గద్వాల, నవంబర్ 8 : ఓ వైపు నిత్యావసర సరుకుల ధరలతో ప్రజలు సతమతమవుతుంటే.. మరో వైపు కూరగాయల ధరలు ఆకాశాన్నంటాయి. దీంతో నిత్యావసర సరుకులు, కూరగాయలు కొనలేక ప్రజలు బెంబేలెత్తుతున్నారు. వంకాయ, బెండకాయ, బీరకాయ, వంకాయ వంటి కూరగాయల ధరలు సగటున రూ. 60కు చేరుకున్నాయి. కొన్ని రోజుల కిందట రూ.40కి లభ్యమైన కూరగాయలు నేడు కొండెక్కాయి.
ఇక్కడ కూరగాయల సాగు అం తంత మాత్రమే ఉండడంతో.. ఇతర ప్రాంతాల నుంచి దిగుమతి చేసుకోవడం కూడా ఒక కారణం గా చెప్పొచ్చు. కడప, చిత్తూరు, మ దనపల్లి తదితర ప్రాంతాల్లో వ ర్షాలు ఎక్కువగా వర్షాలు భారీగా కురిసి పంట నేలపాలవడంతో ధరలు మండిపోతున్నాయి. మార్కెట్లో ఏ కూరగాయలు కొనాలన్నా.. కేజీ రూ.60పైనే ఉండడంతో సామాన్య ప్రజలు ఇబ్బందులు పడుతున్నారు. కాగా, ఉద్యానవన శాఖ అధికారులు రైతులకు కూరగాయల సాగుపై అవగాహన కల్పించకపోవడంతో రైతులు ఆ దిశగా ప్రయత్నించడం లేదు. దీంతో కూరగాయల సాగు తగ్గుతున్నది.
సెప్టెంబర్లో వంకాయ, క్యాలీఫ్లవర్, క్యాప్సికం, బీరకాయ, క్యారెట్ వంటివి కేజీ రూ.40 ఉండగా.. ప్రస్తుతం రూ.60 నుంచి 80కు చేరుకున్నాయి. అ యితే, గత నెలలో కురిసిన వర్షాల ధాటికి కూరగాయల సాగు దెబ్బతిందన్న సాకుతో.. రైతుల నుంచి వ్యాపారులు, దళారులు తక్కువ ధరకు కొనుగోలు చేస్తున్నారు. బహిరంగ మార్కెట్లో రేట్లను అమాం తం పెంచేస్తున్నారు. తమ సంపాదనలో పావలా వంతు కూరగాయలకే వెచ్చించాల్సి వస్తుందని ప్రజలు వాపోతున్నారు. అలాగే జోగుళాంబ గద్వాల జిల్లా కేంద్రంలో ఇంటిగ్రేటెడ్ మార్కెట్ పనులు త్వరగా పూర్తి చేసి అందుబాటులోకి తీసుకొస్తే కూరగాయల ధరలు కాస్తైనా తగ్గే అవకాశం ఉందని వినియోగదారులు అంటున్నారు.
ఏమీ కొనలేని పరిస్థితి..
వారం రోజులుగా కూరగాయల ధరలు ఆకాశాన్నంటాయి. ఏది కొనాలన్నా రూ.60కి తక్కువలేవు. గతంలో రూ.100 కూరగాయలు తీసుకుంటే ఐదు రోజులు వచ్చేవి. ప్రస్తుతం రూ.100 పెడితే రెండు రోజులకు సరిపడా కూరగాయలు కూడా రావడం లేదు. ప్రస్తుతం ఏమి కొనే పరిస్థితుల్లో లేము. ఇంట్లో ఉన్న దానితో సర్ధుకుంటున్నాం. ధరల నియంత్రణపై చర్యలు తీసుకోవాలి.
– సుజాత, గృహిణి, అయిజ
కూరగాయల ధరలు(కేజీ)..
క్యాప్సికం : రూ.80
వంకాయ : రూ.60
క్యాలీఫ్లవర్ : రూ.60
క్యారెట్ : రూ.80
కాకరకాయ : రూ.60
బీరకాయ : రూ.60
మిర్చి : రూ.60
బెండకాయ : రూ.60
గోకరకాయ : రూ.60
దొండకాయ : రూ.60
దోసకాయ : రూ.80
ముల్లంగి : రూ.60
ఉల్లిగడ్డ : రూ.35
ఆలుగడ్డ : రూ.40
బీన్స్ : రూ.80
చిక్కుడుకాయ : రూ.80
క్యాబేజీ : రూ.40