Lifestyle | ఆలుమగలు పోటాపోటీగా ఉద్యోగాలు చేస్తున్న కాలమిది. ఉద్యోగ బాధ్యతలతో సతమతమవుతూ వ్యక్తిగత జీవితాన్ని పూర్తిస్థాయిలో ఆస్వాదించలేకపోతున్నారు. అలాగని ఒకరు ఉద్యోగం విరమించుకుంటే.. పెరిగిన ధరలు, జీవనశైలిలో వచ్చిన మార్పులు అందుకు ఆమోదించేలా లేవు. రోజంతా కొలువు కూటమిలో కుస్తీ పట్టి ఇంటికి వచ్చిన భార్యాభర్తలు మనసువిప్పి మాట్లాడుకోవడం అరుదైన సన్నివేశంగా మారుతున్నది. పనిభారంతో ఎవరికో ఒకరికి ఒంట్లో నలతగా ఉండి ముభావంగా ఉన్నా.. మరొకరు అపార్థం చేసుకునే ప్రమాదం ఉంది. ఇలాంటి పరిస్థితులు తలెత్తకుండా ఉండాలంటే ఈ టిప్స్ ఫాలో అయిపోండి..
శారీరకంగా, మానసికంగా ఫిట్గా ఉండాలంటే వాకింగ్, జాగింగ్ చేయాలని తెలిసిందే. దీంతోపాటు ప్రతిరోజూ ఓ అరగంట తేలికపాటి కసరత్తులు చేస్తే మరీ మంచిది. ఇంటిపనుల్లో బిజీగా ఉండే ఇల్లాలికి వర్కవుట్లు చేయడం సాధ్యం కాదని భావించవద్దు. అరగంట ముందుగా నిద్రలేస్తే సరిపోతుంది. ఇద్దరూ కలిసి డాబామీద నాలుగు అడుగులు వేసిరండి. ఇంట్లోకి వచ్చాక తేలికపాటి యోగాసనాలు కలిసి వేయండి. ఈ క్రమంలో ఇద్దరి మధ్య మాటలు మంత్రాల్లా కలిసిపోతాయి. కొత్త ఉత్సాహం ఊపందుకుంటుంది. నడిరాతిరి ముచ్చటకూ ఇది ఉపకరిస్తుంది.
ఉదయం ఉపాహారం, మధ్యాహ్నం భోజనం కలిసి చేసే వీలు ఉండకపోవచ్చు. బ్రేక్ఫాస్ట్ కలిసి తినే అవకాశం ఉన్నా.. ఆఫీసుకు వెళ్లే హడావుడిలో అంతగా ఆస్వాదించలేకపోవచ్చు. అందుకే డిన్నర్ వేళ ఇద్దరూ ఒక్కతాటిపైకి రావాలి. ఆమెకు నచ్చినవి అతను కొసరి వడ్డించాలి. అతనికి నచ్చినవి ఆమె రుచి చూసి మరీ నోటికి అందించాలి. కలిసి తినేది పదిహేను నిమిషాలే కావొచ్చు.. కానీ, ఆ సమయంలో ఇచ్చిపుచ్చుకునే అన్నం ముద్దలు.. ఆపై ముద్దుల ముచ్చటకు తెర తీస్తాయి.
ఉద్యోగ విషయాల్లో సమవుజ్జీలుగా రాణిస్తున్నా.. ఇంటిపనుల దగ్గర మాత్రం ఆమెదే పైచేయి ఉండాలని ఆశిస్తుంటారు పురుషులు. ఈ వైఖరి అప్పటికే అలసిపోయిన ఆమె మనసును మరింత కుంగదీస్తుంది. అలాగని పనంతా మగవాళ్లే భుజాన వేసుకోవాలని కాదు. వారు చేస్తున్న పనిని అందుకుంటే చాలు. ఏది ఎవరు చేయాలని లిస్టులు గట్రా రాసుకోకుండా.. ఎవరికి తోచింది వారు చేయడమే పనిగా పెట్టుకోవాలి. ఇద్దరూ కలిసి పనిచేస్తే.. భారం తగ్గుతుంది, బంధం పెరుగుతుంది.