దుబ్బాక, జూన్ 3: తెలంగాణ రాష్ట్ర సాధనతోపాటు ప్రజల సంక్షేమం, అభివృద్ధే లక్ష్యంగా ఆహర్నిషలు కృషి చేసిన ఘనత బీఆర్ఎస్ అధినేత కేసీఆర్కే దక్కుతుందని దుబ్బాక ఎమ్మెల్యే, బీఆర్ఎస్ జిల్లా అధ్యక్షుడు కొత్త ప్రభాకర్రెడ్డి అన్నారు. సమైక్యాంధ్ర పాలకుల నిరంకుశ పాలనకు చరమగీతం పాడి, తెలంగాణ ప్రజలకు పరిపాలన సౌలభ్యంతో పాటు స్వేచ్ఛావాయువులు అం దించిన ఘనత మన ఉద్యమనేత కేసీఆర్దేనని స్పష్టం చేశారు. తెలంగాణ దశాబ్ది ఉత్సవాల ముగింపు సందర్భంగా సోమవారం సిద్దిపేట జిల్లా దుబ్బాక బస్టాండు వద్ద బీఆర్ఎస్ జెండావిష్కరణలో ఎమ్మెల్యే పాల్గొన్నారు. ఈ సందర్భంగా జై తెలంగాణ.. జై కేసీఆర్ అంటూ పెద్దఎత్తున నినాదాలు చేశారు. తెలంగాణ రాష్ట్ర సాధనలో ప్రాణాలు కోల్పోయిన అమరులకు ఘన నివాళులు అర్పించారు. అనంతరం ఎమ్మెల్యే ప్రభాకర్రెడ్డి విలేకరులతో మాట్లాడుతూ… బీఆర్ఎస్ అధినేత కేసీఆర్ నేతృత్వంలో అలుపెరగని పోరాటాలతో తెలంగాణ రాష్ర్టాన్ని సాధించుకున్నామన్నారు.
రాష్ట్ర సాధనలో కేసీఆర్ ప్రా ణత్యాగానికి సిద్ధమయ్యారని గుర్తు చేశారు. ఉద్యమాలకు మారుపేరుగా నిలిచిన దుబ్బాక గడ్డ తెలంగాణ ఉద్యమంలో ముందంజలో ఉన్నదన్నారు. ఉద్యమంలో కేసీఆర్ ఇచ్చిన ప్రతి కార్యక్రమాన్ని దుబ్బాక ఉద్యమకారులు విజయవంతం చేశారని, రాష్ట్ర సాధనలో ఎందరో ఉద్యమకారులు బలిదానమయ్యారని, అమరుల త్యాగం మర్చిపోలేనిదని గుర్తు చేశారు. తెలంగాణ రాష్ట్ర ఆవతరణ దినోత్సవం సందర్భంగా తెలంగాణ అమరులను, ఉద్యమకారులను ప్రస్తుత కాంగ్రెస్ ప్రభుత్వం అవమానపర్చిందని మండిపడ్డారు. తెలంగాణ రాష్ట్ర సాధనలో పాల్గొన్న ప్రతి ఉద్యమకారుడికీ, ఉద్యోగ, ఉపాధ్యాయ, వ్యాపార అన్ని వర్గాల వారికి , బీఆర్ఎస్ శ్రేణులకు ఆయన ప్రత్యేక కృతజ్ఞతలు తెలిపారు. కార్యక్రమంలో దు బ్బాక మున్సిపల్ చైర్పర్సన్ గన్నే వనితాభూంరెడ్డి, జడ్పీటీసీ రవీందర్రెడ్డి, బీఆర్ఎస్ నాయకులు సోలిపేట సుజాత, సతీశ్రెడ్డి, భూంపల్లి మనోహర్రావు , వెంకటనర్సింహారెడ్డి, రొట్టే రాజమౌళి, ఎల్లారెడ్డి, కిషన్రెడ్డి, కార్తిక, నారాగౌడ్, కృష్ణ, కౌన్సిలర్లు, నాయకులు, కార్యకర్తలు పాల్గొన్నారు.