నవాబ్పేట, జూన్ 26 : మండలంలోని కొల్లూరు ఉన్నత పాఠశాలలో గత 24వ తేదీన ఉపాధ్యాయులు విధి నిర్వహణ సమయంలో గదిలో కునుకు తీయడంపై సంబంధిత విద్యాశాఖ ఉన్నతాధికారులు సీరియస్గా దృష్టి సారించారు. ‘మత్తు వదలరా..’ అనే శీర్షికన ‘నమస్తే తెలంగాణ’ దినపత్రికలో ప్రచురితమైన కథనానికి విద్యాశాఖాధికారులు స్పందించారు. బుధవారం ఏఎంవో దుంకుడు శ్రీనివాస్ కొల్లూరు ఉన్నత పాఠశాలకు వచ్చి ఉపాధ్యాయుల అలసత్వంపై ఆరా తీశారు. స్టాఫ్ రూంలో నిద్రించిన ఉపాధ్యాయుల వివరాలను అడిగి తెలుసుకున్నారు. అనంతరం తరగతి గదులు తిరిగి విద్యార్థుల విద్యా ప్రమాణాలను పరిశీలించి, రికార్డులు తనిఖీ చేశారు. ఈ సందర్భంగా ఏఎంవో మాట్లాడుతూ పత్రికలో వచ్చిన కథనం మేరకు డీఈవో రవీందర్ ఆదేశానుసారం విచారణ చేపట్టిన ట్లు తెలిపారు. పాఠశాల సమయంలో ఉపాధ్యాయులు లీజర్ పీరియడ్ ఉన్నా.. నిద్రించేందుకు వీలు లేదన్నారు. గతంలో ఈ పాఠశాలలో పది ఫలితాల్లో జీరో రిజల్ట్ వచ్చిన నేపథ్యంలో జిల్లా ఉన్నతాధికారులు సైతం సీరియస్గానే ఉన్నట్లు తెలిపారు. విచారణ నివేదికను డీఈవోకు అందజేయనున్నట్లు తెలిపారు. నివేదిక ఆధారంగా డీఈవో చర్యలు తీసుకుంటారని పేర్కొన్నారు.