నమస్తే మేడం. రజస్వల సమయంలో చప్పటి ఆహారం పెట్టాలని పెద్దలు చెబుతుంటారు. కారం కనుక తింటే.. భవిష్యత్తులో నెలసరి నొప్పి, ఇతర సమస్యలు తలెత్తుతాయా? మా అమ్మాయికి 14 ఏండ్లు. తన కడుపునొప్పికి కారణం.. రజస్వల అయినప్పుడు కారం తినడమేనా?
– ఓ పాఠకురాలు
ఇక్కడ ముఖ్యమైన విషయం ఏమిటంటే… రజస్వల కావడానికి, ఆ సమయంలో తినే ఆహారానికి అసలు సంబంధం లేదు. కారాలు తినకూడదన్న నియమం అసలే లేదు. చక్కని పౌష్టికాహారాన్ని రుచిగా వండి పెట్టొచ్చు. మనం ఈ సందర్భంగా నువ్వులు, బెల్లంలాంటి క్యాల్షియం, ఐరన్ ఉండే పదార్థాల్ని పెడతాం. అది పిల్లలకు ఎంతో మంచిది. ఎందుకంటే పుష్పవతి అయిన ఆరునెలల దాకానే పిల్లలు ఎత్తు పెరుగుతారు. తర్వాత పెరుగుదల నెమ్మదిస్తుంది.
అందుకే ఈ సమయంలో విటమిన్లు, మినరల్స్, ప్రొటీన్లు, పీచులు కలగలిపిన సంపూర్ణ పౌష్టికాహారాన్ని అందించడం ఎంతో ముఖ్యం. మంచి వ్యాయామమూ అవసరం. కాబట్టి మీ అమ్మాయి కడుపు నొప్పికి, ఆ సమయంలో తీసుకున్న ఆహారానికి ఎలాంటి సంబంధం లేదు. నొప్పి ఎక్కువగా ఉంటే డాక్టర్ను సంప్రదించండి. పరీక్షలు చేసి, తగిన సూచనలిస్తారు. హాట్ప్యాక్ లాంటివి పొట్టమీద పెడితే కూడా కొంత ఉపశమనం ఉంటుంది.
డాక్టర్ పి. బాలాంబ
సీనియర్ గైనకాలజిస్ట్