సిద్దిపేట అర్బన్, ఫిబ్రవరి 11 : ఎన్నికల్లో మైనార్టీలకు పెద్దపీట వేస్తామని చెప్పిన కాంగ్రెస్ ప్రభుత్వం మొదటి బడ్జెట్లోనే మొండిచేయి చూపిందని మాజీ మంత్రి, సిద్దిపేట ఎమ్మెల్యే హరీశ్రావు విమర్శించారు. ఆదివారం సిద్దిపేట పట్టణంలోని హజ్హౌస్లో ఉమ్రా యాత్రకు వెళ్తున్న పది మంది యువకులను ఆయన సన్మానించారు. ఈ సందర్భంగా మాట్లాడుతూ.. బడ్జెట్లో రూ.4 వేల కోట్లు ప్రవేశపెడతామని చెప్పి, రూ.2,200 కోట్లు ప్రవేశపెట్టి కాంగ్రెస్ సర్కారు మోసం చేసిందన్నారు.
అల్లా దయతో ఉమ్రా యాత్రను సంతోషంగా ముగించుకొని రావాలన్నారు. పేదలు ఉమ్రా యాత్రకు వెళ్లేందుకు ఏటా సొంత ఖర్చులతో పదిమందిని ఎంపిక చేసి పంపిస్తున్నట్లు చెప్పారు. బీఆర్ఎస్ హయాంలో హైదరాబాద్ తర్వాత సిద్దిపేటలోనే హజ్హౌస్ను అన్నిహంగులతో నిర్మించుకున్నట్లు తెలిపారు. అన్నివేళలా మీకు అండగా ఉంటానని భరోసా ఇచ్చారు. కార్యక్రమంలో బీఆర్ఎస్ నాయకులు రాజనర్సు, కొండం సంపత్రెడ్డి, పాల సాయిరాం, మచ్చ వేణుగోపాల్రెడ్డి, యోయిజ్, జావెద్ పాల్గొన్నారు.