ఖమ్మం, జూలై 23 (నమస్తే తెలంగాణ ప్రతినిధి) : రాష్ట్ర ప్రభుత్వం విడుదల చేసిన రుణమాఫీ జాబితాలో పేర్లు వచ్చిన రైతుల కంటే రానివారు సగం మంది ఉన్నట్లు కనిపిస్తున్నది. దీంతో వారంతా సొసైటీలు, బ్యాంకులు, రైతువేదికల వద్దకు క్యూ కడుతున్నారు. రూ.లక్షలోపు పంట రుణాలు తీసుకున్న రైతుల జాబితా విడుదలకావడంతో గ్రామాల్లో రైతులు తమ పేర్లు ఉన్నాయో లేవో అని తెలుసుకునేందుకు మండలాలు, జిల్లా కేంద్రానికి వస్తున్నారు. జాబితాలో తమ పేరు లేకపోవడంతో అధికారుల వద్దకు పరుగులు తీస్తున్నారు. రుణమాఫీ పొందిన రైతులు ఆయా బ్యాంకులు, సొసైటీలకు వెళ్లి తమ పట్టాదారు పాసు పుస్తకాల జిరాక్స్లు, ఆధార్ కార్డు జిరాక్స్లు అందజేస్తున్నారు.
ఇదే సమయంలో రుణమాఫీ రాని రైతులు సైతం తమకు తక్షణమే రుణమాఫీ చేయాలని బ్యాంకు, సొసైటీ అధికారులను కోరుతున్నారు. ఖమ్మం జిల్లాలో రూ.లక్షలోపు రుణాలు తీసుకున్న రైతులు 59,172 మందికి రూ.264.23 కోట్ల నిధులను ప్రభుత్వం విడుదల చేసింది భద్రాద్రి కొత్తగూడెం జిల్లాలో 28,019 మందికి రూ.132.07 కోట్లు విడుదలయ్యాయి. ఇదిలా ఉండగా.. ఒక్క డీసీసీబీ పరిధిలోనే రూ.లక్షలోపు పంట రుణాలు తీసుకున్న రైతులు 1,69,864 మంది ఉన్నారు. వీరికి రూ.908.27 కోట్లు అవసరం ఉంటుందని ఆ బ్యాంకు అధికారులు పేర్కొంటున్నారు. దీంతో సగానికి సగం అర్హత కలిగిన రైతులకు సైతం రుణమాఫీ జరుగలేదని తెలుస్తున్నది. రూ.2 లక్షలలోపు పంట రుణాలు తీసుకున్న రైతులు ఎంతమంది ఉన్నారు.. వారికి ఎన్ని కోట్లు అవసరం ఉంటుంది అనేది నేటివరకు సైతం జిల్లా లీడ్ బ్యాంక్ అధికారులు ప్రకటించకపోవడం గమనార్హం.
దాటవేత, సాగతీతకే ప్రాధాన్యం
అర్హత కలిగి ఉన్నప్పటికీ తమకు రుణమాఫీ రాకపోవడానికి గల కారణాలు తెలపాలని అనేక మంది రైతులు బ్యాంకు మేనేజర్లు, సొసైటీ బాధ్యుల వద్ద మొరపెట్టుకుంటున్నారు. అయితే సరైన సమాధానం చెప్పలేని సంబంధిత అధికారులు సాగతీత, లేకపోతే దాటవేతకు పరిమితమవుతున్నారు. టోల్ఫ్రీ, సెల్ నెంబర్లకు ఫోన్ చేసినప్పటికీ సరైన సమాధానం రావడం లేదని రైతులు వాపోతున్నారు. తప్పకుండా వస్తుంది.. ఓపిక పట్టండి అని చెప్పి సొసైటీ సీఈవోలు, బ్యాంకు మేనేజర్లు రైతులను ఇంటికి పంపిస్తున్నారు. మరికొందరైతే మండల వ్యవసాయ శాఖ అధికారిని కలువాలని, కలెక్టర్ కార్యాలయానికి వెళ్లి అడగాలని, బ్యాంకు హెడ్డాఫీస్కు వెళ్లమని ఇలా రకరకాల సమాధానాలు చెప్పి రైతులను అయోమయానికి గురిచేస్తున్నారు. రెండు బ్యాంకుల్లో అప్పులు తీసుకోవడం వల్ల మాఫీ రాలేదని కొందరు చెప్పడం గమనార్హం.
మా అమ్మ పేరు లేదు.. నా పేరు లేదు
మా అమ్మ 2009లో పంట రుణం తీసుకుంది. నేను 2014లో రూ.25 వేలు పంట రుణం తీసుకున్నాను. అప్పటినుంచి ప్రతియేటా రెన్యువల్ చేయించుకుంటూ వస్తున్నాం. అయితే మా అమ్మ, నేను ఒకే రేషన్ కార్డులో ఉన్నాం. గత ఏడాది సెప్టెంబర్ వరకు మొత్తం రుణం రూ.95 వేలు అయ్యింది. ప్రస్తుతం జరిగిన రుణమాఫీలో మా అమ్మ పేరు లేదు.. నా పేరు లేదు. ఎందుకు మా పేర్లు రాలేదని ఏపీజీవీబీ మేనేజర్ను అడిగితే.. వస్తది కావచ్చు అంటున్నారు. క్రమంగా పేర్లు వస్తున్నాయి అని చెప్పారు. లక్షలోపు పంట రుణం ఉన్నప్పటికీ, రేషన్కార్డు వల్ల రాలేదా, మరే కారణమో తెలియడం లేదు.
– బాషా వెంకటేశ్వర్లు, రైతు, నర్సింహాపురం, ఖమ్మంరూరల్
నాకు రుణమాఫీ కాలేదు..
గానుగపాడు సహకార సంఘంలో రుణం తీసుకున్నాను. రుణమాఫీ జాబితాలో నా పేరు లేదు. రైతులందరికీ రూ.2 లక్షల రుణమాఫీ చేస్తామని చెప్పి కాంగ్రెస్ రైతులను మోసం చేసింది. కండీషన్లు, కొర్రీలు పెట్టి సగంమందికి కూడా మాఫీ చేయడం లేదు. గానుగపాడు సొసైటీలో 2,500 మంది రైతులకు 500 మందికి మాత్రమే లక్షలోపు రుణమాఫీ అయ్యింది. నాకు రుణమాఫీ రాలేదు.
– గుగులోత్ రమేశ్, రైతు, తిప్పనపల్లి మాజీ సర్పంచ్, చండ్రుగొండ మండలం