సంగారెడ్డి, ఏప్రిల్ 11(నమస్తే తెలంగాణ): రైతు వ్యతిరేక విధానాలను అవలంభిస్తూ తెలంగాణపై వివక్ష ప్రదరిస్తున్న కేంద్ర బీజేపీ ప్రభుత్వం చర్యలు తిప్పికొట్టాలని ఆర్థిక, వైద్యారోగ్యశాఖల మంత్రి తన్నీరు హరీశ్రావు పిలుపునిచ్చారు. రైతుల సంక్షేమానికి అహర్నిశలు కృషి చేస్తున్న సీఎం కేసీఆర్కు ప్రజలు, ప్రజాప్రతినిధులు అండగా నిలబడాలని కోరారు. సీఎం కేసీఆర్ ప్రజలకు ఇవ్వని హామీలను కూడా నెరవేరుస్తూ రాష్ర్టాన్ని అభివృద్ధి పథంలో నడుపుతున్నారని తెలిపారు. మంగళవారం సంగారెడ్డి జడ్పీ సమావేశ మందిరంలో జడ్పీ చైర్పర్సన్ మంజుశ్రీజైపాల్రెడ్డి అధ్యక్షతన జిల్లా పరిషత్ సర్వసభ్య సమావేశం నిర్వహించారు. ఈ సమావేశంలో మంత్రి హరీశ్రావు, ఎంపీ బీబీ పాటిల్, ఎమ్మెల్యేలు చంటి క్రాంతికిరణ్, భూపాల్రెడ్డి, మాణిక్రావు, హ్యాండ్లూమ్ కార్పొరేషన్ చైర్మన్ చింతా ప్రభాకర్, డీసీసీబీ చైర్మన్ చిట్టి దేవేందర్రెడ్డి, గ్రంథాల సంస్థ చైర్మన్ నరహారిరెడ్డి, కలెక్టర్ శరత్ పాల్గొన్నారు. అంతకుముం దు జడ్పీటీసీలు, ఎంపీటీసీలకు వైద్యులు సీపీఆర్పై అవగాహన కల్పించారు.
ఇవ్వని హామీలు కూడా నెరవేరుస్తున్న సీఎం
ఆర్థిక, వైద్యారోగ్య శాఖల మంత్రి తన్నీరు హరీశ్రావు మాట్లాడుతూ సీఎం కేసీఆర్ ప్రజలకు ఇవ్వని హామీలను కూడా నెరవేరుస్తున్నట్లు చెప్పారు. రైతుబంధు, రైతుబీమా, ఉచిత విద్యుత్, కేసీఆర్కిట్, కల్యాణలక్ష్మి, ఆసరా పింఛన్లు తదితర పథకాలు అమలు చేస్తున్నట్లు తెలిపారు. పక్క రాష్ట్రం కర్ణాటకలో బీజేపీ సర్కారు వ్యవసాయ బోరుబావుల వద్ద మీటర్లు పెట్టి బిల్లులు వసూలు చేస్తున్నదని, తెలంగాణ తరహా అభివృద్ధి, సంక్షేమ కార్యక్రమాలు ఆ రాష్ట్రంలో అమలు చేయటంలేదన్నారు. కేంద్ర ప్రభుత్వం రాష్ట్రంపై వివక్ష చూపుతున్నదని ఆగ్రహం వ్యక్తం చేశారు. రాష్ర్టానికి రావాల్సిన నిధులు ఇవ్వకుండా ఇబ్బందులకు గురిచేస్తున్నా, సీఎం కేసీఆర్ తెలంగాణలో సంక్షేమ, అభివృద్ధి పనులను కొనసాగిస్తున్నట్లు వివరించారు. రైతులు ఇబ్బంది పడకుండా ఉచిత విద్యుత్ సరఫరా చేస్తున్నదని తెలిపారు.
ప్రభుత్వంపై భారమైనా యూనిట్కు రూ.20 నుంచి రూ.30 చెల్లించి రూ.1,500 కోట్లతో విద్యుత్ కొనుగోలు చేస్తున్నట్లు చెప్పారు. జడ్పీటీసీ మీనాక్షి మాట్లాడుతూ సీఎం కేసీఆర్ రైతు పక్షపాతి అని, ఆయన రైతుల పక్షాన నిలబడితే కేంద్ర బీజేపీ ప్రభుత్వం రైతు వ్యతిరేక విధానాలను అవలంభిస్తున్నదని, రాష్ర్టానికి నిధులు ఇవ్వకుండా ఇబ్బంది పెడుతున్న బీజేపీకి ప్రజలు గుణపాఠం చెప్పటం ఖాయమన్నారు. జడ్పీటీసీ రాజునాయక్ మాట్లాడుతూ రైతును రాజును చేసిన ఘతన సీఎం కేసీఆర్కు దక్కుతుందన్నారు. కాంగ్రెస్, బీజేపీలు తెలంగాణ ప్రభుత్వంపై బురదజల్లే ప్రయత్నం చేస్తున్నాయని, ప్రజలు రెండు పార్టీల మాటలను నమ్మరని తెలిపారు.
సంగారెడ్డిలో క్యాథ్ల్యాబ్ ఏర్పాటు
సంగారెడ్డి జిల్లాలోని హెల్త్ సంబ్పెంటర్లకు సొంత భవనాలు నిర్మించనున్నట్లు మంత్రి హరీశ్రావు ప్రకటించారు. వట్పల్లి జడ్పీటీసీ అపర్ణ తమ మండలంలో పీహెచ్సీ ఏర్పాటు లేదా సబ్సెంటర్కు సొంత భవనం ఇవ్వాలని కోరారు. దీనిపై మంత్రి స్పందిస్తూ సంగారెడ్డి జిల్లాకు ఇటీవలే కొత్తగా ఆరు పీహెచ్సీలు మంజూరు చేశామని, వట్పల్లికి పీహెచ్సీ మంజూరు చేసే అంశాన్ని పరిశీలిస్తామని తెలిపారు. అప్పటి వరకు సబ్సెంటర్కు వైద్యుడిని ఏర్పాటు చేస్తామని హామీ ఇచ్చారు. సంగారెడ్డి జిల్లాలో సొంత భవనాలు లేని హెల్త్ సబ్పెంటర్లకు సొంత భవనాలు నిర్మిస్తామన్నారు. రాష్ట్ర ప్రభుత్వం ప్రభుత్వ దవాఖానల్లో మెరుగైన మౌలిక వసతులు కల్పిస్తున్నట్లు చెప్పారు. ప్రతి నియోజకవర్గంలో వంద పడకల దవాఖానలు ఏర్పాటు చేసినట్లు తెలిపారు.
సంగారెడ్డిలో 600 పడకలతో దవాఖాన ఏర్పాటుతోపాటు వైద్య కళాశాల ప్రారంభించినట్లు పేర్కొన్నారు. త్వరలోనే సంగారెడ్డి దవాఖానలో క్యాథ్ల్యాబ్ ఏర్పాటు చేస్తామని, దీంతో గుండె సమస్యలున్న రోగులకు ఇక్కడే చికిత్సతోపాటు స్టంట్లు వేసుకోవచ్చన్నారు. ప్రైవేటు దవాఖానల్లో స్టంట్లు వేయాలంటే లక్షల్లో ఖర్చవుతుందని, దీనిని దృష్టిలో పెట్టుకుని సంగారెడ్డి దవాఖానలో త్వరలోనే క్యాథ్ల్యాబ్ ఏర్పాటు చేస్తామని తెలిపారు. జిల్లాలోని నాలుగు దవాఖానల్లో ఆరోగ్య మహిళా సేవలు అంజేస్తున్నామని, త్వరలోనే అందోలు, నారాయణఖేడ్, సంగారెడ్డిలో సైతం ఈ సేవలు అందజేయనున్నట్లు చెప్పారు. ప్రభుత్వ దవాఖానల్లో రోగులకు అవసరమైన మందులను ఉచితంగా అందజేస్తున్నామని, వైద్యులు మందులు బయటకు రాస్తే వారిపై చర్యలు తీసుకుంటామని హెచ్చరించారు.
నకిలీ వైద్యులను గుర్తించి వారిపై కఠిన చర్యలు తీసుకోవాలని డీఎంహెచ్వోను మంత్రి ఆదేశించారు. లైసెన్స్లు లేకుండా ఎవరైనా వైద్యులు ఆపరేషన్లు చేస్తే వారిపై కేసులు పెట్టాలన్నారు. అనంతరం జడ్పీటీసీలు రాజునాయక్, జడ్పీటీసీ నర్సింహారెడ్డి నారాయణఖేడ్లో ప్రజలకు మెరుగైన వైద్య సేవలు అందుతున్నాయని, వైద్యం కోసం ప్రజలు బీదర్ వెళ్లటం నిలిచిపోయిందని తెలిపారు. నారాయణఖేడ్కు దవాఖానలు మంజూరు చేసిన మంత్రి హరీశ్రావుకు కృతజ్ఞతలు తెలియజేశారు. పుల్కల్ ఎంపీపీ చైతన్య మహిళలు గైనిక్ సమస్యలతో వస్తే వెంటనే వైద్యులు చికిత్సలు చేసేలా చర్యలు తీసుకోవాలని మంత్రిని కోరారు. గైనిక్ సమస్యలతో వచ్చేవారికి వెంటనే సరైన వైద్యం అందజేయాలని వైద్యాధికారులను ఆదేశించారు. సంగారెడ్డి జిల్లా ప్రభుత్వ దవాఖానల్లో ప్రసవాలు రాష్ట్రంలో అగ్రస్థానంలో నిలవటంపై వైద్య సిబ్బందిని అభినందించారు. గతనెల 1726 ప్రసవాలు ప్రభుత్వ దవాఖానల్లో జరిగితే 296 ప్రసవాలు ప్రైవేట్లో జరిగినట్లు తెలిపారు. కంటి వెలుగు ద్వారా కంటి సమస్య ఉన్న వారికి పరీక్షలు చేయటం, ఉచితంగా అద్దాలు అందజేస్తున్నట్లు చెప్పారు. తాను సైతం కంటివెలుగులో అందజేసిన అద్దాలు వాడుతున్నట్లు చెబుతూ కళ్లజోడును సభ్యులకు చూపించారు. ప్రజాప్రతినిధులు తమ మండలాల్లో జరిగే కంటివెలుగు వైద్య శిబిరాలను సందర్శించి పరీక్ష నిర్వహణ తీరును పరీక్షించాలని సూచించారు.
ఇబ్బందులు లేకుండా ధాన్యం కొనుగోలు
రైతులు ఇబ్బంది పడకుండా ధాన్యం కొనుగోళ్లు చేయాలని మంత్రి హరీశ్రావు అధికారులను ఆదేశించారు. సాధ్యమైనంత త్వరగా ధాన్యం కొనుగోలు కేంద్రాలు ప్రారంభించాలని కలెక్టర్ శరత్కు సూచించారు. జిల్లాలో 209 కొనుగోలు కేంద్రాల ద్వారా 2.07 లక్షల మెట్రిక్ టన్నుల ధాన్యం సేకరించాలని లక్ష్యంగా పెట్టుకున్నట్లు అదనపు కలెక్టర్ వీరారెడ్డి వివరించారు. మంత్రి మాట్లాడుతూ కొనుగోలు కేంద్రాల్లో రైతులకు ఇబ్బందులు తలెత్తకుండా గన్నీబ్యాగులు సమకూర్చుకోవాలన్నారు. వడగండ్ల వానతో పంట నష్టపోయిన రైతులకు ప్రభుత్వం రూ.10 వేల పరిహారం అందజేయనున్నట్లు తెలిపారు.
సంగారెడ్డి జిల్లాలో 4047 ఎకరాల్లో 33 శాతానికి పైగా పంటనష్టపోయిన రైతులకు అండగా నిలుస్తామని భరోసా ఇచ్చారు. కాళేశ్వరం ప్రాజెక్టు నుంచి గోదావరి జలాలను సింగూరు ప్రాజెక్టులోకి తీసుకువస్తామని మంత్రి తెలిపారు. ఇందుకోసం ప్యాకేజీ 19లో భాగంగా నీటిని ఎత్తిపోసేందుకు లిప్టు ఏర్పాటు చేయనున్నామన్నారు. అందోలు ఎమ్మెల్యే చంటి క్రాంతికిరణ్ మాట్లాడుతూ ప్యాకేజీ 19లో భూసేకరణలో భాగంగా రైతుల భూములు ఎక్కువగా తీసుకోవద్దని, అసైన్డ్, అటవీభూములు తీసుకోవాలని మంత్రిని కోరారు. మునిపల్లి ఎంపీపీ శైలజ మాట్లాడుతూ మునిపల్లి మండలంలో చేపట్టే ఫుడ్ప్రాసెసింగ్ పార్కులో భూములు కోల్పోయిన వారికి పరిహారం చెల్లించాలని కోరారు. దీంతో ఎమ్మెల్యే క్రాంతికిరణ్ స్పందిస్తూ ఫుడ్పార్కులో భూములు కోల్పోయిన వారికి రూ.15 లక్షలు, వంద గజాల స్థలం ఇస్తున్నట్లు చెప్పారు.
కొంతమంది కోర్టుకు వెళ్లారని వారు కేసు ఉపసంహరించుకునేలా చూస్తున్నట్లు చెప్పారు. మంత్రి మాట్లాడుతూ కేసు ఉపసంహరించుకునే ప్రక్రియ పూర్తిచేసి భూమి ఇచ్చిన వారికి పరిహారం త్వరగా చెల్లించాలని కలెక్టర్కు సూచించారు. సంగారెడ్డి జడ్పీటీసీ సునీత మాట్లాడుతూ తాము ప్రతిపాదించిన అభివృద్ధి పనులు జరగకుండా సర్పంచ్లు పంచాయతీ తీర్మానాలు ఇవ్వకుండా అడ్డుకుంటున్నారని తెలిపారు. దీనిపై మంత్రి స్పందిస్తూ వెంటనే సమస్య పరిష్కరించాలని కలెక్టర్కు సూచించారు. జడ్పీ వైస్చైర్మన్ ప్రభాకర్, జడ్పీటీసీలు రాఘవరెడ్డి, నర్సింహ్మారెడ్డి, ఆంజనేయులు, ఎంపీపీ సుప్రజ తదితరులు లేవనెత్తిన సమస్యలను వెంటనే పరిష్కరించాలని సంబంధిత అధికారులను మంత్రి ఆదేశించారు. కొండాపూర్ ఎంపీపీ మనోజ్రెడ్డి మాట్లాడుతూ తమ మండలంలో పశు వైద్యశాల సొంత భవనం నిర్మాణానికి, ఆరు పంచాయతీల కొత్త భవనాల నిర్మాణాలకు నిధులు ఇవ్వాలని కోరారు. దీంతో మంత్రి నిధులు మంజూరు చేస్తామని హామీ ఇచ్చారు.
కేంద్ర రైతు వ్యతిరేక విధానాలపై తీర్మానం
ఈ సందర్భంగా కేంద్ర ప్రభుత్వం రైతు వ్యతిరేక విధానాలు అవలంభించడాన్ని, బోర్లకు మీటర్లు బిగించే నిబంధనలు, రాష్ర్టానికి రావాల్సిన నిధులు నిలిపివేయటాన్ని నిరసిస్తూ జడ్పీ సర్వసభ్య సమావేశంలో ఏకగ్రీవంగా తీర్మానం ఆమోదించారు. మునిపల్లి జడ్పీటీసీ మీనాక్షి కేంద్ర ప్రభుత్వానికి వ్యతిరేకంగా తీర్మానం ప్రవేశపెట్టగా, నాగల్గిద్ద జడ్పీటీసీ రాజునాయక్ మద్దతు తెలిపారు. జడ్పీ చైర్పర్సన్ మంజుశ్రీజైపాల్రెడ్డి ఈ తీర్మానాన్ని ప్రవేశపెట్టగా, సభ్యులంతా ఏకగ్రీవంగా ఆమోదించారు. ఈ తీర్మాన ప్రతులను కేంద్ర ప్రభుత్వానికి పంపనున్నట్లు జడ్పీచైర్పర్సన్ మంజుశ్రీజైపాల్రెడ్డి తెలిపారు.
నారాయణఖేడ్ అభివృద్ధికి నిధులు
మునుపెన్నడూ లేనివిధంగా నారాయణఖేడ్ నియోజకవర్గాన్ని అభివృద్ధి చేసినట్లు మంత్రి హరీశ్రావు జెడ్పీ సమావేశంలో తెలిపారు. గతంలో జడ్పీ సమావేశాల్లో ఎమ్మెల్యే కిష్టారెడ్డి సహా ఇతర నాయకులు నారాయణఖేడ్ వెనకబడిందని పదేపదే చెప్పేవారన్నారు. సీఎం కేసీఆర్ నారాయణఖేడ్ నియోజకవర్గానికి పెద్దఎత్తు నిధులు ఇచ్చి అభివృద్ధి చేసినట్లు చెప్పారు. గ్రామాలు, తండాలకు రోడ్లు వేయటంతోపాటు తాగునీటి సమస్యను పరిష్కరించినట్లు చెప్పారు. బసవేశ్వర ఎత్తిపోతల పథకం ద్వారా నారాయణఖేడ్కు సాగునీరు ఇవ్వనున్నట్లు చెప్పారు. 5 గురుకుల పాఠశాలలు మంజూరు చేశామన్నారు. ఇటీవలే ప్రభుత్వం ఒక్కో గురుకుల పాఠశాల భవన నిర్మాణానికి రూ.5 కోట్ల చొప్పున నిధులు కేటాయించినట్లు చెప్పారు. వంద పడకల దవాఖాన ఏర్పాటు చేసినట్లు తెలిపారు. జడ్పీటీసీలు రాజునాయక్, నర్సింహ్మారెడ్డిలు మాట్లాడుతూ నారాయణఖేడ్ అభివృద్ధికి ఎమ్మెల్యే భూపాల్రెడ్డి చిత్తశుద్ధితో పనిచేస్తున్నారని, సహకరిస్తున్న మంత్రి హరీశ్రావు ధన్యవాదాలు తెలిపారు. సమావేశంలో జడ్పీటీసీలు, ఎంపీపీలు, జిల్లా అధికారులు పాల్గొన్నారు.