పటాన్చెరు, జూలై 10 : కాలుష్యంతో కొట్టుమిట్టాడుతున్న పటాన్చెరు ప్రాంతానికి శుద్ధమైన తాగునీటికి తిప్పలు తప్పేలా లేవు. ఇంటింటికీ శుద్ధమైన తాగునీరు అందించేందుకు ఇటీవల ప్రభుత్వ ఆదేశాల మేరకు చేపట్టిన మిషన్ భగీరథ సర్వేను పంచాయతీ కార్యదర్శులు తూతూమంత్రంగా చేపట్టారు. కొత్తగా వెలిసిన కాలనీలు, పెరిగిన జనాభా వివరాలను సర్వేలో పొందుపర్చలేదు.
దీంతో సరిపడా మిషన్ భగీరథ నీటి కేటాయింపులు జరగక ఈ ప్రాంత ప్రజలకు నష్టం జరిగే అవకాశం ఉంది. పటాన్చెరు, అమీన్ఫూర్ మండలాల్లో ఐదేండ్లలో పదుల సంఖ్యలో కొత్తగా కాలనీలు వెలిశాయి.రికార్డుల్లో నమోదైన ఇండ్లలో మాత్రమే సిబ్బంది సర్వే చేపట్టారని సమాచారం.కొత్త కాలనీల్లో, రికార్డుల్లో లేని ఇండ్లలో సర్వే చేపట్టలేదనే ఆరోపలు ఉన్నాయి. పటాన్చెరు, అమీన్ఫూర్ మండలాల్లో పెరుగుతున్న జనాభాకు సరిపోను తాగునీరు రావడం లేదు. ఇప్పుడు ఈ సర్వే ద్వారా సరిపడా తాగునీరు అందుతుందా..? అంటే అది ప్రశ్నార్థకంగానే మారింది.
పటాన్చెరు మండలం చిట్కుల్ గ్రామంలో 25 వేల జనాభా ఉంది. పంచాయతీ సర్వే సిబ్బంది 3573 ఇండ్లలో సర్వే నిర్వహించారు. పెండింగ్ ఇండ్లు లేవని తెలిపారు. పరిశీలిస్తే ఈ గ్రామంలో పది కాలనీల కొత్తగా వెలిశాయి. ఆ కాలనీల్లో సర్వే చేయలేదనే ఆరోపణలు ఉన్నాయి. ఇంకా సర్వే చేయాల్సిన ఇండ్లు అధికంగా ఉన్నాయని కాలనీవాసులు, నాయకులు చెబుతున్నారు. చిట్కుల్ గ్రామానికి ఇప్పుడు రోజుకు 9.50 లక్షల లీటర్ల తాగునీరు ఇస్తున్నామని మిషన్ భగీరథ గ్రిడ్ లెక్కలు చెబుతున్నాయి.
ఈ సర్వే లెక్కల ప్రకారం 15వేల జనాభాకు సరిపోనుగా 15లక్షల లీటర్ల నీరు కేటాయింపు జరిగే అవకాశం ఉంది. దాదాపు మరో పదివేల మందికి తాగునీరు లభించకపోవచ్చు. పారిశ్రామికవాడలో 1996 నుంచి పర్యావరణవేత్తలు న్యాయపోరాటం ప్రారంభించారు. గ్రీన్ ట్రిబ్యునల్ కాలుష్య పీడిత గ్రామాల లిస్టులో, భూగర్భ జలాలు పాడైన గ్రామాల్లో చిట్కుల్ ఉంది. రిట్ పిటిషన్ నెంబర్ 3158/1996 ఏపీ హైకోర్టు, అప్లికేషన్ నెంబర్ 69, 2013ను పరిగణలోకి తీసుకుని సుధీర్ఘకాలం విచారించిన చెన్నై గ్రీన్ ట్రిబ్యునల్ ఉచితంగా తాగునీరు అందరికీ ఇవ్వాలని ఆదేశించింది.
ఈ మధ్యలో 2017 నుంచి మిషన్ భగీరథ ద్వారా అన్ని ఇండ్లకు తాగునీరు పథకం ప్రారంభించారు. గత ఐదేండ్లలో చిట్కుల్ గ్రా మం శరవేగంగా అభివృద్ధి చెందింది. కొత్త కాలనీలు వెలిశాయి. ఆ కాలనీల్లోను సర్వే నిర్వహిస్తే మరో పదివేల మందికి ఉచితంగా తాగునీరు లభిస్తుంది. నల్గగొండ జిల్లాకు ఫ్లోరైడ్ ఎలా శాపమో.? పటాన్చెరు ఇండస్ట్ట్రియల్ ఏరియాకు భూగర్భ జల కాలుష్యం శాపం. కాలుష్యంతో వారం క్రితం చిట్కుల్ గ్రామ పెద్ద చెరువులో 10 టన్నుల చేపలు మృతిచెందాయి. పంచాయతీ సిబ్బంది చేస్తున్న తూతూమంత్రపు సర్వేలతో ఈ గ్రామానికి తక్కువ కనెక్షన్లు, నీరు లభించి నష్టం జరిగే అవకాశం ఉంది.
పటాన్చెరు, సంగారెడ్డి మండలాల నుంచి 20 గ్రామాలు బ్యాతోల్, ఆరుట్ల, చిద్రుప్ప, ఇస్మాయిల్ఖాన్పేట్, గండిగూడెం, సుల్తాన్పూర్, ఖాజీపల్లి, కిష్టారెడ్డిపేట్, ఐనోల్, పెద్దకంజర్ల, పటాన్చెరు, లక్డారం, ముత్తంగి, 14 ఇస్నాపూర్, కంది, రుద్రారం, రామచంద్రాపురం,కలబ్గూర్, చిట్కుల్, పోచారాన్ని గ్రీన్ ట్రిబ్యునల్ కలుషిత గ్రామాలుగా గుర్తించి ఈ ప్రాం తంలో కాలుష్యాన్ని తగ్గించడంతో పాటు ఉచితంగా తాగునీరు అందజేయాలనే ఆదేశించింది. నల్లాలు రానిరోజు ట్యాంకర్లతోను నీటి సరఫరా చేయాలని ఆదేశాలు ఇచ్చింది. ఆ ఆదేశాల సరిగ్గా అమలు కావడం లేదనే ఆరోపణలు ఉన్నాయి. ఇప్పుడు తూతూమంత్రంగా చేపట్టిన మిషన్ భగీరథ సర్వేతో తాగునీటికి మరిన్ని ఇబ్బందులు ఎదురయ్యే అవకాశం ఉంది.
పారిశ్రామిక కాలుష్యంతో సతమతమవుతున్న గ్రామాలు హైదరాబాద్ శివారులో ఉండడంతో రోజురోజుకు జనంతో నిండిపోతున్నాయి. పదేండ్ల కాలంలో మేజర్ పంచాయతీల జనాభా రెండు నుంచి మూడు రెట్లు పెరిగింది. ఔటర్ రింగ్రోడ్డు ఏర్పాటుతో ఐటీ, ఉద్యోగులు, కార్మికులు, వ్యాపారులు రింగ్రోడ్డుకు దగ్గరున్న పంచాయతీల్లో వెలుస్తున్న కాలనీల్లో, అపార్టుమెంట్లలో నివసిస్తున్నారు.
పంచాయతీలు తాగునీటి వాటా పెంచాలని కోరినా, మిషన్ భగీరథ గ్రిడ్ అధికారులు 2011 జనాభా లెక్కల ప్రకారమే ఇస్తామని పట్టుబడుతున్నారు. 2021లో ఇక్కడ జనగణన జరగకపోవడం శాపంగా మారింది. గ్రీన్ ట్రిబ్యునల్ కాలుష్య పీడిత గ్రామాలుగా గుర్తించిన గ్రామాలను పరిశీలిస్తే 2011లో 8276 జనాభా కల్గిన ఇస్నాపూర్లో ఇప్పుడు 35వేల జనాభా నివసిస్తున్నది. ముత్తంగి గ్రామంలో 3601 ఉండగా, దత్తాత్రేయనగర్లో 5176 జనాభా ఉండేది. ఇప్పుడు ముత్తంగిలో 30వేల జనా భా వరకు ఉంది. చిట్కుల్లో అప్పుడు 5,549 జనాభాగా గుర్తిస్తే.. ఇప్పుడు 25వేల వరకు జనాభా పెరిగింది.
ఇంద్రేశం, పాటి, నందిగామ, భానూర్, పెద్ద కంజర్ల, రుద్రారం, పోచారం, అమీన్ఫూర్ మండలంలో కిష్టారెడ్డిపేట్, పటేల్గూడ, సుల్తాన్పూర్, దాయర గ్రామాల్లోను జనాభా పదేండ్లలో రెట్టింపు అయ్యింది. వీటిలో అధికశాతం కాలుష్య పీడిత గ్రామాలే కావడంతో సమస్య తీవ్రంగా ఉంది. ఈ ప్రాం తంలోని భూగర్భ జలాలను బోర్లద్వారా తోడుకుని ప్రజలు వినియోగిస్తున్నారు. ఇవి అత్యంత కలుషితమైనవి, ఆరోగ్యానికి ప్రమాదం కూడా, ఇప్పటికీ పలు పంచాయతీలు ఇవే బోరు నీటిని మిషన్ భగీరథ నీటిలో కలిపి సరఫరా చేస్తున్నాయి.
మిషన్ భగీరథ గ్రిడ్ నుంచి సరఫరా అస్తవ్యస్తంగా మారడంతో పలు కాలనీలకు వారంలో ఒక్కరోజు మాత్రమే తాగునీరు అందిస్తున్నారు. పటాన్చెరు, అమీన్ఫూర్, జిన్నారం మండలాల్లో గ్రామాల్లో కాలుష్యంతో సతమతమవుతున్న అన్ని ఇండ్లకు తాగునీరు అందజేయాల్సిన బాధ్యత పంచాయతీలు, మిషన్ భగీరథ అధికారులపై ఉంది. ఆ మేరకు జిల్లా అధికారులు చర్యలు తీసుకోవాలని గ్రామస్తులు, కాలనీవాసులు కోరుతున్నారు.
చిట్కుల్ గ్రామంలో ప్రత్యేకాధికారుల పాలన వచ్చిన తర్వాత వారంలో ఒకరోజు కూడా సరిగ్గా తాగునీరు రావడం లేదు. గ్రామంలో పదేండ్లకు ముందు నేను సర్పంచ్గా పనిచేశాను. ఆ సమయంలోనే చిట్కుల్లో 4వేల ఇండ్లున్నాయి. ఇప్పుడు దాదాపు 6వేల ఇండ్లున్నాయి. 25వేల జనాభా గ్రామ పరిధిలో ఉంది. మిషన్ భగీరథ సర్వేలో 3500 ఇండ్లు ఉన్నాయని పంచాయితీ రిపోర్టు ఇస్తే గ్రామానికి వచ్చే నీరు సరిపోవు. గ్రామంలో చాలా కాలనీల్లో సర్వే నిర్వహించలేదు. ప్రతి ఇంటినీ లెక్కించి నీటిని ఇవ్వాలి. గ్రామంలో నూతనంగా ఇప్పుడు వేయి ఇండ్లు నిర్మాణంలో ఉన్నాయి. 30వేల జనాభా అంచనాతో నీటి వనరులు సమకూర్చుకోవాలి. ముత్తంగి చర్చి ముందు నుంచి గ్రామానికి పైప్లైన్ ద్వారా నీరందుతున్నది. దీనివల్ల గ్రావిటీ విఫలమవుతున్నది. మిషన్ భగీరథ అధికారులు పంకజ్ హోటల్ వద్ద నుంచి పైప్లైన్ వేస్తేనే గ్రావిటీ ద్వారా నీరివ్వవచ్చు.
-ఎస్.రవీందర్, మాజీ సర్పంచ్ చిట్కుల్ గ్రామం
కాలుష్య గ్రామాలను ఉచితంగా నీరివ్వాలని గ్రీన్ ట్రిబ్యునల్ ఆదేశించింది. ఆ ఆదేశాలను అధికారు లు అమలు చేయాలి. చెరువులు, జలవనరులన్నీ కలుషితమైన పటాన్చెరు ప్రాం తంలో తాగునీరు లభించకుంటే ఆరోగ్య సమస్యలు తలెత్తుతాయి. ఇటీవల చిట్కుల్ చెరువులో భారీగా చేపలు చనిపోవడం కాలుష్య తీవ్రతను తెలియజేస్తున్నది. అందరికీ సురక్షిత తాగునీరివ్వడం ప్రభుత్వం బాధ్యత. ప్రభుత్వం తక్ష ణం సమర్థవంతమైన చర్యలు తీసుకోవాలి.
-శిల్ప, పర్యావరణవేత్త