ఊటూర్, జూలై 10 : మండల కేంద్రంలోని ప్రభుత్వ బాలుర ఉన్నత పాఠశాల తెలుగు మీడియంలో 325 మంది, ఉర్దూ మీడియంలో 109 మంది విద్యార్థులు విద్యనభ్యసిస్తున్నారు. కేసీఆర్ సర్కారులో మన ఊరు-మనబడి కార్యక్రమంలో భాగంగా పాఠశాల పునఃనిర్మాణం కోసం రూ. 1.60 కోట్లు మంజూరు చేసింది. నిజాం కాలంలో నిర్మించిన పురాతన గదులను తొలగించి కొత్తగా గదుల నిర్మాణం కోసం భూమిపూజ చేశారు. కొత్త ప్రభుత్వం ఏర్పడి ఏడు నెలలు గడుస్తున్నా పనులను ప్రారంభించింది లేదు. అధికారుల నిర్లక్ష్యంతో నిర్మాణ పనులు ముందుకు సాగకపోగా విద్యార్థులు ఇరుకు గదులు, వరండాల్లో కూర్చుని విద్యాభ్యాసం చేస్తున్నారు. మరుగుదొడ్లు, మూత్రశాలలు లేక అవస్థలు పడుతున్నారు. మలమూత్ర విసర్జన కోసం ఆరుబయట, పెద్ద చెరువు సమీపంలోకి వెళ్తున్నారు.