సిద్దిపేట టౌన్, జూన్ 17: సిద్దిపేట ప్రభుత్వ డిగ్రీ కళాశాలకు మరో రెండు పీజీ కోర్సులు మంజూరయ్యాయని మాజీ మంత్రి, సిద్దిపేట ఎమ్మెల్యే తన్నీరు హరీశ్రావు అన్నారు. సోమవారం ఆయన మాట్లాడుతూ ప్రభుత్వ అటానమస్ డిగ్రీ కళాశాలలో ఇప్పటికే 10 పీజీ కోర్సులు ఉన్నాయని, నూతనంగా ఎమ్మెస్సీ మైక్రో బయాలజీ, ఎమ్మెస్సీ కంప్యూటర్ సైన్స్ కోర్సుల్లో 60 సీట్ల చొఫ్పున ఈ విద్యా సంవత్సరం నుంచి ప్రారంభమవుతాయన్నారు. పీజీ కళాశాలగా రూపాంతరం చెందిన మిట్టపల్లి మహిళా రెసిడ్షెనిడెయల్ డిగ్రీ కళాశాలలో ఎమ్మెస్సీ ఫిజిక్స్ కోర్సు ఈ ఏడాది నుంచే ప్రారంభించుకుంటున్నామని తెలిపారు. విద్యార్థులకు ఉత్తమ విద్యను అందించాలనే సంకల్పంతో సిద్దిపేట నియోజకవర్గంలో రెండు మెడికల్, నాలుగు పాలిటెక్నిక్, ప్రభుత్వ డిగ్రీ, మహిళా డిగ్రీ, పీజీ నర్సింగ్, ఫార్మసీ, అగ్రికల్చర్ కళాశాలలు, మోడల్ స్కూల్స్, గురుకులాలు, రెసిడెన్షియల్, పాఠశాలలు, కేంద్రియ విద్యాలయాలు ఏర్పాటు చేసి సిద్దిపేటను విద్యాలయాల ఖిల్లాగా తీర్చిదిద్దామన్నారు.
ప్రభుత్వ డిగ్రీ కళాశాలలో రూ.2.50 లక్షలతో నిర్మించే అదనపు తరగతి గదుల నిర్మాణాన్ని త్వరితగతిన చేపట్టాలని మాజీ మంత్రి ఎమ్మెల్యే హరీశ్రావు అధికారులను ఆదేశించారు. నిర్మాణ పనుల జాప్యంపై ఇటీవల నిర్వహించిన సమీక్షలో అధికారులపై ఆయన ఆగ్రహం వ్యక్తం చేశారు. అదనపు తరగతి గదుల పనులను వెంటనే ప్రారంభించాలని సూచించారు. సిద్దిపేట నియోజకవర్గం సరస్వతీ నిలయంగా విరాజిల్లుతుందన్నారు. విద్యాభివృద్ధికి విద్యాశాఖ, ఉపాధ్యాయులు, అధ్యాపకులు, ప్రజాప్రతినిధులు సమష్టి కృషి చేయాలన్నారు.