సంగారెడ్డి కలెక్టరేట్, మే 15 : జిల్లాలోని అన్ని ఆరోగ్య కేంద్రాల్లో జన్ ఆరోగ్య సమితీలను ఏర్పాటు చేయాలని కలెక్టర్ డాక్టర్ శరత్ సంబంధిత వైద్య ఆరోగ్య శాఖ అధికారులను ఆదేశించారు. సోమవారం కలెక్టరేట్లోని మినీ సమావేశ మందిరంలో ఏర్పాటు చేసిన సమావేశంలో కలెక్టర్ మాట్లాడారు. ఈ వారంలోగా అన్ని సబ్ హెల్త్ సెంటర్లు, హెచ్సీలు, యూపీహెచ్సీలలో జన్ ఆరోగ్య సమితీలను ఏర్పాటు చేయాలన్నారు. జిల్లాలోని 173 సబ్ హెల్త్ సెంటర్లు, 26 హెచ్సీలు, 4 యూపీహెచ్సీల్లో జన్ ఆరోగ్య సమితీల ఏర్పాటుపై దృష్టి సారించాలన్నారు.
జన్ ఆరోగ్య సమితి పాత్ర, బాధ్యతలకు సంబంధించి చార్ట్ను ఆయా ఆరోగ్య కేంద్రాల్లో అందరికి కనిపించేలా ప్రదర్శించాలన్నారు. జన్ ఆరోగ్య సమితి ప్రతినెల మూడో శనివారం సమావేశం నిర్వహించాలన్నారు. ఆ దిశగా అన్ని చర్యలు చేపట్టాలని కలెక్టర్ సూచించారు. ఈ సమావేశంలో జిల్లా వైద్య ఆరోగ్య శాఖ అధికారి డాక్టర్ గాయత్రీదేవి, డీఆర్డీవో శ్రీనివాసరావు, మిషన్ భగీరథ ఈఈ పాషా, వైద్యాధికారులు పాల్గొన్నారు.