కల్హేర్, జూలై 24: పంట రుణమాఫీ డబ్బులను రైతుల ఖాతాల్లో వెంటనే జమ చేయాలని, రెన్యువల్ చేసి కొత్త రుణాలు ఇవ్వాలని సంగారెడ్డి జిల్లా కలెక్టర్ వల్లూరు క్రాంతి బ్యాంకు అధికారులను ఆదేశించారు. బుధవారం సంగారెడ్డి జిల్లా కల్హేర్ మండల కేంద్రంలోని ఎస్బీఐని ఆమె ఆకస్మికంగా సందర్శించారు. రూ.లక్షలోపు ఎంత మంది రైతులకు రుణమాఫీ వర్తించిందని ప్రశ్నించగా 660 మందికి వచ్చిందని బ్యాంక్ మేనేజర్ జాదవ్ సంతోష్ తెలిపారు. ఇప్పటి వరకు 120 మంది రైతుల బ్యాంకు ఖాతాల్లో రూ. కోటి రూపాయాలు జమచేయడం జరిగిందని, మిగిలిన 440 మంది రైతుల పంటరుణాలను వారి ఖాతాల్లో జమచేస్తామన్నా రు. గ్రామాల్లో గ్రామ సభలు ఏర్పాటు చేసిన పంటరుణమాఫీపై వ్యవసాయాధికారులు అవగాహన కల్పించాలని ఆమె ఆదేశించారు.
విద్యార్థులు ఉన్నత శిఖరాలు అధిరోహించాలని కలెక్టర్ క్రాంతి సూచించారు. మండలకేంద్రంలోని ప్రాథమిక పాఠశాల, అంగన్వాడీ కేంద్రం, జిల్లా పరిషత్ ఉన్నత పాఠశాలలను ఆమె ఆకస్మికంగా సందర్శించారు. ఈ సందర్భం గా మూడు, నాలుగో తరగతి విద్యార్థులతో గుణింతాలు చదివించారు. అనంతరం అంగన్వాడీ కేంద్రంలో బాలింతలు, గర్భిణులకు అందిస్తున్న పౌష్టికాహారం వివరాలను అడిగి తెలుసుకున్నా రు. ఉన్నత పాఠశాలలో డిజిటల్ టీవీలను ఎందుకు వినియోగించడం లేదని ఉపాధ్యాయులను ప్రశ్నించారు.