మహబూబ్నగర్, మార్చి 13 : లోక్సభ ఎన్నికలకు సిద్ధం కావాలని మహబూబ్నగర్ కలెక్టర్ రవినాయక్ అన్నారు. బుధవారం కలెక్టరేట్లోని సమావేశ మందిరంలో సంబంధిత అధికారులతో కలెక్టర్ లోక్సభ ఎన్నికలపై సమీక్షించారు. ఈ సందర్భంగా ఆయన మాట్లాడుతూ భారత ఎన్నికల సంఘం ఆదేశాల మేరకు నోడల్ అధికారులను నియమించడం జరిగిందన్నారు. బాధ్యతగా, ఎన్నికల నిబంధనల ప్రకారం విధులు నిర్వహించాలని సూచించారు. 18మందిని నోడల్ అధికారులుగా నియమించినట్లు తెలిపారు.
సిబ్బంది, మెటీరియల్ మేనేజ్మెంట్, శిక్షణ కార్యక్రమాల నిర్వహణ, ట్రాన్స్పోర్టు మేనేజ్మెంట్, కంప్యూటరైజేషన్, సైబర్ సెక్యూరిటీ, ఐటీ, స్వీప్, లా అండ్ ఆర్డర్, సెక్యూరిటీప్లాన్, ఈవీఎంల నిర్వహణ, ఎన్నికల వ్యయ పర్యవేక్షణ, బ్యాలెట్ పేపర్, పోస్టల్ బ్యాలెట్, ఈటీపీబీఎస్ కంట్రోల్ రూం, సీ విజిల్ ఫిర్యాదులు స్వీకరణ, పోలింగ్ కేంద్రాల్లో సౌకర్యాల కల్పనతోపాటు తదితర అంశాలపై నోడల్ అధికారులను నియమించడం జరిగిందన్నారు.
ఎన్నికలు పకడ్బందీగా ప్రశాంతమైన వాతావరణంలో నిర్వహించాలని సూచించారు. కార్యక్రమంలో స్థానిక సంస్థల అదనపు కలెక్టర్ శివేంద్రప్రతాప్, రెవెన్యూ అదనపు కలెక్టర్ మోహన్రావు, అదనపు ఎస్పీ రాములు, జెడ్పీ సీఈవో రాఘవేంద్రరావు, నోడల్ అధికారులు తదితరులు పాల్గొన్నారు.