మహబూబ్నగర్, ఫిబ్రవరి 9 (నమస్తే తెలంగాణ ప్రతినిధి): తెలంగాణలో జీవనది అయిన కృష్ణమ్మ గలగలలు ఆగిపోయాయి. ఎండాకాలం ఇంకా రాకముందే కృష్ణానది పూర్తిగా వట్టిపోయింది. తెలంగాణలో కృష్ణానది అడుగుపెట్టే ప్రాంతం నుంచి జూరాల ప్రాజెక్టు వరకు ఎక్కడ చూసినా నదిలో నీటి జాడ కనిపించడం లేదు. నీళ్లన్నీ అడుగంటడంతో అటూ ఇటూ జనం తిరుగుతున్నారు. పశువులకు దాహార్తి తీర్చుకోవాలన్నా కష్టతరమైపోయింది. నదీ పరివాహక ప్రాంతాల్లో కృష్ణానది జలాలతో వేలాది ఎకరాలు యాసంగి పంటల సాగు కూడా ప్రశ్నార్థకమంగా మారాయి. సమీప ప్రాంతాల ప్రజలకు తాగునీరు ఇబ్బంది నెలకొంది. బోరు బావుల్లో నీళ్లు అడుగంటుతున్నాయి. ప్రతి ఏటా పాయలుగా నదిలో పారే నీరు కనిపించడం లేదు. చుక్కనీరు లేక కృష్ణమ్మ బోసిపోయింది. జూరాల ప్రాజెక్టు ఎగువ భాగం పూర్తిగా ఎండిపోయింది. గతంలో ఎన్నడూ ఇలాంటి పరిస్థితి రాలేదని రైతులు ఆందోళన వ్యక్తం చేస్తున్నారు.
ఉమ్మడి మహబూబ్నగర్ జిల్లా వరప్రదాయిని అయిన కృష్ణానది ఫిబ్రవరి ప్రారంభంలోనే నీళ్లు లేక ఎండిపోయింది. నారాయణపేట జిల్లాలోని కృష్ణ మండలంలో అడుగుపెట్టే ఈ జీవనది తెలంగాణ, కర్ణాటక సరిహద్దుల్లో ప్రవేశించి జూరాలలో కలుస్తుంది. కృష్ణానది తంగిడి నుంచి సంగమేశ్వరం, కృష్ణ టై రోడ్డు, మురహర్దొడ్డి, ముడుమాల, మందిపల్లి, కొల్పూరు, పసుపుల, పారేవుల, పంచదేవ్పహాడ్, గాగన్పల్లి, అనుగొండ మీదుగా జూరాల ప్రాజెక్టులోకి ప్రవేశిస్తుంది. ప్రస్తుతం నదీ ప్రారంభం నుంచి ఆరు కిలోమీటర్ల మేర అక్కడక్కడా నీరు కనిపించినా.. టై రోడ్డు బ్రిడ్జి నుంచి కృష్ణా నదిలో నీళ్లు లేక రాళ్లూ,్ల రప్పలే కనిపిస్తున్నాయి. గతంలో ఈ పరిస్థితిని ఊహించి కొంతమంది నదిలో 365రోజులు నీళ్లు ఉండాలనే ఉద్దేశంతో అంతర్గత కాల్వలను తవ్వించారు. ఈ కాల్వలో నీళ్లు ఎప్పటికీ ఉండేలా ఏర్పాటు చేశారు. పశువులు, కాపరులకు నీళ్లు తాగేందుకు వీటిని ఉపయోగించే వాళ్లు. పరివాహక ప్రాంతాల్లో నీటి ఎద్దడి నెలకొన్నప్పుడు ఈ కాల్వ ద్వారా నీళ్లు తీసుకొనే అవకాశం ఉండేది. ప్రస్తుతం ఈ కాల్వల్లో కూడా నీరు అడుగంటి పోయింది. ఈ మధ్యకాలంలో ఎప్పుడూ ఇలాంటి పరిస్థితి రాలేదని రైతులు ఆందోళన చెందుతున్నారు. మక్తల్ మండలం పారేవుల వద్ద నియోజకవర్గంలోని సగం గ్రామాలకు సత్యసాయి ట్రస్టు ద్వారా రోజూ తాగునీరు అందిస్తారు. నదిలో నీళ్లు అడుగంటి పోవడంతో తాగునీరు కూడా ప్రశ్నార్థకంగా మారింది.
రెండు ప్రాంతాల వాసులు కృష్ణానదిపై గతంలో పుట్టీల ద్వారా ప్రయాణించే తెలంగాణ, కర్ణాటక ప్రాంతాల ప్రజలు ప్రస్తుతం నీళ్లు లేకపోవడంతో కాలినడకన అటూ ఇటు తిరుగుతున్నారు. మరోవైపు తెలంగాణ కర్ణాటక సరిహద్దుల్లో ప్రధాన రహదారి మీద వంతెన మరమ్మతులు కూడా సాగుతుండడంతో ప్రజలు నదిలో నుంచి ప్రయాణాలు సాగిస్తూ అటు నుంచి ఆటోలు, బస్సుల్లో తమ గమ్యస్థానాలకు చేరుకుంటున్నారు.
నారాయణపేట జిల్లాలో కృష్ణానదీ పరివాహక ప్రాంతాన్ని నమ్ముకొని వందలాది ఎకరాల్లో రైతులు పంటలు సాగు చేసుకున్నారు. కృష్ణానదిలో నీళ్లు 24గంటలు లభ్యం కావడంతో చాలామంది రైతులు వరి పంటను సాగు చేస్తున్నారు. ప్రస్తుతం పంట వేసుకున్న రైతులు నదిలో నీరు అడుగంటి పోవడంతో తీవ్ర ఆందోళన చెందుతున్నారు. ప్రత్యేక పైపులైన్లను నది లోపలికి తీసుకెళ్లి ఎక్కడ నీళ్లు ఉంటే అక్కడి నుంచి పంటలకు నీళ్లను తీసుకెళ్లే పరిస్థితి వచ్చింది. ఫలితంగా నీళ్ల కోసం ప్రత్యేకంగా పైపులను కొనుగోలు చేసి నదిలో తీసుకెళ్లి మోటర్లకు బిగిస్తున్నారు. వేసుకున్న పంటలను కాపాడుకోవడానికి రైతులు అష్టకష్టాలు పడుతున్నారు.
తెలంగాణలో కృష్ణానది ఎండిపోతే పక్కనే ఉన్న కర్ణాటకలో మాత్రం నది నిండుగా కనిపిస్తున్నది. అక్కడి రైతులు, అధికార యంత్రాంగం తెలంగాణలోకి కృష్ణానదీ జలాలను వదలకుండా ఎక్కడికక్కడ నదిలో ఇసుక బ స్తాలు వేసి అడ్డుకుంటున్నారు. ఫలితంగా పక్కనే ఉన్న కర్ణాటకలో కృష్ణానది నిండుగా కనిపిస్తుంటే తెలంగాణ లో మాత్రం రాళ్లుతేలి బోసిపోయింది. అంతేకాకుండా తెలంగాణ సరిహద్దులో కర్ణాటక థర్మల్ ప్రాజెక్టు ఉండడంతో థర్మల్ ప్రాజెక్టుకు నీటి సరఫరా కోసం ప్రత్యేకంగా కాల్వను ఏర్పాటు చేసి కర్ణాటక వైపు నీళ్లను మళ్లిస్తున్నారు. ఇటు తెలంగాణను ఎండబెడుతున్నారు. ఇకనైనా రాష్ట్ర ప్రభుత్వం కర్ణాటకలోని కాంగ్రెస్ ప్రభుత్వంతో మాట్లాడి రైతులకు సాగునీరు, ప్రజలకు తాగునీరు అందించి ఆదుకోవాలని కోరుతున్నారు.