మరికల్, జూలై 9 : మండల కేంద్రంలో మంగళవారం కురుమ సంఘం ఆధ్వర్యంలో పురుషులు అంబలితో బోనాలు తీసుకొని పోచమ్మ తల్లికి పోసి గొర్రెలకు ఎలాంటి రోగాలు రాకుండా చల్లగా చూడాలని అమ్మవారిని వేడుకున్నారు. అదేవిధంగా సాయం త్రం మహిళలతో బోనాలతో ఊరేగింపుగా బయలుదేరి ప్రత్యేక పూజలు, నేవేద్యాలు సమర్పించి మొక్కులు చెల్లించుకున్నారు. ఈ సందర్భంగా పోతురాజుల విన్యాసాలు అందరినీ ఆకట్టుకున్నాయి. కార్యక్రమంలో కురుమసంఘం నాయకులు, పెద్దలు, మహిళలు పాల్గొన్నారు.
ధన్వాడ, జూలై 9 : ధన్వాడ మండలంలోని కంసాన్పల్లి, హన్మాన్పల్లి, ధన్వాడ గ్రామాల్లో మంగళవారం పోలమ్మ బోనాల ఉత్సవాలు నిర్వహించారు. ఈ సందర్భంగా మహిళలు బోనాలతో పెద్ద ఎత్తున ఊ రేగింపు నిర్వహించి అమ్మవారికి ప్రత్యేక పూజలు చేసి నైవేద్యాలు సమర్పించి మొక్కులు చెల్లించుకున్నారు. కార్యక్రమాల్లో ఆయాగ్రామాల పెద్దలు, మహిళలు పాల్గొన్నారు.
మాగనూర్, జూలై 9 : సకాలంలో వర్షాలు కురిసి, పంటలు సమృద్ధిగా పండాలని గ్రామస్తులు మైసమ్మతల్లిని వేడుకున్నారు. మంగళవారం మాగనూర్లో మైసమ్మ బోనాల ఉత్సవాలు నిర్వహించారు. ఈ సందర్భంగా మహిళలు పెద్ద ఎత్తున బోనాలతో ఊరేగింపు నిర్వహించి అమ్మవారికి ప్రత్యేక పూజలు చేసి మొక్కులు చెల్లించుకున్నారు. కార్యక్రమంలో మాజీ ఎంపీపీ శ్యామలమ్మ, మాజీ సర్పంచ్ రాజు, మాజీఉపసర్పంచ్ సుధా తదితరులు పాల్గొన్నారు.
హన్వాడ, జూలై 9 : మండలంలోని కొత్తపేటలో మంగళవారం పోచమ్మ ఉత్సవాలు నిర్వహించారు. ఈ సందర్భంగా మహిళలు అందంగా అలంకరించిన బోనాలతో డప్పు చప్పుళ్లు, పోతరాజుల విన్యాసాల మధ్య ఊరేగింపు నిర్వహించారు. అనంతరం అమ్మవారికి నైవేద్యాలు సమర్పించి ప్రత్యేక పూజలు చేసి మొక్కులు చెల్లించుకున్నారు. కార్యక్రమంలో మాజీ ఎంపీటీసీ అరుణ్, మాజీ సర్పంచ్ చెన్నమ్మ, నాయకులు డబ్బ రాములు, శ్రీనివాసులు, వెంకటయ్య, చెన్నయ్య, రాములు తదితరులు పాల్గొన్నారు.