కౌడిపల్లి, మే 30: కొనుగోలు కేంద్రాల్లో మిగిలిపోయిన ధాన్యాన్ని త్వరగా తరలిస్తామని మెదక్ కలెక్టర్ రాహుల్రాజ్ తెలిపారు. గురువారం ఆయన కౌడిపల్లిలోని కొనుగోలు కేంద్రాన్ని సందర్శించారు. జిల్లాలో 300 కేంద్రాలు ఉండగా 2.60 లక్షల మెట్రిక్ టన్నుల ధాన్యం సేకరించామన్నారు. మిగిలిన 10వేల మెట్రిక్ టన్నుల ధాన్యాన్ని త్వరగా తరలిస్తామన్నారు. నాణ్యమైన ధాన్యాన్ని ఇతర జిల్లాలకు అందజేస్తున్నామని చెప్పారు. కొనుగోలు కేంద్రాలకు లారీలు వస్తున్నాయా, లేబర్ కొరత ఉందా అని రైతులను అడిగి తెలుసుకున్నారు.
ఇప్పటి వరకు జిల్లాలో 4వేల క్వింటాళ్ల జీలుగ విత్తనాలు అందజేశామని తెలిపారు. మిగతా రైతులకు కూడా అందజేస్తామని ఎలాంటి ఇబ్బందులకు గురికావద్దన్నారు. అనంతరం తునికి జిల్లా పరిషత్ అమ్మ ఆదర్శ పాఠశాలను కలెక్టర్ తనిఖీ చేశారు. జూన్ 10లోగా పాఠశాలల మరమ్మతు పనులు పూర్తి చేయాలన్నారు. నాగసాన్పల్లిలోని ఎరువుల షాపును కలెక్టర్ తనిఖీ చేశారు. మండలానికి 200 క్వింటాళ్ల జీలుగ, 150 క్వింటాళ్ల పెద్ద జనుము విత్తనాలు వచ్చాయని చెప్పారు. మరో 95 క్వింటాళ్ల జీలుగ, 120 క్వింటాళ్ల జనుము విత్తనాలు వస్తాయన్నారు. ఆయన వెంట తహశీల్దార్ ఆంజనేయులు, ఏడీఏ పుణ్యవతి, ఏవో స్వప్న, ఇతర అధికారులు ఉన్నారు.