గజ్వేల్, జూన్ 5: సిద్దిపేట జిల్లా వ్యాప్తంగా రైతులు వానకాలం సాగుకు సిద్ధమవుతున్నారు. రోహిణి కార్తె తర్వాత వర్షాలు కురవడంతో రైతులు విత్తనాలు వేసేందుకు దుక్కులు సిద్ధం చేసుకునే పనుల్లో బిజీబిజీగా ఉండడంతోపాటు ఎరువులు, విత్తనాలను కొనుగోలు చేస్తున్నారు. వానకాలం సాగుకు సంబంధించి జిల్లాలో వ్యసాయాధికారులు ప్రణాళికలు సిద్ధం చేసి అంచనా వేశారు. రైతులు పంటలు ఎంత విస్తీర్ణంలో సాగు చేస్తారో అంచనా వేసుకొని అందుకు సరిపడా విత్తనాలను దుకాణాల్లో అందుబాటులోకి తీసుకొచ్చారు. రోహిణిలో విత్తనాలు వేస్తే పంటలకు ఎలాంటి చీడపీడలు రాకుండా పంట దిగుబడి ఎక్కువగా వస్తుందని రైతుల నమ్మకం. రైతులు విత్తనాలు వేసేందుకు సమాయత్తం అవుతున్నారు. వరి, పత్తి, మొక్కజొన్న, జొన్న, కందులు, పెసర పంటలకు సంబంధించిన విత్తనాలు ఎంత మేరకు అవసరమే అంచనా వేసుకొని జిల్లా వ్యాప్తంగా వ్యవసాయాధికారులు అందుబాటులోకి తీసుకొచ్చారు. ఎరువులు మాత్రం దశల వారీగా తెప్పించనున్నారు. గజ్వేల్ కేంద్రంగా ఎరువుల రేక్ పాయింట్ ఉండగా సకాలంలో ఎరువులను జిల్లాలోని ప్రధాన పట్టణాలకు సరఫరా చేసుకునే వీలుంటుంది. వానకాలంలో జిల్లా వ్యాప్తంగా 5.50లక్షల ఎకరాల్లో వివిధ రకాల పంటలను రైతులు సాగు చేయనున్నట్లు వ్యవసాయాధికారులు అంచనా వేశారు.
వానకాలం సాగుకు విత్తనాలు కొనుగోలు చేసేందుకు రైతులు దుకాణాల వద్ద బిజీబిజీగా ఉన్నారు. గజ్వేల్ డివిజన్ పరిధిలో ఎక్కువగా రైతులు పత్తి సాగుకే మొగ్గు చూపుతారు. జిల్లాలోనే అత్యధికంగా గజ్వేల్ డివిజన్లో పత్తి సాగు చేయనుండగా రైతుల డిమాండ్కు తగిన పత్తి విత్తన ప్యాకెట్లను అందుబాటులో ఉం చారు. ఇప్పటికే చాలావరకు విత్తన ప్యాకెట్లను రైతులు కొనుగోలు చేయగా మరికొంత మంది కొనుగోలు చేస్తున్నారు. ఎక్కువగా బీటీ పత్తి విత్తనాల కొనుగోలుకే రైతులు ఆసక్తి చూపుతున్నారు.
వానకాలంలో సిద్దిపేట జిల్లా వ్యాప్తంగా 5.50లక్షల ఎకరాల్లో రైతులు పంటలను సాగు చేయనున్నారు. 3 లక్షల ఎకరాల్లో వరి సాగుకు అంచనా వేయగా, 2 లక్షల ఎకరాల్లో పత్తితోపాటు కందులు, మొక్కజొన్న, పెసర్లు సాగు చేయనున్నట్లు అధికారులు అంచనా వేశారు. వానకాలానికి సంబంధించి యూరియా 279 26.66 మెట్రిక్ టన్నులు, డీఏపీ 1601.63 మెట్రిక్ టన్నులు, ఏంవోపీ 667.4 మెట్రిక్ టన్నులు, ఎస్ఎస్పీ 148.85 మెట్రిక్ టన్ను లు, కాంప్లెక్స్ 16767 మెట్రిక్ టన్నుల ఎరువులు రైతులు పంటలకు వినియోగిస్తారని అం చనా వేశారు. రైతులు సాగు చేసే పంటల అవసరాలకు అనుగుణంగా విడతల వారీగా ఎరువులను తెప్పించే విధంగా అధికారులు ప్రణాళికలు రూపొందించారు.
రైతుల ప్రయోజనాలే లక్ష్యంగా వానకాలం సీజన్లో అవసరమయ్యే విత్తనాలను అందుబాటులోకి తీసుకొచ్చాం. సాగయ్యే విస్తీర్ణాన్ని బట్టి విత్తనాలు, ఎరువుల కోసం ముందుగానే ప్రభుత్వానికి నివేదిక ఇచ్చాం. రైతులకు ఎలాంటి సమస్యలు రాకుండా ముందస్తుగా జాగ్రత్తలు తీసుకుంటున్నాం. విత్తనాల అమ్మకాల్లో రైతులను మోసం చేసినట్లు తమ దృష్టికి వస్తే కఠిన చర్యలు తీసుకుంటాం.