సరస్వతీ నమస్తుభ్యం వరదే కామరూపిణీ.. విద్యారంభం కరిష్యామి సిద్ధిర్భవతు మే సదా.. సరస్వతీ నమస్తుభ్యం సర్వదేవీ నమోనమః… మాఘ పంచమి నాడు శ్రీపంచమి, వసంత పంచమి పేరిట సరస్వతీ దేవీని ఆరాధించారు. సర్వ విద్యలకు ఆధారం వాగ్దేవి. చిన్నాపెద్దా తేడా లేకుండా పుస్తకాలు, కలాలు అమ్మవారి వద్ద పెట్టి బుధవారం పూజించారు. సంగీత, నృత్య సాహిత్యాలకూ సరస్వతీ దేవీయే మూలం కావున ఈ దేవీని నృత్యకేళీ విలాసాలతో స్తుతించారు.
శిశుమందిరాలు, పాఠశా లలు, దేవాలయాల్లో చిన్నారులకు సామూహిక అక్షరాభ్యాసం నిర్వహించారు. ఆలయాల్లో సరస్వతీ హోమాలు నిర్వహించారు. సరస్వతీ దేవి ఆలయాలను సర్వాంగ సుందరంగా ముస్తాబు చేశారు. సుప్రభాత సేవ, వేదపారాయణం, మహా సరస్వతీ పుష్పార్చన, పంచామృత రుద్రాభిషేకాలు, గణపతి పూజ, పుణ్యాహవచనం, రక్షాబంధనం, అఖండ దీప ప్రజ్వలన, సహస్రనామ కుంకుమార్చనలు నిర్వహించారు. అనంతరం అన్ని ఆలయాల్లో అన్నదానాలు చేశారు.