మద్దూరు(ధూళిమిట్ట), జూలై 11: వరి నాట్లకు కూలీల కొరత ఏర్పడుతుండడంతో రైతులు వలస కూలీల మీద ఆధారపడుతున్నారు. వరినాట్లు వేసేందుకు మూడు, నాలుగేండ్లుగా బీహార్, ఆంధ్రప్రదేశ్, పశ్చిమబెంగాల్, మధ్యప్రదేశ్ రాష్ర్టాలతో పాటు తెలంగాణలోని సూర్యాపేట, ఖమ్మం తదితర జిల్లాల నుంచి కూలీలు నాట్లు వేసేందుకు వస్తున్నారు. గురువారం సిద్దిపేట జిల్లా ధూళిమిట్ట మండలం బైరాన్పల్లి గ్రామానికి బీహార్కు చెందిన మగ కూలీలు వందమందికి పైగా వచ్చి నాట్లు వేశారు. ఎకరానికి రూ. 5 వేల నుంచి 6 వేల వరకు తీసుకుంటున్నారు. సాధారణంగా వరినాట్లను ఆడ కూలీలు మాత్రమే వేస్తారు. మగ కూలీలు వరినాట్లు వేస్తుండడంతో గ్రామస్తులు ఆశ్చర్యంగా చూస్తున్నారు.