సంగారెడ్డి, జూన్ 8: కోర్టుల్లో కేసులు వేసి ఆర్థిక ఇబ్బందులకు గురయ్యే కక్షిదారులకు సత్వర న్యాయం అందించేందుకు జాతీయ లోక్ అదాలత్లు ఉపయోగపడుతాయని సంగారెడ్డి జిల్లా ప్రధాన న్యాయమూర్తి భవానీచంద్ర అన్నారు. శనివారం సంగారెడ్డిలోని జిల్లా కోర్టు ఆవరణలో లోక్ అదాలత్ను జిల్లా ప్రధానన్యాయమూర్తి భవానీచంద్ర జ్యోతి వెలిగించి ప్రారంభించారు. లోక్ అదాలత్లను జాతీయ న్యాయ సేవాధికార సంస్థ, రాష్ట్ర న్యాయ సేవాధికార సంస్థ ఆదేశాలతో జిల్లా న్యాయ సేవాధికార సంస్థ చైర్మన్, జిల్లా ప్రధాన న్యాయమూర్తి భవానీచంద్ర అధ్యక్షతన జిల్లా న్యాయ సేవాధికార సంస్థ కార్యదర్శి రమేశ్ నిర్వహించారు.
మోటరు వాహన ప్రమాదాల నిర్వాసితులకు పరిహారం చెక్కులు, విడాకులకు కోర్టును ఆశ్రయించిన మూడు జంటలను కలిపి లోక్ అదాలత్లతో రాజీ చేసుకుంటే ఫలితం దక్కుంతుందని న్యాయమూర్తి కక్షిదారులకు సూచించారు. జిల్లాలో సంగారెడ్డి-5, జహీరాబాద్-2, జోగిపేట్-1, నారాయణఖేడ్-1 కోర్టుల్లో 9 లోక్ అదాలత్ బెంచీలు ఏర్పాటు చేశారు. కక్షిదారులు న్యాయవాదులను కలిసి రాజీతో కేసులు పరిష్కరించుకోవడం సంతోషకరమన్నారు.
సత్వర న్యాయానికి లోక్ అదాలత్లు ఉపయోగకరమని న్యాయమూర్తి భవానీచంద్ర అన్నారు. న్యాయవాదుల సలహాలు పాటించి న్యాయం పొందాలన్నారు. లోక్ అదాలత్లలో 3,059 కేసులను పరిష్కరించి, బాధితులకు 15.80కోట్లకు పైగా పరిహారం అందించామన్నారు. ఇందులో మోటరు వాహన ప్రమాద నష్టపరిహారం-19 కేసులు, క్రిమినల్ కాంపౌండ్ కేసులు-2,832, సివిల్ తగాదాలు-8, బ్యాంక్ రికవరీ కేసులు-48, ఏపీటీఎస్-6 కేసులు, భూసేకరణ కేసులు-7, విద్యుత్ చౌర్యం, ప్రిలిటిగేషన్-143 కేసుల్లో బాధితులకు రూ.15,80,62,286కోట్ల పరిహారం ఇప్పించామన్నారు. అదాలత్ల్లో ఇరు పార్టీలకూ సమన్యాయం చేసేందుకు కక్షిదారులు, న్యాయవాదులు, కోర్టు విధులు నిర్వహించే పోలీసులు సమన్వయం చేసుకోవడం సంతోషకరమన్నారు.
ముఖ్యంగా విడాకులకు కోర్టులో కేసుల వేసిన దంపతులు ఒక్కటి కావడం ఆనందంగా ఉందని, వీరిని ఆదర్శంగా తీసుకుని కోర్టుల చుట్టూ తిరుగుతున్న దంపతులు న్యాయం పొంది సంసారాన్ని చక్కదిద్దుకోవాలని ఆకాంక్షించారు. జాతీయ లోక్ అదాలత్లో మొదటి అదనపు న్యాయమూర్తి జయంతి, రెండో అదనపు జడ్జి కృష్ణార్జున, మూడో అదనపు జడ్జి సునీతారవీంద్రారెడ్డి, నాలుగో అదనపు జిల్లా జడ్జి లావణ్య, సీనియర్ సివిల్ న్యాయమూర్తి రాధాకృష్ణాచౌహాన్, ప్రిన్సిపల్ జూనియర్ సివిల్ జడ్జి లక్ష్మణాచారి, తేజశ్రీ, బార్ అసోసియేషన్ అధ్యక్షుడు విష్ణువర్ధన్రెడ్డి, ప్రభుత్వం తరఫు న్యాయవాది నర్సింగ్రావు, సీనియర్ న్యాయవాదులు, కక్షిదారులు, సిబ్బంది పాల్గొన్నారు.