కళ్లము యాదికొచ్చిందంటే
నోట్లే తేనె పడ్డంత సంబురం
బంతి కాడి బాగోతం పాటలకు
ఎడ్లకు సుత ముద్దొచ్చి
చెవులు రిక్కించుకొని వినేవి
కుప్పల మీది బూడిద ముగ్గుతో
కళ్లము పున్నమి ఎన్నెలోలె కనపడేది
కావలి కాసే రాత్రులల్ల
సంకురాతిరి గొంగళ్లను
అలుముకొని మురిసిన గడ్డివాములెన్నో!
జోలెల నోళ్లు నింపి
బిచ్చగాళ్ల ఆకలి తీర్చే
అదో కర్ణుడి చేయి
గుల్లకు, గుమ్మికి, కచ్చురముకు
ముచ్చట కలిపి
అప్పుడప్పుడు రేలు, పగళ్ళ లెక్క చూసే
పంట పొలాల ఒంటరి సిపాయి
తూర్పాల పుణ్యమో,
మట్టి పెట్టే బిచ్చమో కానీ!
తర్ర వడ్లతో, తాలు బియ్యంతో
లేకి బతుకులను నిలబెట్టే నిట్టాడు
ఎర్రటెండ పోటుకు
చెమట కార్చే చేటను చూసి
కలుక్కుమనే కన్నీటి మొగులు
ఇసుక, నువ్వుల కలెగలుపు కుప్పలను
కోడుచూ, చెరుగుచూ వేరుచేసే తీరు చూసి
పొంగి పొర్లే అలుగు
కమ్మరి, కుమ్మరి, వడ్లొల్ల బంతికి
తానే గలగలమనే దొంతుల సద్దు
కంది పొరుకను పొనుకలల్ల నింపి
పొయ్యికి పంపే ఇంటి బందుగు
కొట్టాల్లోని పనుల మందకు
పూట కూలమ్మ
కాలం మారిపోయే
కళ్లము కనపడదాయే
ఎటుచూసిన మోటార్లాయే
ఎదుగుడో, తగ్గుడో కానీ!
ఎద్దులు సుత కనుమరుగవుతుండే!
వూట్ల భద్రయ్య
95502 56840