రామాయంపేట, మే 27: నెలాఖరులోగా ధాన్యం కొనుగోళ్లు పూర్తి చేస్తామని, రైతులందరూ ధాన్నాన్ని తూకం వేయించుకోవాలని మెదక్ కలెక్టర్ రాహుల్రాజ్ అన్నారు. సోమవారం రామాయంపేట మండలం రాయిలాపూర్ గ్రామానికి చేరుకున్న కలెక్టర్ ముం దుగా ధాన్యం కొనుగోలు కేంద్రాన్ని సందర్శించి అక్కడ మాయిశ్చరైజింగ్ చేస్తున్న మిషన్ను పరిశీలించారు.
అక్కడే ఉన్న తహసీల్దార్ రజినీకుమారి, ఏవో రాజ్ నారాయణకు పలు సూచనలు చేశారు. అనంతరం కలెక్టర్ మాట్లాడుతూ రైతులు ఎలాంటి ఆందోళన చెందాల్సిన అవసరం లేదని, ప్రభుత్వం ఈ నెలాఖరు వరకు ధాన్యం కొనుగోలు చేస్తుందన్నారు. తడిసిన ధాన్యాన్ని కూడా ప్రభు త్వం కొంటుందన్నారు. తూకం వేసిన ధాన్యం బస్తాలను త్వరితగతిన తీసుకెళ్లాలని అక్కడే ఉన్న తహసీల్దార్, వ్యవసాయ శాఖ అధికారులకు తెలిపారు.
మెదక్ జిల్లా వ్యాప్తంగా ప్రభుత్వ పాఠశాలల్లో నడుస్తున్న అమ్మ ఆదర్శ పాఠశాలల పనులు ఈ నెలాఖరులోగా పూర్తి చేయాలని మండల విద్యాధికారి నీలకంఠానికి కలెక్టర్ రాహుల్రాజ్ సూచించారు. దామరచెర్వు గ్రామంలోని అమ్మ ఆదర్శ పాఠశాల పనులను పరిశీలించారు. మండల వ్యాప్తంగా ఎక్కడ ఏ గ్రామంలో పనులు నడుస్తున్నాయో నివేదిక ఇవ్వాలని ఎంఈవోకు సూచించారు.
ఈ నెలాఖరులోగా పనులు పూర్తయితేనే జూన్ 12న విద్యార్థులకు ఇబ్బందులు లేకుండా చదువుకుంటారని తెలిపారు. ప్రతి ప్రభుత్వ పాఠశాలలో వందశాతం విద్యార్థులు చదువుకునేలా చర్యలు చేపట్టాలన్నారు. విద్యార్థుల శాతం ఎక్కువ ఉంటేనే పాఠశాలకు అన్ని వసతులు ఉంటాయన్నారు. కార్యక్రమంలో తహసీల్దార్ రజినీకుమారి, ఎంఈవో నీలకంఠం, వ్యవసాయ శాఖ అధికారి రాజ్నారాయణ, సీఈవో నర్సింహులు తదితరులు ఉన్నారు.