకు రాలేదని ప్రభాకర్రెడ్డి ప్రశ్నించారు.
సిద్దిపేట జిల్లా పరిషత్ సర్వసభ్య సమావేశం చివరిది కావడంతో జిల్లాలోని జడ్పీటీసీలు, ఎంపీపీలను సన్మానించారు. ఈ మేరకు రవాణా, బీసీ సంక్షేమ శాఖ మంత్రి పొన్నం ప్రభాకర్, మాజీమంత్రి హరీశ్రావు, ఎమ్మెల్యేలు ప్రభాకర్రెడ్డి, రాజేశ్వర్రెడ్డి జడ్పీ చైర్పర్సన్ రోజా రాధాకృష్ణశర్మతోపాటు జడ్పీటీసీలు, ఎంపీపీలను శాలువా, మెమోంటోతో సత్కరించారు. అంతకుముందు జడ్పీటీసీలు, ఎంపీపీలు ఐదేండ్లలో తమకు కలిగిన అనుభవాలను గుర్తు చేసుకున్నారు. సమావేశంలో కలెక్టర్ మను చౌదరి, ఎమ్మెల్సీలు దేశపతి శ్రీనివాస్, యాదవరెడ్డి, రఘోత్తంరెడ్డి, అదనపు కలెక్టర్ గరిమా అగర్వాల్ పాల్గొన్నారు.