భద్రాద్రి కొత్తగూడెం, జూలై 11 (నమస్తే తెలంగాణ) : భద్రాద్రి కొత్తగూడెం జిల్లా మెడికల్ కాలేజీ ప్రిన్సిపాల్ డాక్టర్ లక్ష్మణరావు గురువారం బదిలీ అయ్యారు. అధికారికంగా బదిలీ ఉత్తర్వులు డైరెక్టర్ ఆఫ్ మెడికల్ ఎడ్యుకేషన్ నుంచి రాకపోయినా కమిషనర్ నుంచి ఒక లేఖ మాత్రం బయటకు వచ్చింది. ఇది సోషల్ మీడియాలో చక్కర్లు కొట్టడంతో మెడికల్ కాలేజీ ప్రొఫెసర్లు సైతం దీనిపై నోరు మెదపడం లేదు. ఇప్పటివరకు ప్రిన్సిపాల్గా పనిచేసిన లక్ష్మణరావుపై గతంలో పలు ఆరోపణలు వచ్చిన సంగతి తెలిసిందే. కళాశాలలో చదువుతున్న విద్యార్థినుల పట్ల అసభ్యంగా ప్రవర్తించారనే ఆరోపణల నేపథ్యంలో కాలేజీ ఎదుట విద్యార్థులు ధర్నాకు దిగారు. ఆయనపై చర్య తీసుకోవాలని ఫిర్యాదు చేశారు. దీంతోపాటు కళాశాలకు సంబంధించిన సొమ్మును తన ఖాతాలో వేసుకున్నట్లు అభియోగం రావడంతో ఉన్నతాధికారులు విచారణ చేపట్టారు. ఔట్ సోర్సింగ్ ఉద్యోగుల నియామకానికి సంబంధించి వారి వద్ద నుంచి సొమ్ము వసూలు చేసిన దానిపై జిల్లా ఎంప్లాయిమెంట్ అధికారి విజేత విచారణ చేపట్టారు. ఆ నివేదికను కలెక్టర్ జితేశ్ వి పాటిల్కు అందజేశారు. ఇలాంటి ఆరోపణలను పరిగణనలోకి తీసుకున్న ఉన్నతాధికారులు ప్రిన్సిపాల్పై బదిలీ వేటు వేసినట్లు తెలిసింది. ఆయనను ఉస్మానియా యూనివర్సిటీలో ప్రొఫెసర్గా బదిలీ చేసినట్లు తెలిసింది. దీనిపై మెడికల్ కాలేజీ ప్రొఫెసర్లను వివరణ కోరగా.. బదిలీకి సంబంధించి డీఎంఈ నుంచి కళాశాలకు ఎలాంటి ఉత్తర్వులు రాలేదు. బయట సోషల్ మీడియాలో మాత్రం బదిలీ అయినట్లు పోస్టు వచ్చినట్లు విన్నాం. ఇంకా పూర్తి వివరాలు తెలియదని వివరించారు.