చిన్నకోడూరు, మార్చి 4: ఎండిపోతున్న పంటలకు సాగునీరు ఇవ్వాలని సిద్దిపేట జిల్లా చిన్నకోడూరు మండలం ఎల్లాయిపల్లి రైతులు రామునిపట్ల రాజీవ్ రహదారిపై సోమవారం నిరసన తెలిపారు. ఈ సందర్భంగా రైతులు మాట్లాడుతూ రంగనాయకసాగర్, అనంతగిరి రిజర్వాయర్ మధ్యలో భూములు ఉన్నప్పటికీ సాగునీరు అందడం లేదన్నారు. నాలుగు వందల మీటర్ల కాల్వ తవ్వితే 500 కుటుంబాలు బాగుపడుతాయని రైతులు ఆవేదన వ్యక్తం చేశారు.
భూ సేకరణ చేపట్టి పంట పొలాలకు సాగునీరు ఇవ్వాలని డిమాండ్ చేశారు. సాగు చేసిన పంటలు ఎండిపోయే పరిస్థితి నెలకొందన్నారు. అధికారులకు ఎన్నిసార్లు మొరపెట్టుకున్నా పట్టించుకోవడం లేదన్నారు. పంటల కోసం పెట్టిన పెట్టుబడులు భారంగా మారాయన్నారు. ఇప్పటికైనా ఉన్నతాధికారులు స్పందించి సమస్యను పరిష్కరించాలన్నారు. రైతుల నిరసనతో రాజీవ్ రహదారిపై భారీగా ట్రాఫిక్ జామైంది. విషయం తెలుసుకున్న చిన్నకోడూరు పోలీసులు రైతులను సముదాయించి నిరసన విరమింపజేశారు. ఈ కార్యక్రమంలో ఆయా గ్రామాల రైతులు పాల్గొన్నారు.