మహబూబ్నగర్, డిసెంబర్ 31 (నమస్తే తెలంగాణ ప్రతినిధి) : రాష్ట్ర ప్రభుత్వం వ్యవసాయానికి ఉచిత విద్యుత్ ఇస్తుండడంతో ఉమ్మడి మహబూబ్నగర్ జిల్లాలో సాగు పండుగలా మారింది. ఐదేండ్లుగా వర్షాలు సమృద్ధిగా కురవడంతో భూగర్భజలాలు పెరిగాయి. బోరుబావుల కింద రైతులు పెద్ద ఎత్తున సాగు చేస్తున్నారు. దీంతో ఉమ్మడి జిల్లాలో ఈ ఏడాది ఏకంగా 16 లక్షల ఎకరాల్లో రికార్డు స్థాయిలో పంటలు పండిస్తున్నారు. ఈ క్రమంలో పాలమూరు ధాన్యాగారంగా మారింది. రైతులు అడిగిన వెంటనే అధికారులు వ్యవసాయ విద్యుత్ కనెక్షన్లు, కరెంట్ ట్రిప్ కాకుండా.. లోడ్ పడకుండా ట్రాన్మ్ఫార్మర్లను కూడా ఇస్తున్నారు. అంతేకాకుండా 2018 జనవరి 1న సీఎం కేసీఆర్ రైతులకు చిరస్మరణీయ కానుకగా ఉచిత విద్యుత్ పథకాన్ని ప్రారంభించారు. దీంతో రైతులు ఆనందంలో మునిగితేలుతున్నారు.
దేశంలో ఎవరూ చేయని సాహసం కేసీఆర్ చేశారని రైతాంగం ఆనందపడుతున్నది. ఈ పథకాన్ని ప్రారంభించి ఆదివారంతో ఆరో ఏడాదిలోకి అడుగుపెడుతున్నది. అంతేకాకుండా శ్రీశైలం ఎడమగట్టు, జూరాల, ఎగువ, దిగువ విద్యుత్ కేంద్రాల్లో ఈసారి రికార్డు స్థాయిలో విద్యుదుత్పత్తి చేశారు. ఒక్క జూరాల జలవిద్యుత్ కేంద్రం నుంచే దాదాపు 4 వేల మిలియన్ మెగావాట్ల విద్యుదుత్పత్తి జరిగింది. డిమాండ్కు తగినట్లుగా విద్యుత్ సరఫరా చేశాయి. అంతేకాకుండా చాలా చోట్ల పెద్దపెద్ద కంపెనీలు సోలార్ పవర్ ప్లాంట్లను నెలకొల్పాయి. దేవరకద్ర నియోజకవర్గం అడ్డాకుల మండలంలోనే దాదాపు 15 ప్లాంట్లు వెలిశాయి. దీని ద్వారా కూడా డిమాండ్కు సరిపడా విద్యుత్ జనరేట్ అవుతున్నది. ఉమ్మడి జిల్లాలోని జలవనరులు, ఇతర వాటిని సద్వినియోగం చేసుకోవడంతో విద్యుత్ కోతలు లేకుండాపోయాయని రైతులు సంబురపడుతున్నారు.
కరెంట్ కోసం గోసపడ్డ కాడి నుంచి..
ఎప్పుడు కరెంట్ వస్తదో అని రాత్రింబవళ్లు జాగారం.. పంటలు ఎండిపోతున్నాయంటూ సబ్స్టేషన్లు ముట్టడి.. కరెంట్ అడిగితే లాఠీలకు పనిచెప్పిన సర్కార్లు.. వ్యవసాయం చేసుడు ఎందుకని భూములను బీళ్లు పెట్టుకొని కన్నీళ్లు దిగమింగిన అన్నదాతలు.. అప్పులు చేసి, పంటలు నష్టపోయి పురుగుల మందులు తాగి ఆత్మహత్యలు చేసుకున్న పరిస్థితి.. ఇదంతా గతం. ఇప్పుడు స్వరాష్ట్రంలో రైతులు బంగారు పంటలు పండిస్తున్నారు. ఉచిత విద్యుత్తో వ్యవసాయంలో విప్లవాత్మక మార్పు వచ్చింది. బోరుబావుల వద్ద బటన్ నొక్కితే చాలు నీళ్లు దుంకుతున్నాయని రైతులు చెబుతున్నారు. అంతేకాకుండా రాష్ట్ర ప్రభుత్వం వ్యవసాయానికి పెట్టుబడి సాయం అందిస్తుండడంతో అదే స్థాయిలో పంటలు పండించి సిరులు కురిపిస్తున్నారు. దీంతో పాలమూరుకు ఉన్న వలసల జిల్లా అనే పేరు తుడిచిపెట్టుకుపోయింది.
వలసలకు ఫుల్స్టాప్..
ఉద్యమ సమయంలో ఎన్నోసార్లు జిల్లాకు వచ్చిన కేసీఆర్ ఇక్కడి పరిస్థితిని చూసి కండ్లళ్ల నీళ్లు పెట్టుకున్నారు. తండాల్లో ఖాళీగా దర్శనమిస్తున్న అనేక ఇండ్లను చూసి చ లించిపోయారు. రేషన్ తెచ్చుకోవాలంటే కూడా కిలోమీటర్ల దూరంలో ఉండే పంచాయతీకి పోయే పరిస్థితిని పల్లెనిద్రలో భాగంగా బాలానగర్ మండలం నేలబండ తండాలో ప్రత్యక్షంగా చూశారు. ఈ క్రమంలో స్వరాష్ట్రం ఏర్పడ్డాక తండాలు గ్రామపంచాయతీలుగా మారాయి. వలసలు వాపస్ రావాలంటే సాగునీరు ఒక్కటే మార్గమని సీఎం కేసీఆర్ తలంచి పెండింగ్ ప్రాజెక్టులను రన్నింగ్లోకి తీసుకొచ్చారు. అలాగే ఉచి త విద్యుత్ పథకానికి శ్రీకారం చుట్టారు. దీంతో గ్రామాల్లోనే చిన్నాచితకా రైతులు వ్యవసాయం చేసుకునే వెసులుబాటు కలగడంతో వలసవెళ్లిన వారు వాపస్ వచ్చారని నివేదికలో వెల్లడైంది. కరెంట్ సరఫరా విషయంలో కూడా ప్రభుత్వం నిక్కచ్ఛిగా వ్యవహరించడంతో మోటార్లు కాలడం లేదు.. బాయికాడ కాపు కాయనక్కర్లేకుండాపోయిందని రైతులు అంటున్నారు.
ఉచిత విద్యుత్తో ఎంతో లాభం..
రైతులకు సీఎం కేసీఆర్ ఉచిత విద్యుత్ ఇస్తుండడంతో ఎంతో ప్రయోజనంగా మారింది. నాకున్న మూడెకరాల్లో వానకాలం పంట కింద వడ్లు పండించిన.. యాసంగికి కూడా వరి సాగు చేస్తున్నా. బోరు మోటారు ఉండడంతో ఎప్పుడు కావాలిస్తే అప్పుడు నీళ్లు చేనుకు వదులుతున్నాం. కాల్వలు, చెరువులు, కుంటల్లో నీళ్లు ఫుల్లుగా ఉండడంతో బోర్లు అడుగంటిపోలేదు. బటన్ నొక్కితే చాలు పొలంలో నీళ్లు దుంకుతున్నాయి. 24 గంటలు కరెంట్ ఉండడంతో రెండు పంటలు ఆనందంగా పండిస్తూ కడుపునిండా తింటున్నాం. ఏ గవర్నమెంట్ రైతుల గురించి ఇంతగా ఆలోచించలేదు. కేసీఆర్ సార్కు దండాలు.
– పి.రాములు, రైతు, గోప్లాపూర్ గ్రామం, భూత్పూర్ మండలం