మెదక్, జూలై 23 (నమస్తే తెలంగాణ) : అర్హులైన ప్రతి రైతుకూ రుణమాఫీ అందాలని మెదక్ జిల్లా కలెక్టర్ రాహుల్రాజ్ అన్నారు. పంటరుణమాఫీ సమస్యలను నివృత్తి చేసుకోవడానికి ప్రతి మండల కేంద్రంలో బ్యాంకుల వద్ద వ్యవసాయాధికారులతో గ్రీవెన్స్సెల్ ఏర్పాటు చేసేందుకు పకడ్బందీ చర్యలు తీసుకోవాలన్నారు. మంగళవారం సంబంధిత లీడ్ బ్యాంక్ మేనేజర్తో కలిసి మెదక్ జిల్లా హవేళీఘనపూర్ మండలం బూర్గుపల్లి ఎస్బీఐ బ్రాంచ్ వద్ద పంటరుణమాఫీ పథకం అమలు తీరును క్షేత్రస్థాయిలో కలెక్టర్ స్వయంగా పరిశీలించారు. ఈ సందర్భంగా ఆయన మాట్లాడుతూ బూర్గుపల్లి ఎస్బీఐ లో 391 అకౌంట్లు ఉన్నాయని, ఇప్పటివరకు 367 మంది రైతులకు పంటరుణమాఫీ వర్తించిందన్నారు.
పంటరుణ మాఫీపై క్షేత్రస్థాయిలో రైతుల సమస్యలను తెలుసుకుని చర్యలు తీసుకుంటామని చెప్పారు. జిల్లా వ్యాప్తంగా మొదటి విడత లక్షలోపు ఉన్న 47,978 మంది రైతులకు వివిధ బ్యాంకుల ద్వారా రూ.23 8.81 కోట్లు విడుదల చేయగా అందులో47,616 మంది రైతుల ఖాతాల్లో 237.5 కోట్లు జమచేసినట్లు తెలిపారు. సాంకేతిక కారణాల వల్ల 362 మంది రైతులకు సంబంధించి రూ.1.3 కోట్లు జమకావాల్సి ఉందన్నారు. సంబంధిత రైతులకు పంట రుణమాఫీ సొమ్ము చేరేలా బ్యాంకు అధికారులు వ్యవసాయాధికారులతో సమన్వయం చేసుకోవాలని సూచించారు. రైతులకు ఎలాంటి ఇబ్బందులు లేకుండా పంటరుణమాఫీ ప్రక్రియ పూర్తి చేయాలని బ్యాంకు మేనేజర్లు, వ్యవసాయాధికారులను ఆయన ఆదేశించారు. ఈ కార్యక్రమంలో లీడ్ బ్యాంకు మేనేజర్ నరసింహమూర్తి, బూర్గుపల్లి ఎస్బీఐ బ్రాంచ్ మేనేజర్ శ్రీధర్, వ్యవసాయాధికారులు, రైతులు పాల్గొన్నారు.