పటాన్చెరు, మార్చి 15: సంగారెడ్డి జిల్లా పటాన్చెరు ఎమ్మెల్యే గూడెం మహిపాల్రెడ్డి సోదరుడు గూడెం మధుసూదన్రెడ్డిని పోలీసులు తెల్లవారుజామున అరెస్టు చేయడంపై హరీశ్రావు తీవ్రంగా ఖండించారు. అర్ధరాత్రి అరెస్టు చేయాలని భారీ బలగాలతో వచ్చి తెల్లవారుజామున పోలీసులు గూడెం మధుసూదన్రెడ్డిని అరెస్టు చేయడం తప్పన్నారు. తమ పార్టీలో చేరాలని బీఆర్ఎస్ ఎమ్మెల్యే బంధువులపై కాంగ్రెస్ సర్కారు అక్రమ కేసులు పెడుతున్నదని విమర్శించారు. కాంగ్రెస్ ప్రభుత్వం పాలన గాలికి వదిలేసి, ప్రతిపక్షాలను వేధించడంలో నిమగ్నమైందని విమర్శించారు. వందలాది పోలీసులు వచ్చి మూడు గంటల రాత్రి సమయంలో అరెస్టు చేయడంపై హరీశ్రావు ఆగ్రహం వ్యక్తం చేశారు. ఆయన ఏమైనా బంధిపోటా అని ప్రశ్నించారు.
మంత్రి దామోదర రాజనర్సింహ ఆదేశాలతోనే క్రషర్లపై విచారణ నిర్వహిస్తున్నామని స్వయంగా ఆర్డీవో తెలిపిన వీడియోను మంత్రి ఫోన్లో చూపించారు. పదేండ్ల బీఆర్ఎస్ పాలనలో ఏనాడు కక్షసాధింపు చర్యలకు పాల్పడింది లేదన్నారు. క్రషర్ల వ్యాపారులను ఏనాడు వేధించింది లేదన్నారు. కాంగ్రెస్ నాయకులకు క్రషర్లు ఉన్నా ఏమనలేదన్నారు. ఎఫ్ఐఆర్ కాపీ ఇవ్వకుండా ఎలా అరెస్టు చేస్తారని ప్రశ్నించారు. బెయిల్ వచ్చే సెక్షన్లతో కేసు లు ఉన్నా, ఏదో రకంగా జైలుకు పంపాలని చూస్తున్నారన్నారు. బెదిరించి లొంగదీసుకుని కాంగ్రెస్ పార్టీలో చేర్చుకోవాలనే ఉద్దేశం వారిదన్నారు.
ప్రజాసేవ చేయడానికి వచ్చిన బీఆర్ఎస్ ఎమ్మెల్యేలపై వారి ప్రభావం పడదన్నారు. గ్రామాల్లో తాగునీరు రావడం లేదని, పంటలు ఎండుతున్నాయని, వీటి గురించి పట్టించుకోకుండా వేధింపు రాజకీయాలకు పాల్పడుతున్నారని హరీశ్రావు విమర్శించారు. ప్రతిపక్షాలపై బురదజల్లే ప్రయత్నం చేస్తున్నారని అన్నారు. కాంగ్రెస్ పార్టీకి ప్రజలే బుద్ధి చెబుతారనన్నారు. గూడెం మధుసూదన్రెడ్డికి పార్టీ అండగా ఉంటుందని హరీశ్రావు భరోసా ఇచ్చారు.
గూడెం మధుసూదన్రెడ్డిని తన నివాసం నుంచి తెల్లవారుజామున 3గంటల ప్రాంతం లో అరెస్టు చేసిన విషయం తెలుసుకున్న మాజీ మంత్రి హరీశ్రావు హుటాహుటిన పటాన్చెరుకు వచ్చారు. గూడెం మధు నివాసానికి వెళ్లి వారి కుటుంబసభ్యులను పరామర్శించారు. తాను అండగా ఉంటానని ధైర్యం చెప్పారు. రాజకీయాల్లో ఇలాంటివి ఉంటాయని, అధైర్య పడవద్దన్నారు.
రాజకీయ కుట్రలు ఎదుర్కోవడం బీఆర్ఎస్ నాయకులకు అలవాటే అన్నారు. పోలీసులు నిబంధనల మేరకు వ్యవహరించలేదని, వారిపై న్యాయపరమైన పోరాటం జరుపుతామని వెల్లడించారు. హరీశ్రావు వెంట ఎమ్మెల్యేలు చింతా ప్రభాకర్, మాణిక్రావు, కొత్త ప్రభాకర్రెడ్డి, సునీతా లక్ష్మారెడ్డి, మాజీ ఎమ్మెల్యే కే సత్యనారాయణ, మాజీ కార్పొరేటర్లు సఫానదేవ్, శంకర్యాదవ్, నర్రా భిక్షపతి, ఈర్ల దేవానంద్, దశరథరెడ్డి పాల్గొన్నారు.
పటాన్చెరు ఎమ్మెల్యే గూడెం మహిపాల్రెడ్డికి తన తమ్ముడు మధుసూదన్రెడ్డి రాముడికి లక్ష్మణుడిలా ఎప్పుడూ వెన్నం టి ఉండేవారు. సోదరుడిని పోలీసులు అరెస్టు చేయడంతో ఎమ్మెల్యే గూడెం మహిపాల్రెడ్డి తట్టుకోలేక భావోద్వేగానికి గురయ్యారు. గద్గద భరితమైన స్వరంతో తమ్ముడి అరెస్టును ఖండించారు. తాను పదేండ్ల పాటు ఎమ్మెల్యేగా పనిచేసినా, ఏనాడు ఎవరినీ బాధించలేదన్నారు. తన తమ్ముడిని ఎలాగైనా అరెస్టు చేసి జైలుకు పంపాలనే కక్షతో కాంగ్రెస్ నాయకులు పోలీసులను ఎగేశారన్నారు. ఎంపీటీసీగా, ఎంపీపీగా, ఎమ్మెల్యేగా మూడుసార్లు గెలిచానంటే తన మంచితనంతోనే అన్నారు.
కక్షపూరితంగా తాను వ్యవహరించి ఉంటే తనను రెండోసారే ప్రజలు పక్కకు పెట్టేవారన్నారు. గూడెం మధుసూదన్రెడ్డిపై రాజకీయ కుట్ర పన్నారని, కుట్రలను తట్టుకొని రాజకీయ, న్యాయపోరాటం చేస్తామన్నారు. క్రషర్ను పూర్తి పర్మిషన్లతోనే నడిపిస్తున్నామని, బెదిరింపులకు భయపడేది లేదని ఎమ్మెల్యే గూడెం మహిపాల్రెడ్డి అన్నారు. దీనిని ప్రజాకోర్టులో తేల్చుకుంటామన్నారు.