గజ్వేల్, జూన్ 6: వానకాలం సాగు పనులు మొదలయ్యాయి. వారం రోజులుగా కురుస్తున్న వర్షాలతో రైతులు దుక్కులు దున్నుతూ విత్తనాలు పెడుతున్నారు. ఈ ఏడాది సిద్దిపేట జిల్లాలో 2 లక్షల ఎకరాల్లో పత్తి పెట్టేందుకు రైతులు ఎక్కువగా ఆసక్తిని చూపుతున్నట్లు వ్యవసాధికారులు తెలిపారు. అందుకు తగిన విధంగా విత్తనాలు, ఎరువులు రైతులకు అందుబాటులోకి తీసుకొచ్చారు. చినుకులు కురుస్తుండడంతో రైతులు ఎక్కువగా విత్తనాలు వేసేందుకు సిద్ధమవుతున్నారు. గజ్వేల్ మండలంలోని వివిధ గ్రామాల్లో నల్లరేగడి భూముల్లో రైతులు పత్తి విత్తనాలు పెట్టడం ప్రారంభించారు. గజ్వేల్ మండలంలో ఈ ఏడాది 18,200 ఎకరాల్లో పత్తి, 14వేల ఎకరాల్లోవరి, 15 వందల ఎకరాల్లో మొక్కజొన్న, 120 ఎకరాల్లో కంది సాగు చేయనున్నట్లు అధికారులు అంచనా వేశారు. గతేడాది 15వేల ఎకరాల్లో పత్తి సాగవగా, ఈ ఏడాది మరో మూడు వేల ఎకరాల్లో వేసేందుకు రైతులు ఆసక్తి చూపిస్తున్నారని అధికారులు అంచనా వేశారు. ఇప్పటికే రైతులు పత్తి విత్తనాలు విత్తడంలో నిమగ్నమయ్యారు. ముందుగా వర్షాలు రావడంతో మండల పరిధిలోని శ్రీగిరిపల్లిలో మహిళా కూలీలు పత్తి విత్తనాలు పెడుతూ కన్పించారు.