వాకిట్లో పచ్చని మొక్కలను పెంచుకుంటే మానసికంగానూ, శారీరకంగానూ చాలా లాభాలు ఉన్నాయని అనేక అధ్యయనాల్లో వెల్లడైంది. అంతేకాదు పచ్చని మొక్కలతో ఇంట్లో ఆహ్లాదకరమైన వాతావరణం నెలకొంటుంది. అపార్ట్మెంట్వాసులకు ఈ ఆనందం అందని ద్రాక్షే! అందుకే చిట్టి చిట్టి కుండీల్లో పొట్టి పొట్టి మొక్కలు పెట్టుకొని అక్కడితో సంతృప్తిపడుతుంటారు. బాల్కనీలో స్థలం వృథాకాకుండా చూరుకు వేలాడదీసే కుండీలు రకరకాల డిజైన్లలో లభిస్తున్నాయి. అయితే ఈ తరహా వేలాడదీసే కుండీల్లో తీగ మొక్కలు నాటుకుంటే.. మీ బాల్కనీ బృందావనంగా మారిపోతుంది.
పెటూనియా: కుండీలో పెరిగే ఈ పూల మొక్కలను వేలాడదీస్తే చాలా అందంగా కనిపిస్తాయి. పెటూనియాలు గులాబీ, ఊదా, నీలం, తెలుపు.. అందమైన రంగులలో వికసిస్తాయి. ట్రంపెట్ ఆకారంలో ఉండే ఈ పూలు మరింత ఆకర్షణీయంగా ఉంటాయి.
బోస్టన్ ఫెర్న్: ఈ పందిరి మొక్కలు ఇంటికి కొత్త లుక్ తెస్తాయి. బోస్టన్ ఫెర్న్ మొక్కలు పొదల్లా పెరుగుతాయి. తెల్లవారుజామున ఇవి మరింత అందంగా కనిపిస్తాయి.
పోథోస్ ప్లాంట్: ఈ మొక్కను చాలా సులభంగా పెంచుకోవచ్చు. నిర్వహణ కూడా చాలా తేలిక. నెల రోజుల్లోనే ఏపుగా పెరుగుతుంది. మచ్చల ఆకులతో ఇంటికి డిఫరెంట్ లుక్ ఇస్తుంది.
స్ట్రింగ్ ఆఫ్ పెరల్స్: పేరుకి తగినట్లుగానే ముత్యాలను అమర్చినట్లు అందంగా ఉంటుంది ఈ మొక్క. చిన్న చిన్న బటానీలు కొమ్మలకు అతుక్కుని ఉన్నట్లు కనిపిస్తుంది. వీటికి తెల్లని పూలు కూడా పూస్తాయి. కుండీలో అయినా ఈ మొక్క ఏపుగా ఎదిగి పచ్చదనంతో అలరిస్తుంది.