గజ్వేల్, జూన్ 17: ఈ ఏడాది వానకాలం సీజన్ ప్రారంభంలో కురిసిన వర్షాలతో రైతులు ముందుగానే పత్తి విత్తనాలు పెట్టారు. భారీగా కురిసిన వర్షాలకు విత్తనాలు పెట్టిన రైతుల్లో ప్రస్తుతం వర్షాలు కురవకపోవడంతో కలవరం మొదలవుతున్నది. సాగు చేసిన పత్తి విత్తనాలు అనుకున్న స్థాయిలో మొలకెత్తక పోవడంతో రైతులు దిగులు పడుతున్నారు. పది రోజులుగా సిద్దిపేట జిల్లాలో వర్షాలు కురవకపోవడంతో పెట్టిన పత్తి విత్తనాలు మొలకెత్తక చాలాచోట్ల రైతులు మొక్కలకు నీళ్లు పోయడంతో పాటు స్ప్రింక్లర్లతో పత్తిని కాపాడుకునే ప్రయత్నం చేస్తున్నారు.
సిద్దిపేట జిల్లాలోని గజ్వేల్, సిద్దిపేట, హుస్నాబాద్ డివిజన్ల పరిధిలో రైతులు వివిధ రకాల పంటలను సుమారుగా 5.50లక్షల ఎకరాల్లో సాగు చేస్తారని అధికారులు అంచనా వేశారు. అయితే ప్రతి ఏడాది జిల్లాలోని రైతులు వర్షాకాలంలో ఎక్కువగా వరిని సాగు చేసేందుకు ఎక్కువగా ఆసక్తిని చూపిస్తారు. ఈసారి కూడా జిల్లాలో 3 లక్షల ఎకరాల్లో వరి, 1.80 లక్షల ఎకరాల్లో పత్తి, 60వేల ఎకరాల్లో మొక్కజొన్న, 10వేల ఎకరాల్లో కందులను సాగు చేస్తారని వ్యవసాయాధికారులు అంచనా వేశారు. గతేడాది రైతులు 1.08 లక్షల ఎకరాల్లో పత్తిని సాగు చేయగా ఈసారి 1.80లక్షల ఎకరాల్లో పత్తిని సాగు చేస్తారని అధికారుల అంచనా వేయగా అంతకుమించి ఎక్కువగా సాగయ్యే అవకాశాలు కనిపిస్తున్నాయి. రైతులు ఎక్కువగా బీటీ-2 పత్తి విత్తనాలనే ఎక్కువగా సాగు చేస్తున్నారు. అందుకు అనుగుణంగా మార్కెట్లో రైతులకు సరిపడా విత్తనాలను అందుబాటులో ఉంచారు. గతేడాది పత్తి క్వింటాలుకు రూ.7020 వరకు ధర పలకడంతో మార్కెట్లో డిమాండ్ ఉన్న బీటీ-2పత్తి విత్తనాలనే ఎక్కువగా రైతులు సాగు చేసేందుకు ఆసక్తిని చూపిస్తున్నారు. అదేవిధంగా సిద్దిపేట జిల్లాలో జిన్నింగ్ మిల్లులు కూడా అధికంగా ఉండడంతో పత్తి పంట ఎక్కువగా సాగయ్యే అవకాశం ఉంది.
సీజన్ ప్రారంభంలో మురిపించిన వర్షాలు ప్రస్తుతం కురువకపోవడంతో విత్తనాలు వేసిన రైతులతో పాటు విత్తనాలు వేసేందుకు సిద్ధంగా ఉన్న రైతులు ఆకాశం వైపు చూస్తున్నారు. ఎప్పుడు వర్షాలు కరుస్తాయేనని రైతుల్లో ఆందోళన వ్యక్తమవుతున్నది. ముందుగా కురిసిన వర్షాలతో పత్తి విత్తనాలు పెట్టిన రైతులు తర్వాత వర్షాలు కురువకపోతాయా అంటూ పత్తి పెట్టగా మొలకలు రాకపోవడంతో దిగులు పడుతున్నారు. అధికారుల అంచనా ప్రకారం సిద్దిపేట జిల్లాలో ఇప్పటికే 60వేల ఎకరాల్లో పత్తిని సాగుచేయగా, అందులో సగం వరకే మొలకలు రావడంతో మిగతావి రాకపోవడంతో రైతులు అంత వాన దేవుడిపై భారాన్ని మోపి ఎదురుచూస్తున్నారు. జిల్లాలో ఈనెలలో సాధారణం కంటే తక్కువగా వర్షాపాతం నమోదైంది. గజ్వేల్ మండల పరిధిలోని బూరుగుపల్లి గ్రామానికి చెందిన పులువురు రైతులు స్ప్రింక్లర్ల్లతో పత్తి గింజలను కాపాడుకునే ప్రయత్నం చేస్తున్నారు. మృగశిర కార్తెలో వర్షాలు ఎక్కువగా కురవకపోవడంతో కప్పతల్లి ఆట ఆడితే సమృద్ధిగా వర్షాలు కురుస్తాయనేది నమ్మకం. జగదేవ్పూర్ మండ లం బీజీ వెంకటాపూర్లో సోమవారం పిల్లలు వర్షాలు కురువాలని కోరుతూ కప్పతల్లి ఆడారు.
పరిస్థితుల్లో స్ప్రింక్లర్లతో పత్తి గింజలకు నీళ్లు పెడుతున్నాం. రెండున్నర ఎకరాల్లో బీటీ పత్తి విత్తనాలు సాగు చేశా. పది రోజులుగా వర్షాలు కురవకపోవడంతో పెట్టిన పత్తి విత్తనాలను కాపాడుకునేందుకు స్పింక్లర్లతో రెండు రోజులుగా నీళ్లు పెడుతున్నాం. మృగశిర కార్తెలో వర్షాలు కురుస్తాయనుకుంటే ఇప్పటికీ కురువకపోవడంతో పెట్టిన పత్తి విత్తనాలు మొలకలు రావని బోరుతో నీళ్లు పెడుతున్న. నాతోపాటు పక్కనే ఉన్న వెంకట్రామిరెడ్డి కూడా స్ప్రింక్లర్లతోనే నీళ్లు పెడుతుండు. వర్షాలు అనుకున్న స్థాయిలో కురువకపోవడంతో కష్టపడి సాగుచేసిన పత్తి పంటను ఎలాగైనా కాపాడుకోవాలే. ఇప్పుడే వర్షాలు ఇలా ఉంటే మునుముందు ఎలా ఉంటాయో?.