స్వేచ్ఛ ఆకాశపు నిండా కమ్ముకున్న నియంతృత్వపు మేఘాలతో ముసలి (అ)రాచరికం
బుసలు కొడుతున్న వేళ…
అతడు ధిక్కార స్వరంతో
పిడికెడు ధైర్యపు అక్షరాలను
ఈ నేల గుండెల్లో విత్తి,
‘అగ్ని ధార’లై కురిసి
తిరుగుబాటు వసంతాలను రచించిండు
ఖైదీ చేసి
కారాగారాలలో ఉంచిన
బొగ్గుతో గోడల మీద
కవితా ఖడ్గాలను దూసి
నేల తెగువను ఎరుక చేసిండు
కలంతో
చీకటి కనుగుడ్లను పొడిచి
వెలుగు గుమ్మాల ముందు
‘రుద్రవీణ’ల తంత్రుల నాదమయ్యిండు
ఆ చల్లని సముద్ర గర్భం
దాచిన బడబానల
గోసను, బాసను,శ్వాసను వినిపించిండు
కావ్య పరిమళాలను విశ్వాన వెదజల్లిండు
కీర్తి శిఖరాలను అధిరోహించిండు.
అభ్యుదయ పథంలో అలుగెల్లి పారి,
స్ఫూర్తి పతాకమై నిలిచిండు
‘నా తెలంగాణ కోటి రత్నాల వీణ’ అంటూ
జాతి జనుల గుండె చప్పుడై
నిత్యం మార్మోగుతుండు.
-చిక్కొండ్ర రవి
95023 78992