వందనాలు వందనాలు
మహారథికి వందనాలు
దాశరథికి వందనాలు
జోహారు జోహారు
విప్లవ కవి విరించికి జోహారు
విశాల హృది ధీశాలికి జోహారు
ఉగ్గుపాల పంతం
నిగ్గదీయు నైజం
ఆ నిరంకుశ నైజాము
మెడలు వంచు ధైర్యం
పీడితులకు తాడితులకు
అండ నిలుచు సైన్యం
భూస్వాముల కక్షలు
తెగటార్చు ఖడ్గం
కవనంతో కవాతు
కల్లోలం జవాబు
గుండుకెదురు
గుండె నిలుపు తేజం
ప్రాణమంటే త్రుణము
తన శ్వాసే రణము
మరణమంటే లేదు భయం
అండ నిలుచు అభయం
ఉగ్గు పాల పంతం
నిగ్గదీయు నైజం
నిరంకుశ నైజాం
మెడలు వంచు ధైర్యం
పందొమ్మిదేళ్ళ యువకుడు
సాహిత్య వార్షికోత్సవ
ఓరుగల్లు సభలో
గాండ్రించిన వైనం
ఉరితీసి పిరికితనం
నూరిపోసే ధైర్యం
రజాకార్లకే రంధియై
ఉద్యమానికి ఊపిరియై
గొంతెత్తిన వీరుడు
చురకత్తులే మాటలు
సంకెళ్లకు వెరువక
జైళ్లంటే బెదరక
ఉగ్గు పాల పంతం
నిగ్గదీయు నైజం
ఆ నిరంకుశ నైజాము
మెడలు వంచు ధైర్యం
అగ్నిధార నిప్పు కణిక
నిద్ర లేపె జగమంత
నియంత అంతమిక
రుద్రవీణ తంత్రులు
మీటె హృదయ తంత్రులు
పాడే విప్లవ గీతికలు
తిమిరంతో సమరం
నవోదయ గగనం
ఉషోదయ కిరణం
ఎక్కు పెట్టి రణశరం
వీణ పాటల కాణాచి
వీనులకెంతో అభిరుచి
సాహిత్యపు శిఖరం
లోతైన భావ గర్భితం
పూరించే సమర శంఖం
ఉద్యమ ఉగ్ర సింహం
సల సల మరిగే రక్తం
ఉగ్గు పాల పంతం
నిగ్గదీయు నైజం
ఆ నిరంకుశ నైజాము
మెడలు వంచు ధైర్యం
ఇదే ఇదే నివాళి
శత జయంతి సంబరానికి
దిగ్విజయ అంబరానికి
తెలంగాణ విప్లవరథికి
మానవీయ మహారథికి
మన దాశరథికి
-మర్రి బాల్ రెడ్డి