కల్వకుర్తి, జూలై 6 : కాంగ్రెస్ పార్టీలో ఏసీబీ చి చ్చు రేగుతున్నది. వారం రోజుల కిందట వెల్దండ ఎస్సై ఏసీబీ అధికారులకు పట్టుబడడంతో కొత్త, పాత కాంగ్రెస్ నేతలు పరస్పర ఆరోపణలకు దిగారు. ఎస్సైని కాంగ్రెస్కు చెందిన ఓ వర్గం టార్గెట్ చేసి ప్లాన్ ప్రకారం ఇరికించిందని మరో వర్గం వారు ఆరోపిస్తున్నారు. కల్వకుర్తి నియోజకవర్గంలో ఇప్పటికే కొత్త, పాతగా చీలిపోయిన కాంగ్రెస్ నేతలు.. ఏసీబీ దాడు ల నేపథ్యంలో ఇరు వర్గాలు విమర్శించుకునే స్థాయి కి చేరుకున్నాయి. ప్రత్యర్థి వర్గానికి కొమ్ము కాస్తున్నాడనే నెపంతో ప్రభుత్వ అధికారులను టార్గెట్ చేస్తూ ప్రభుత్వం, పార్టీ పరువు తీస్తున్నారని సీనియర్ నా యకులు అంటున్నారు. ఈ విషయాన్ని కల్వకుర్తి కాంగ్రెస్ సీనియర్ నాయకులు ఏఐసీసీ నాయకులు, మాజీ ఎమ్మెల్యే చల్లా వంశీచంద్రెడ్డి దృష్టికి తీసుకెళ్లగా ‘కొత్త’ నాయకులపై తీవ్ర ఆగ్రహం వ్యక్తం చేసినట్లు సమాచారం.
ప్రజాప్రతినిధుల సమ్మతితోనే బాధ్యతలు..
రాష్ట్రంలోని ఆయా నియోజకవర్గాల్లో కీలక హో దాలో పనిచేసే అధికారులు అక్కడి ప్రజాప్రతినిధుల సమ్మతితోనే పనిచేయాలన్నది జగమెరిగిన సత్యం. కొన్ని నియోజకవర్గాల్లో పలు శాఖల పోస్టులకు పోటీ ఉంటుంది. అలాంటి కోవలోకి కల్వకుర్తి నియోజకవర్గం వస్తుంది. కల్వకుర్తి హైదరాబాద్కు దగ్గరగా ఉండటం, దుందుభీ వాగు ఇసుక, మైన్స్, విలువైన భూములు, సివిల్ పంచాయితీలు.. ఇలా కాసులు కురిపించేవి ఎన్నో ఉన్నాయి. కాగా కాంగ్రెస్ తరఫున వంశీచంద్రెడ్డి 2014లో కల్వకుర్తి ఎమ్మెల్యేగా గెలిచారు. 2018లో ఓటమి చెందగా.. 2023లోనూ కల్వకుర్తి నుంచి కాంగ్రెస్ అభ్యర్థిగా పోటీలో ఉంటానని చెప్పారు. అయితే రాజకీయ పరిస్థితుల నేపథ్యంలో వంశీచంద్రెడ్డి తప్పుకోగా బీఆర్ఎస్ ఎమ్మె ల్సీ కశిరెడ్డికి కాంగ్రెస్ అధిష్ఠానం టికెట్ ఇవ్వగా ఆయన గెలిచారు. రాష్ట్రంలోనూ కాంగ్రెస్ అధికారం చేపట్టడంతో అసలు కథ మొదలైంది. కశిరెడ్డి గెలుపుతో నియోజకవర్గంలో కొత్త, పాత రెండు వర్గాలుగా కార్యకర్తలు, నాయకులు చీలిపోయారు.
పైకి స్నేహంగా ఉంటున్నా.. లోపల మాత్రం ఒకరిపై ఒకరు కత్తులు నూరుకుంటున్నారు. ఈక్రమంలోనే వెల్దండ ఎస్సైగా వచ్చిన వ్యక్తిని పాత వర్గానికి చెందిన నాయకులే తీసుకొచ్చారని, అందుకే అతడు తమను పట్టించుకోవడం లేదని కొత్త వర్గం నాయకుల నుంచి ఆరోపణలు వచ్చాయి. అందుకే పథకం పన్ని ఎస్సైని ఏసీబీకి పట్టించారనే వార్తలు వెల్దండ మండలంలో గుప్పుమన్నాయి. ఏసీబీ అధికారుల వలలో ఎస్సై చిక్కుకున్నాడనే విషయాన్ని ముందు గా మండలానికి చెందిన కొత్త కాంగ్రెస్ నాయకుడు (ముఖ్యమంత్రికి సన్నిహితుడని చెప్పకుంటున్న వ్యక్తి) రాత్రి 11గంటలకు తనకు సంబంధించిన విలేకరికి చెప్పినట్లు పాత వర్గం నాయకులు చెబుతున్నారు. ఎస్సై ఏసీబీకి చిక్కిన విషయం కొత్త కాంగ్రెస్ నాయకులకు ముందుగానే తెలిసిందంటే.. ఇదంతా వారి కనుసన్నల్లోనే జరిగిందని పాత వర్గం నాయకులు మండిపడుతున్నారు.
‘కొత్త’ వారిపై ‘పాత’ నేతల అసహనం..
కల్వకుర్తి నియోజకవర్గంలో కొంతమంది కొత్త నే తలపై పాత వర్గం వారు తీవ్ర అసహనం వ్యక్తం చే స్తున్నారు. కొందరు కొత్త నేతలు అరాచక శక్తుల అవతారమెత్తుతున్నారని, దీంతో పార్టీ పరువు గంగపాలవుతున్నదని ఆందోళన చెందుతున్నారు. ఇసుక అ క్రమ రవాణా, మైన్స్, భూముల ఆక్రమణ.. ఇలా చాలా అరాచకాలకు పాల్పడుతున్నారని పాత కాం గ్రెస్ నాయకులు మండిపడుతున్నారు. కొందరైతే సీఎం మాకు అత్యంత సన్నిహితుడు, మేమెంత చెబి తే అంత అంటూ.. అధికారులను భయభ్రాంతులకు గురిచేస్తున్నారని పాత నాయకులు వాపోతున్నారు. ఈ విషయాలన్నింటినీ పాత కాంగ్రెస్ నాయకులు మాజీ ఎమ్మెల్యే వంశీచంద్రెడ్డికి క్షుణ్ణంగా చెప్పినట్లు సమాచారం. ఇలా అయితే స్థానిక సంస్థల ఎన్నికల్లో పార్టీ తీవ్రంగా నష్టపోతుందని మాజీ ఎమ్మెల్యేకు మొరపెట్టుకున్నారట. వెల్దండ మండలంలో కొత్త, పాత కాంగ్రెస్ నాయకుల మధ్య అధికారులు నలిగిపోతున్నారు. ఈ క్రమంలో కల్వకుర్తి కాంగ్రెస్లో కొత్త, పాత వర్గాల మధ్య పోరు మున్ముందు మరిం త రసవత్తరంగా మారే అవకాశముందని పలువురు రాజకీయనేతలు భావిస్తున్నారు.