రామాయంపేట, జూన్ 25: అర్హులైన రైతులందరికీ ప్రభుత్వం ఆర్థిక భరోసా కల్పిస్తుందని వీడియో కాన్ఫరెన్స్లో వ్యవసాయ శాఖ మంత్రి తుమ్మల నాగేశ్వర్రావు రైతులతో అన్నారు. మంగళవారం రామాయంపేట పట్టణంలోని రైతువేదికలో నిర్వహించిన రైతుకు ఆర్థిక భరోసాపై రైతులకు మంత్రి పలు సూచనలు సలహాలిచ్చారు. రాష్ట్రంలో ఉన్న ప్రతిరైతుకూ ప్రభుత్వ సాయం అందాలన్నదే సీఎం రేవంత్రెడ్డి ఉద్దేశమన్నారు. రాష్ట్ర వ్యాప్తంగా మంత్రి రైతులతో మాట్లాడి అర్హులైన వ్యవసాయ చేసే రైతులకే రైతు భరోసా అందేవిధంగా ప్రభుత్వం విధివిధానాలను రూపొందిస్తున్నట్లు తెలిపారు. ప్రభుత్వం అందిస్తున్న భరోసాను రైతుకందించడమే ప్రభుత్వ లక్ష్యమని తెలిపారు. రైతులకు ప్రభుత్వం ద్వారా చేయూతనందిస్తే ఎక్కువమంది రైతులు లబ్ధి పొందుతారని తెలిపారు. గుట్టలు, రోడ్లు వ్యవసాయానికి పనికిరాకుండా ఉన్న భూములపై రైతు భరోసా వర్తించదన్నారు. అలాంటి రైతులకు రైతు భరోసా రాదని మంత్రి తెలిపారు.
అధికారుల సూచన మేరకు రైతులు పొలాల్లో వానకాలం పంటలు వేసుకోవాలని రామాయంపేట డివిజన్ సహాయ సంచాలకురాలు వసంత సుగుణ పేర్కొన్నారు. మంగళవారం పట్టణంలోని రైతువేదికలో నిర్వహించిన వీడియోకాన్ఫరెన్సుకు హాజరై రైతులకు పలు సూచనలు చేశారు. ప్రతి రైతు వ్యవసాయ శాఖ సలహా మేరకు పంటలను విత్తుకోవాలన్నారు. భూమిలో ఎలాంటి పంట పండుతుంది అనే విషయాన్ని భూపరీక్షలు నిర్వహించుకుని దానికనుగుణంగా పంటలు వేసుకుంటే అధిక దిగుబడులు వస్తాయన్నారు. వీడియో కాన్ఫరెన్సులో డివిజన్ వ్యవసాయ శాఖ అధికారులు రాజ్నారాయణ, సతీశ్, హరిప్రసాద్ ఉన్నారు.