మెదక్, జూన్ 27 (నమస్తే తెలంగాణ): వ్యవసాయంలో మొక్కల ఎదుగుదలకు అవసరమైన పోషకాలు ఏ స్థాయిలో ఉన్నాయో తెలుసుకునేందుకు భూసార పరీక్షలు కీలకం. పరీక్షల ఫలితాల ఆధారంగానే నేలసారంపై అవగాహన వస్తోంది. దానికి అనుగుణంగా రైతులు పంటలు సాగు చేస్తూ.. తగిన మోతాదులో ఎరువులు వాడితే అధి క దిగుబడులు సాధించేందుకు ఆస్కారం ఉంటుంది. అయితే కొన్నేళ్లుగా మెదక్ జిల్లాలో భూసార పరీక్షలు నిలిచిపోయాయి. వేసవిలో పొలాల నుంచి సేకరించిన మట్టిని పరీక్షించి రైతులకు సలహాలు, సూచనలు అందించాల్సిన వ్యవసాయ శాఖ అధికారులు పట్టించుకోవడం లేదనే ఆరోపణలు వస్తున్నాయి.
గతంలో ప్రభుత్వం సాయిల్ టెస్ట్ ల్యాబ్ల్లో సంబంధిత వ్యవసాయ శాఖ అధికారులతో భూసార పరీక్షలు నిర్వహించే వారు. ఇందుకు అనుగుణంగా పరికరాలు, బడ్జెట్ కేటాయింపు ఉండేది. మెదక్ జిల్లా కేంద్రంలో సైతం సాయిల్ టెస్ట్కు ప్రత్యేక కేంద్రాన్ని ఏర్పాటు చేశారు. అప్పుడు మంజూరు చేసిన కిట్ల గడువు ముగిసిపోవడంతో ప్రస్తుతం అవి పనిచేయడం లేదు. దీంతో మెదక్లోని సాయిల్ టెస్ట్ కేంద్రంలో ఒకటి, రెండు పరీక్షలు చేస్తున్నారు. పెద్ద మొత్తంలో వస్తున్న శాంపిళ్లను సంగారెడ్డి జిల్లా కేంద్రంలోని సాయిల్ టెస్ట్ ల్యాబ్కు పంపిస్తున్నారు. చాలామంది దూరభారం, అవగాహన లేమితో భూసార పరీక్షలకు ముందుకు రావడం లేదు. మెదక్ జిల్లా కేంద్రంలోని సాయిల్ టెస్ట్ కేంద్రంలో ఉన్న వాటర్ ట్యాంకులు, పైపులు విరిగిపోవడంతో అవి పనిచేయడం లేదు. అంతేకాకుండా వ్యవసాయ శాఖ అధికారితోపాటు ల్యాబ్ అసిస్టెంట్, డేటా ఆపరేటర్ పోస్టులు ఖాళీగా ఉన్నాయి. దీంతో భూసార పరీక్షలు చేసే వారు లేక రైతులు ఇబ్బందులు ఎదుర్కొంటున్నారు. ఒకవేళ రైతులు భూసార పరీక్షలు చేసుకోవాలనుకుంటే సంగారెడ్డి జిల్లాకు వెళ్తున్నారు.
వ్యవసాయ శాఖ ప్రతిఏటా భూసార పరీక్షలు నిర్వహించి సీజన్ల వారీగా రైతులు వేసుకోవాల్సిన పంటలపై అవగాహన కల్పించాల్సి ఉంటుంది. ఏడాదిగా మెదక్ జిల్లాలో భూసార పరీక్షల ఊసే లేకపోవడంతో రైతులు ఇష్టారీతిన మందులు వాడుతూ నచ్చిన పంటలు సాగు చేసుకుంటున్నారు. అధికారులు కనీస అవగాహన కార్యక్రమా లు కూడా చేపట్టకపోవడంతో దిగుబడి తగ్గి తీవ్రంగా నష్టపోతున్నారు. పంట మార్పిడితో అవగాహన లేక చాలామంది కేవలం ఒక పంటకే పరిమితమవుతున్నారు. దీంతో నేల సారం కోల్పోయి నిర్జీవంగా మారుతోంది.
మెదక్ జిల్లాలో మొత్తం 3.97 లక్షల ఎకరాల సాగు భూమి ఉన్నట్లు వ్యవసాయ శాఖ అధికారులు చెబుతున్నారు. దాదాపు 2.80 లక్షల మంది రైతులు వివిధ రకాల పంటలు సాగు చేస్తున్నారు. జిల్లాలో నేలలు ఎక్కువగా వరి పంట సాగుకు అనుకూలంగా ఉన్నాయి. ప్రతిఏటా అత్యధిక విస్తీర్ణంలో అంటే సుమారు 3 లక్షల ఎకరాల్లో వరి సాగవుతున్నది. ఆ తర్వాత 30 నుంచి 50వేల ఎకరాల్లో పత్తి, మొక్కజొన్న, కంది, ఇతర పంటలు సాగు చేస్తున్నారు. పూర్తిస్థాయిలో భూసార పరీక్షలు నిర్వహించే విధంగా కాంగ్రెస్ ప్రభుత్వం నిధులు విడుదల చేయాలని రైతులు కోరుతున్నారు.
వానకాలం సీజన్లో 1,607 భూసార పరీక్షలు చేయాలని టార్గెట్. ఆసక్తి ఉన్న రైతులు పంట చేను, పొలం నుంచి మట్టి నమూనాలను క్రమపద్ధతిలో సేకరించి మెదక్ జిలా ్లకేంద్రంలోని సాయిల్ టెస్టింగ్ ల్యాబ్కు తీసుకురావాలి. ఎక్కువగా నమూనాలు రైతుల నుంచి వస్తే సంగారెడ్డి జిల్లా కేంద్రంలోని సాయిల్ టెస్ట్ ల్యాబ్కు పంపిస్తాం.