కోహీర్, జూన్ 25: సంగారెడ్డి జిల్లా జహీరాబాద్ మండలంలోని హుగ్గెల్లి రైతు వేదికలో మంగళవారం వీడియో కాన్ఫరెన్స్ నిర్వహించారు. డివిజన్ వ్యవసాయాధికారి భిక్షపతి, జహీరాబాద్ నియోజకవర్గంలోని ఆయా మండలాల వ్యవసాయాధికారులు ప్రవీణ, లావణ్య, వినోద్కుమార్, నవీన్కుమార్, ఏఈవోలు ప్రదీప్కుమార్, వీరేందర్, శ్రీనివాస్, సంధ్య, రేణుక, వేదవతి, మౌనికవర్మ, పలు గ్రామాల రైతులు పాల్గొన్నారు. వ్యవసాయ శాఖ మంత్రి తుమ్మల నాగేశ్వర్రావు వీడియో కాన్ఫరెన్స్లో రైతు భరోసాపై అభిప్రాయాలు సేకరించారు.
కోహీర్, జూన్ 25: పంటలు పండించే రైతులందరికీ రైతు భరోసా ఇవ్వాలి. రైతుల వద్ద కార్లు ఉన్నాయా.? వాళ్లు ఆదాయపు పన్ను చెల్లిస్తున్నారా.? అని చూడకూడదు. పొలాల్లో కష్టపడి పనిచేసే రైతులందరికీ రైతు భరోసా వర్తింపజేయాలి. పెద్ద పెద్ద వెంచర్లు ఉన్న యజమానులు, స్విమ్మింగ్ పూల్స్ ఉండే వారికి అవసరం లేదు. నిజమైన రైతులకు మాత్రమే రైతు భరోసా అందజేయాలి.
సిర్గాపూర్, జూన్ 25: ప్రభుత్వం 15 ఎకరాల వరకు రైతుభరోసా ఇవ్వాలి. నారాయణఖేడ్ ప్రాంతంలో పెద్ద ప్రాజెక్టులు, పంట కాల్వలు పెద్దగా లేవు. కేవలం ఇక్కడి రైతులు వర్షాధారిత పంటలపైనే ఆధారపడి ఉన్నారు. గతంలో మాదిరిగా గట్లు, చెట్లు, సాగు లేని భూములకు రైతు భరోసా ఇవ్వకుండా త్వరగా పంట పెట్టుబడి సాయం అందించాలి. రైతులకు ఏకకాలంలోనే రుణమాఫీ చేయాలి. రైతు బీమా కోసం వయస్సు పరిమితిని తొలిగించాలి. పంటల సర్వే ప్రక్రియలో ఏఈవోతోపాటు గ్రామ ఆదర్శ రైతులు పాల్గొనాలి. ఎరువులు, సబ్సిడీ, రాయితీ వ్యవసాయ పరికరాలు సకాలంలో అందించాలి. ఇక్కడి ప్రాంతంలో అధికంగా పండిం చే డొడ్డు వడ్లకు రూ.500 బోనస్ ఇవ్వాలి. బీఆర్ఎస్ ప్రభుత్వం మంజూరు చేసిన సంగమేశ్వర, బసవేశ్వర ఎత్తిపోతల పథకాన్ని ప్రభుత్వం పునరుద్ధరించి ఈ ప్రాంతాన్ని సస్యశ్యామలం చేయాలి.
బీఆర్ఎస్ ప్రభుత్వం ఇచ్చిన విధంగా రైతుభరోసా ఇవ్వాలి. ఆలస్యం చేయకుండా సమయానికి రైతులకు పెట్టుబడి సాయం అందిస్తే ఎంతో లాభం ఉంటుంది. ఎంత భూమి ఉన్నా, పది ఎకరాల వరకు రైతుభరోసా ఇవ్వాలి. పంట సాగుకు ముందే ఇస్తే రైతులకు కొంత ఊరటగా ఉంటుంది. విత్తనాలు, ఎరువులు ముందే తెచ్చుకునేందుకు వీలుగా పెట్టుబడి పైసలు వేస్తే బాగుంటుంది.
నాకు ఐదు ఎకరాల భూమి ఉంది. ఎంత భూమి ఉన్నా పది ఎకరాల వరకు రైతుభరోసా ఇవ్వాలి. అధికారులకు కూడా మేము ఇదే విషయాన్ని చెప్పాం. కుద్దుగా సాగు చేసే భూమికి పెట్టుబడి ఇస్తే బాగుంటుంది. అది కూడా పంట సాగు చేసే ముందే ఇవ్వాలని ప్రభుత్వాన్ని కోరుతున్నా.
రాష్ట్రంలో ఉన్న రైతులందరికీ ప్రభుత్వం ఆర్థిక భరోసా అందించాలి. రైతు లు ఇప్పటికే పొలాల్లో పం టలు వేసుకునేటోళ్లు. వర్షా లు కురవకపోవడంతోనే పంటలు వేసుకోలేదు. అంతేకాకుండా ప్రభుత్వం రైతు భరోసాఇవ్వకపోవడంతో కొంతమంది రైతులు చేతుల్లో డబ్బుల్లేక పంటలు వేయలేకపోయారు.
రైతులు పండించిన ప్రతి పంటకూ బోనస్ ఇస్తే రైతు భరోసా లేకున్నా ఏం లేదు. ఎందుకంటే రైతు భరోసా పేరుతో సాగు కానీ భూములకు కూడా ప్రభుత్వం డబ్బులు చెల్లించాల్సి వస్తోంది. దీని వల్ల కౌలు రైతులకు గానీ, సాధారణ రైతులకు గానీ మేలు జరగడం లేదు. ఎకర భూమిలో 25క్వింటాళ్ల వడ్లు పండుతయ్. ఒక్కో క్వింటాల్కు రూ.500 బోనస్ ఇస్తే ఆ రైతుకు పంటకు రూ.12,500 అదనంగా లాభం చేకూరుతుంది. రెండు పంటల కింద ఏడాదికి రూ.25వేలు వస్తాయి. రైతు భరోసా కింద ఎకరానికి కేవలం రూ.7,500 మాత్రమే ఇస్తున్నారు. ప్రభుత్వం ఆ దిశగా ఆలోచించాలి. కౌలు రైతులకు కూడా లాభం అవుతుంది. కష్టపడి పంటలు పండించే రైతుకు మాత్రమే లాభం చేకూర్చి ఇంకా ఉత్సాహంతో అధిక దిగుబడులు సాధించేలా ప్రోత్సహించాలంటే ప్రతి పంటకూ బోనస్ ఇవ్వాలి.
రైతులకు కావాల్సిన వ్యవసాయ పనిముట్లను సబ్సిడీపై అందజేయాలి. పది ఎకరాల లోపు భూమి కలిగిన రైతులకు రైతు భరోసా రూ.15వేలు ఇవ్వడంతోపాటు ప్రభుత్వం ప్రకటించినట్లుగా బోనస్ ఇస్తూ సబ్సిడీ పనిముట్లు ఇచ్చినట్లయితే రైతులకు ఎంతో మేలు జరుగుతుంది. పంటల బీమా పక్కాగా అమలు చేయాలి. వ్యవసాయానికి పనికిరాని భూములకు కూడా రైతు భరోసా ఇస్తే డబ్బులు వృథాకావడంతోపాటు సబ్సిడీపై వ్యవసాయ యంత్రాలు ఇచ్చే అవకాశం ఉండదు. సాగునీటి ఎద్దడి కారణంగా ఎండిపోయిన పంటలకు ప్రభుత్వం ఇప్పటివరకు పరిహారం ఇవ్వలేదు. ఇప్పటికైనా పరిహారం నిధులు మంజూరు చేయాలి. కౌలు రైతులను గుర్తించి వారికి కూడా రైతుభరోసా అందేలా చర్యలు తీసుకోవాలి. పంటల సాగులో మెళకువలు వివరించేలా సదస్సులు ఏర్పాటు చేయాలి. విత్తనాల ఎంపిక తదితర అంశాలపై ఎప్పటికప్పుడు సమాచారం ఇస్తే బాగుంటుంది.
గుమ్మడిదల, జూన్ 25: వానకాలం సీజన్ ప్రారంభమై నెల రోజులవుతున్నా పెట్టుబడి సాయం జాడలేదని రైతులు ఆగ్రహం వ్యక్తం చేస్తున్నారు. గతంలో బీఆర్ఎస్ సర్కారు సీజన్ ప్రారంభంకాగానే రైతుబంధు సాయం ఇచ్చేది. ఇప్పుడు రైతుభరోసా అని కాంగ్రెస్ సర్కారు ఎకరాకు రూ.15 వేలు సాయం అందిస్తామని చెప్పి కొర్రీలు పెడుతుంది. దీనికి రైతుల అభిప్రాయాలు సేకరిస్తున్నారు. నియోజకవర్గంలో ఒక రైతువేదికలో రైతులకు ఎలాంటి సమాచారం ఇవ్వకుండా వీడియో కాన్ఫరెన్స్ ఏర్పాటు చేయడం సరికాదు. ప్రతి మండలంలో వీడియో కాన్ఫరెన్స్ ఏర్పాటు చేసి రైతులకు ముందస్తు సమాచారం ఇవ్వాలి. కానీ ఏదిలేకుండా వీడియో కాన్ఫరెన్స్ ఏర్పాటు చేయడం రైతులను అవమానపర్చడమే. ప్రభుత్వం ఇస్తానన్న రైతుభరోసా షరతులు లేకుండా అర్హులైన రైతులకు ఇవ్వాలి. కౌలు రైతులకు కూడా ఇస్తామని ఎన్నికల్లో చెప్పినప్పటికీ ఇప్పటికీ ఒక కౌలు రైతుకు కూడా ఇవ్వలేదు. ఎద్దు ఏడ్చిన ఎవుసం, రైతు ఏడ్చిన రాజ్యం నిలబడదని గుర్తుంచుకోవాలి. రైతు భరోసా త్వరగా ఇవ్వాలి. లేదంటే సర్కారు రైతుల ఆగ్రహం చవి చూడాల్సి వస్తది.