సంగారెడ్డి, జూలై 12: సంగారెడ్డి జిల్లాలోని శివారు గ్రామాల్లో తాళాలు వేసిన ఇండ్లను ఎంచుకుని రాత్రివేళల్లో నేరాలకు పాల్పడుతున్న అంతర్ జిల్లా దొంగల ముఠాను అరెస్ట్ చేశామని జిల్లా అదనపు ఎస్పీ సంజీవరావ్ వెల్లడించారు. శుక్రవారం ఎస్పీ కార్యాలయంలో దొంగలు దోచుకున్న 43 తులాల బంగారు, 5 కిలోల వెండి ఆభరణాలు, 2 మోటర్ సైకిల్స్ను స్వాధీనం చేసుకున్నామన్నారు. ఇందుకు సంబంధించిన వివరాలను ఆయన విలేకరులకు వెల్లడించారు. సిర్గాపూర్ మండలం చందర్నాయక్ తండాకు చెందిన జాదవ్ జైరామ్, జాదవ్ శంకర్లతోపాటు నారాయణఖేడ్ మండలం హంగీర్గా తాండ చందర్నాయక్ కలిసి చోరీలకు పాల్పడుతూ ప్రజలను భయాందోళనకు గురిచేస్తున్నారన్నారు. వీరు చోరీ చేసిన సొత్తును జాదవ్ మాలిబాయి, రాథోడ్ రాఖలీలు కొనుగోలు చేసేవారిని ఐదుగురిని అరెస్ట్ చేసి రిమాండ్కు తరలించామన్నారు. సంగారెడ్డి, మెదక్, సిద్దిపేట, సిరిసిల్ల తదితర జిల్లాల్లో తాళాలు వేసిన ఇండ్లల్లో చోరీలకు పాల్పడుతున్నారన్నారు.
జల్సాలకు అలవాటు పడి త్వరగా డబ్బు సంపాదించే మార్గంలో చోరీలు చేస్తూ దొరికారన్నారు. జూన్ 2న అర్ధరాత్రి అందోల్ మండలం ఎర్రారంలో ఎనిమిది తాళం వేసిన ఇండ్లు, 8న మాసాన్పల్లిలో తాళలు వేసిన నాలుగు ఇండ్లు, 14న చౌటకూర్లో ఐదు ఇండ్లల్లో తాళాలు పగులగొట్టి చోరీలకు పాల్పడుతూ బంగారు, వెండి ఆభరణాలు, నగదు దోచుకున్నారని చెప్పారు. వీరిపై జోగిపేట, పుల్కల్ పోలీస్స్టేషన్లలో కేసులు నమోదయ్యాయని చెప్పారు. సంగారెడ్డి డీఎస్పీ సత్తయ్య గౌడ్, జోగిపేట ఇన్స్పెక్టర్ అనిల్కుమార్ పర్యవేక్షణలో పుల్కల్, జోగిపేట ఎస్ఐలు శ్రీకాంత్, అనిల్కుమార్ తమ సిబ్బందితో సిర్గాపూర్ మండలం బిబియానాయక్ తండాలో ఉదయం 6 గంటలకు ముఠాను అదుపులోకి తీసుకున్నారని అదనపు ఎస్పీ చెప్పారు. అనంతరం విచారణలో చేసిన నేరాలను ఒప్పుకోవడంతో వారి దగ్గర దొరికిన సొత్తును స్వాధీనం చేసుకున్నామన్నారు.