మెదక్ మున్సిపాలిటీ, డిసెంబర్ 10: దేశంలో క్రీడలను ప్రోత్సహిస్తూ వాటిని అభివృద్ధి పర్చడంపై కేంద్ర ప్రభుత్వం ప్రత్యేక దృష్టి సారించింది. భార త క్రీడా సంస్థ (సాయ్) ‘ఖేలో ఇండియా’ ప్రాజెక్టును దేశ వ్యాప్తంగా విడతల వారీగా అకాడమీ ప్రారంభిస్తున్నది. ఇందులో భాగంగా మెదక్ను కలుపుకొని రాష్ట్రంలోని 17 జిల్లాల్లో సైక్లింగ్, హాకీ, ఫుట్బాల్, బ్యాట్మింటన్, అథ్లెటిక్స్, జూడో, బాక్సింగ్, ఖోఖో, కబడ్డీ కేంద్రాలను ఏర్పాటు చేస్తూ డిసెంబర్ 6న ఉత్తర్వులు జారీ చేసింది. ఇందులో మెదక్ జిల్లాకు సైక్లింగ్ దక్కింది. జిల్లాలోని రామాయంపేటలో ఈ కేంద్రాన్ని ఏర్పాటు చేయనున్నారు.
పర్యవేక్షణ బాధ్యతలు..
రామాయంపేటలో ఏర్పాటు చేస్తున్న సైక్లింగ్ అకాడమీని జిల్లా క్రీడా ప్రాధికారిక సంస్థ, రాష్ట్ర క్రీడా ప్రాధికారిక సంస్థ (శాట్స్)లకు పర్యవేక్షించే బాధ్యతలను అప్పగించింది. క్రీడాకారులను జాతీయ, అంతర్జాతీయ స్థాయి పోటీల్లో ప్రాతినిథ్యం వహించిన క్రీడాకారులను శిక్షకులుగా నియమించి ఉపాధి నిధులను కేంద్ర ప్రభుత్వమే విడుదల చేస్తున్నది. సంవత్సరానికి రూ.5 లక్షలు కేంద్రానికి కేటాయిస్తుంది. ఇందులో శిక్షకుడికి సంవత్సరానికి రూ.3 లక్షలు, కేంద్రం నిర్వహణ, వసతుల కల్పనకు రూ.2 లక్షల నిధులు విడుదల కానున్నాయి. జిల్లాకు శిక్షణ నిమిత్తం 30 మందికి ప్రవేశాలు కల్పించనున్నారు.
జిల్లాకు అకాడమీ రావడం ఆనందంగా ఉంది
మెదక్ జిల్లాకు సైక్లింగ్ అకాడమీ రావడం ఆనందంగా ఉంది. ఇది యువ సైక్లిస్టులకు మంచి అవకాశం. జాతీయ సైక్లింగ్ పోటీల్లో 4 సార్లు పాల్గొన్నాను. రాష్ట్రస్థాయిలో సైతం అనేక పోటీల్లో పాల్గొని 4 బంగారు పతకాలు సాధించా. 2011లో మహారాష్ట్రలోని పూణెలో జరిగిన జాతీయస్థాయి పోటీల్లో 5వ స్థానంలో నిలిచాను. 2009లో పండిచ్చేరి, 2011లో బీహార్, 2016లో పూణెలో నిర్వహించిన జాతీయస్థాయి పోటీల్లో పాల్గొన్నా.
– సైక్లిస్,్ట యాదగిరి
మార్గదర్శకాలు రావాలి..
జిల్లాకు ఖేలో ఇండియాలో భాగంగా మెదక్ ఎమ్మెల్యే పద్మాదేవేందర్రెడ్డి సహకారంతో సైక్లింగ్ అకాడమీ దక్కింది. ఈమేరకు సాయ్ ఉత్తర్వులు జారీ చేసింది. ఈ కేంద్రాన్ని రామాయంపేటలో ఏర్పాటు చేయనున్నాం. త్వరలోనే మార్గదర్శకాలు రానున్నాయి.
– నాగరాజు, జిల్లా యువజన, క్రీడల అధికారి