మునిపల్లి, జూన్ 5: కంకోల్ శివారులోని వోక్సెన్ యూనివర్సిటీలో గార్డెన్గా విధులు నిర్వహిస్తూ ఓ వ్యక్తి అదృశ్యమైన ఘటన ఆలస్యంగా వెలుగులోకి వచ్చింది. వివరాల్లోకి వెళితే…కంకోల్ గ్రామానికి చెందిన సంగమేశ్వర్ నాలుగేండ్లుగా యూనివర్సిటీలో గార్డెన్గా విధులు నిర్వహిస్తున్నాడు. ఈనెల 2న విధులకు వెళ్లి ఇప్పటివరకు ఇంటికి రాకపోవడంతో సంగమేశ్వర్ భార్య వోక్సెన్ యూనివర్సిటీకి వెళ్లింది. సెక్యూరిటీ సిబ్బంది రానివ్వలేదు. దీంతో బుధేరా పోలీస్స్టేషన్లో ఫిర్యాదు చేసింది. దిక్కుతోచని పరిస్థితిలో సంగమేశ్వర్ భార్య కుటుంబసభ్యులతో కలిసి మంగళవారం వోక్సెన్ యూనివర్సిటీ వద్దకు వెళ్లి ఆరా తీయగా యాజమాన్యం పొంతనలేని సమాధానాలు ఇచ్చింది. దీంతో ఆమె స్థానికులు, కుటుం బ సభ్యుల సహకారంతో బుధవారం యూనివర్సిటీని ముట్టడించినా యాజమాన్యం స్పందించలేదు. దీంతో యూనివర్సిటీలో కెళ్లి డైరెక్టర్పై దాడి చేయడంతోపాటు జాతీయ రహదారిపై నిరసన వ్యక్తం చేశారు.
యూనివర్సిటీ సిబ్బంది పోలీసులకు సమాచారం అందించడంతో ఘటనాస్థలానికి చేరుకొని వివరాలు సేకరించారు. అనంతరం యూనివర్సిటీ డైరెక్టర్లతో మాట్లాడి సీసీ కెమెరాలు తనిఖీ చేశారు. ఈ సందర్భంగా సంగమేశ్వర్ భార్య జ్యోతి విలేకరులతో మాట్లాడుతూ తన భర్త నాలుగు రోజుల నుంచి ఇంటికి రాలేదని యూనివర్సిటీకి వస్తే కనీసం గేట్ కూడా దాటనివ్వడం లేదని ఆవేదన వ్యక్తం చేశారు. బతికి ఉంటే తన భర్తను చూపించండి.. చనిపోతే శవాన్ని అప్పగించండి అంటూ జ్యోతి కంటతడి పెట్టారు. సంగమేశ్వర్ ఘటనపై సంగారెడ్డి ఏఎస్సీ సంజీవరావు, డీఎస్పీ సతయ్యగౌడ్ కంకోల్ శివారులోని వోక్సెన్ యూనివర్సిటీకి చేరుకొని వివరాలు సేకరించారు. ఈ సందర్భంగా ఏఎస్సీ మా ట్లాడుతూ సంగమేశ్వర్ కనిపించడం లేదంటూ బుధేరా పోలీస్ స్టేషన్లో ఆయన భార్య ఫిర్యాదు చేసినట్లు తెలిపారు. సంగమేశ్వర్ ఆచూకీ కోసం వెతుకుతున్నట్లు తెలిపారు. అనంతరం సంగమేశ్వర్ కుటుంబ సభ్యులకు, బం ధువులకు భరోసా ఇచ్చారు.