పటాన్చెరు/రామచందాప్రురం,జూలై 17 : పటాన్చెరు ఎమ్మెల్యే పార్టీ నుంచి పోయినంత మాత్రాన బీఆర్ఎస్ క్యాడర్ గుండె ధైర్యం కోల్పోవాల్సిన పనిలేదని, తాము అన్నింటికి అండగా ఉంటామని మాజీ మంత్రి, సిద్దిపేట ఎమ్మెల్యే తన్నీరు హరీశ్రావు అన్నారు. సంగారెడ్డి జిల్లా రామచంద్రాపురం పట్టణ పరిధిలో కార్పొరేటర్ సింధూ ఆదర్శ్రెడ్డి నివాసంలో బీఆర్ఎస్ నాయకులను కలిసి ఆత్మైస్థెర్యం చెప్పేందుకు బుధవారం హరీశ్రావు వచ్చారు. హరీశ్రావు రాక సమాచారం తెలియడంతో బీఆర్ఎస్ నాయకులు, కార్యకర్తలు, అభిమానులు పెద్ద ఎత్తున సింధూ ఆదర్శ్రెడ్డి ఇంటికి చేరుకున్నారు. ఈ సందర్భంగా బీఆర్ఎస్ జిందాబాద్, కేసీఆర్ జిందాబాద్ నినాదాలతో ఆ ప్రాంతం దద్దరిల్లింది.
మాజీ స్పీకర్ మధుసూదనచారి, దుబ్బాక ఎమ్మెల్యే కొత్త ప్రభాకర్రెడ్డితో కలిసి హరీశ్రావు విలేకరులతో మాట్లాడుతూ.. బీఆర్ఎస్ పార్టీకి పూర్వవైభవం రావడం ఖాయమన్నారు. కార్యకర్తలకు ధైర్యం చెబుదామని తాను వచ్చానన్నారు. కానీ, వారే తనకు ధైర్యం చెబుతున్నారని అన్నారు. కొందరు ముఖ్యనాయకులకు కలిసేందుకు రామచంద్రాపురం వచ్చానని , తాను వస్తున్న వార్తతో పార్టీ శ్రేణులు మేమున్నామని కదలి వచ్చారని తెలిపారు. బీఆర్ఎస్ పార్టీ ఎక్కడో లేదని, అది ప్రజలు, కార్యకర్తల హృదయాల్లో పదిలంగా ఉందన్నారు. కార్యకర్తలే బీఆర్ఎస్కు బలం, బలగం అన్నారు. మీరందరూ కష్టపడితేనే గూడెం మహిపాల్రెడ్డి ఎమ్మెల్యేగా గెలిచాడని, మూడుసార్లు ఆయన్ను ఎమ్మెల్యేగా చేసింది బీఆర్ఎస్ అన్నారు.
వైసీపీ టికెట్ ఇవ్వని పక్షంలో బీఆర్ఎస్ పార్టీ తల్లిలా దగ్గరకు తీసుకుని టికెట్ ఇచ్చి ఆయన్ను గెలిపించుకుందని గుర్తుచేశారు. పటాన్చెరుకు ఎలాంటి నిధులు కావాలని కోరినా ప్రాధాన్యత ఇచ్చి కేటాయించినట్లు గుర్తుచేశారు. నాడు సీఎం కేసీఆర్ చొరవ తీసుకుని పటాన్చెరు పారిశ్రామికవాడను అభివృద్ధికి మారుపేరుగా తీర్చిదిద్దారన్నారు. ఇంత చేసినా మహిపాల్రెడ్డి పార్టీ మారడం న్యాయమా..? నీకిది తగునా అని హరీశ్రావు ప్రశ్నించారు. ఎమ్మెల్యే పోతే పార్టీ పోదన్నారు. పటాన్చెరులో మంచి కార్యకర్తలు ఉన్నారని, ఇక్కడ మళ్లీ ఎగిరేది గులాబీ జెండానే అని హరీశ్రావు ధీమా వ్యక్తం చేశారు.
పటాన్చెరు బీఆర్ఎస్ పార్టీకి కంచుకోట అని హరీశ్రావు అన్నారు. బీఆర్ఎస్ను దెబ్బతీయాలన్న వారే కాలగర్భంలో కలిసినట్లు గుర్తుచేశారు. కష్టాలు వస్తాయి, పోతాయని, మీరంతా ధైర్యంగా ఉండాలని క్యాడర్ను కోరారు. మీ బాధ్యత తాను తీసుకుంటానని, మిమ్మల్ని పువ్వుల్లో పెట్టి చూసుకుంటానని క్యాడర్కు హామీ ఇచ్చారు. పార్టీని పూర్తిస్థాయిలో ప్రక్షాళన చేసుకుందామన్నారు. మళ్లీ పారిశ్రామికవాడలో గులాబీ జెండాను ఎగురవేసే వరకు కష్టపడి పనిచేద్దామన్నారు.
ఇప్పుడు రాష్ట్రంలో జరుగుతున్నదంతా ప్రజలు చూస్తున్నారన్నారు. కేసీఆర్ పాలనను, రేవంత్రెడ్డి పాలనను పోల్చుకుంటున్నారన్నారు. పార్టీ మారితే రాళ్లతో కొట్టండి అన్న రేవంత్రెడ్డి ఇప్పుడు ఎమ్మెల్యేల ఇండ్లకు వెళ్లి కండువాలు కప్పుతున్నాడని ఎద్దేవా చేశారు. ఉచిత బస్సు ప్రయాణం తప్పా ఏ ఒక్క హామీ అమలు కావడం లేదన్నారు. పటాన్చెరులో బీఆర్ఎస్కు మంచి నాయకులు ఉన్నారని, వారి నేతృత్వంలో పార్టీ మరింత బలోపేతం కావడం ఖాయమన్నారు. త్వరలో పటాన్చెరులో బీఆర్ఎస్ శ్రేణులతో సమీక్షా సమావేశం నిర్వహిస్తానని హరీశ్రావు తెలిపారు.