అధిక బరువు.. ఇప్పుడు చాలామంది ఎదుర్కొంటున్న సమస్య. వేళాపాళ లేని ఆహార నియమాలు, నిద్రలేమి, పని ఒత్తిడి, జంక్ఫుడ్స్ ఇవన్నీ అధిక బరువుకు కారణం అవుతున్నాయి. జీవనశైలిలో మార్పు రాకపోతే.. జిమ్లో గంటల తరబడి కష్టపడినా పెద్ద ప్రయోజనం ఉండదు. అయితే సహజ పద్ధతుల్లో బరువు తగ్గితే ఆరోగ్యంతోపాటు అందమూ రెట్టింపవుతుంది. ఇలాంటి సంప్రదాయ పద్ధతుల్లో ఉపవాసం ఒకటి. ఇందులో వాటర్ ఫాస్టింగ్ ప్రత్యేకం అని చెబుతున్నారు. ఏమిటీ వాటర్ ఫాస్టింగ్?
బరువు తగ్గేందుకు చేసే ఒక ప్రక్రియ వాటర్ ఫాస్టింగ్. ఈ ఉపవాస దీక్షలో దాదాపు 24 గంటలు నీళ్లు మాత్రమే తీసుకోవాలి. పండ్ల రసాలు కూడా తాగొద్దు. దీన్ని పాటించడం వల్ల కాలేయంతోపాటు కండరాల కణజాలాల్లో నిల్వ ఉన్న ైగ్లెకోజెన్ వినిమయం అవుతుంది. తద్వారా శరీర బరువు తగ్గుతుంది. వాటర్ ఫాస్టింగ్ వల్ల శరీరంలోని వ్యర్థాలు బయటికి వెళ్లిపోతాయని, జీర్ణక్రియ మెరుగుపడుతుందని పలు అధ్యయనాల్లో వెల్లడైంది.
బరువు తగ్గడానికి, ఇన్సులిన్ సమతుల్యతకు కూడా ఇది సాయపడుతుందని తేలింది. అయితే, నీటి ఉపవాసం కారణంగా శరీరంలో విటమిన్లు, ఖనిజాలు, ఎలక్ట్రోలైట్ల శాతం పడిపోతుంది. దీంతో బలహీనత ఆవహిస్తుంది. మైకం వచ్చే ప్రమాదమూ ఉంది. నిపుణుల సూచన మేరకే ఈ ఉపవాసం చేపట్టాలి. అంతేకాదు డయాబెటిస్, హృద్రోగ సమస్యలు ఉన్నవాళ్లు వాటర్ ఫాస్టింగ్ చేయకూడదు.