అశ్వారావుపేట రూరల్, జూలై 10 : ఇద్దరు ఉపాధ్యాయులు 200 మందికి ఎలా బోధిస్తారంటూ ఆగ్రహించిన విద్యార్థులు, వారి తల్లిదండ్రులు భద్రాద్రి కొత్తగూడెం జిల్లా అశ్వారావుపేట మండలం గుమ్మడవల్లి హైస్కూల్కు తాళం వేశారు. అనంతరం వేలేరుపాడు-అశ్వారావుపేట ప్రధాన రహదారిపై బుధవారం మూడు గంటలపాటు ధర్నా చేశారు. దీంతో వాహనాల రాకపోకలు నిలిచిపోయాయి.
పాఠశాలలు ప్రారంభమై నెల రోజులు గడుస్తున్నా ఇంతవరకు ఉపాధ్యాయ పోస్టులను భర్తీ చేయలేదని, ఇక తమ చదువులు ఎలా సాగుతాయని విద్యార్థులు.. ప్రజాప్రతినిధులు, అధికారులకు గతంలో ఫిర్యాదు చేశారు. అయినా ఎవరూ పట్టించుకోకపోవడంతో విద్యార్థులు వారి తల్లిదండులు, యువకులు, గ్రామ పెద్దలతో కలిసి ప్రధాన రహదారిపై బైఠాయించారు. గత కేసీఆర్ ప్రభుత్వ హయాంలో కోట్లాది రూపాయలతో భవనాలు నిర్మించినా.. ప్రస్తుత విద్యాసంవత్సరంలో ఉపాధ్యాయులు లేకపోవడంతో బోధన ఎలా సాగుతుందని పలువురు ప్రశ్నించారు.
‘వీ వాంట్ టీచర్స్’ అంటూ విద్యార్థులు ప్లకార్డులు చేత పట్టుకుని నినాదాలు చేశారు. విద్యాశాఖ అధికారులు స్పష్టమైన హామీ ఇచ్చేంత వరకు కదిలేది లేదని భీష్మించారు. పోలీసులు పలుమార్లు విద్యార్థులు, తల్లిదండ్రులకు నచ్చజెప్పినా వినలేదు. దీంతో డీఈవో వెంకటేశ్వరాచారి ఫోన్లో గ్రామస్తులతో మాట్లాడుతూ.. 3 రోజుల్లో ఉపాధ్యాయులను నియమిస్తామని స్పష్టమైన హామీ ఇచ్చారు. దీంతో విద్యార్థులు ఆందోళన విరమించారు. హామీని విస్మరిస్తే వారం రోజులపాటు ఆందోళనలు చేపడుతామని వారు హెచ్చరించారు.
విద్యార్థుల జీవితాలతో చెలగాటమాడొద్దు: మాజీ ఎమ్మెల్యే మెచ్చా
అశ్వారావుపేట రూరల్/ అశ్వారావుపేట టౌన్, జూలై 10 : ఉపాధ్యాయులు లేకుండా పాఠశాలలో విద్యాబోధన ఎలా సాగుతుందని, విద్యార్థుల జీవితాలతో ఆటలాడుకోవద్దని మాజీ ఎమ్మెల్యే మెచ్చా నాగేశ్వరరావు విద్యాశాఖ అధికారులను హెచ్చరించారు. బుధవారం గుమ్మడవల్లి గ్రామస్తులు, విద్యార్థులు, తల్లిదండ్రులు గుమ్మడపల్లి హైస్కూల్ పరిస్థితి గురించి మెచ్చా దృష్టికి తీసుకెళ్లారు. ఈ సందర్భంగా ఆయన మాట్లాడుతూ 40 రోజులు గడిచినా ఉపాధ్యాయులను నియమించకపోవడం విడ్డూరంగా ఉందని, ఇదేనా కాంగ్రెస్ పాలన అని ఆయన మండిపడ్డారు. వెంటనే ఉపాధ్యాయులను నియమించాలని, లేదంటే ఆందోళన కార్యక్రమాలు చేపడుతామని హెచ్చరించారు.