భద్రాద్రి కొత్తగూడెం, మే 23 (నమస్తే తెలంగాణ) : ధాన్యం కొనుగోళ్లను వేగవంతం చేయాలని కలెక్టర్ డాక్టర్ ప్రియాంక ఆల ఆదేశించారు. సుజాతనగర్ మండల కేంద్రంలో ఏర్పాటు చేసిన ధాన్యం కొనుగోలు కేంద్రాన్ని కలెక్టర్ గురువారం తనిఖీ చేశారు. ధాన్యాన్ని పరిశీలించి తేమ శాతం ఎక్కువగా ఉన్నట్లు గుర్తించారు. కొనుగోలు కేంద్రానికి తరలించిన ధాన్యాన్ని నిర్ణీత తేమ శాతం(17) వచ్చేంత వరకు ఆరబెట్టుకోవాలని అన్నారు. రానున్న రోజుల్లో వర్షాలు పడే అవకాశం ఎక్కువగా ఉన్నందున ధాన్యం కొనుగోలు ప్రక్రియను త్వరితగతిన పూర్తి చేయాలని అధికారులను ఆదేశించారు. కొనుగోలు చేసిన ధాన్యాన్ని వెంటనే ట్యాగింగ్ చేసి రైస్ మిల్లులకు తరలించాలని ఆదేశించారు. కార్యక్రమంలో అదనపు కలెక్టర్ వేణుగోపాల్, డీఆర్డీవో విద్యాచందన, పౌర సరఫరాల కార్పొరేషన్ జిల్లా మేనేజర్ త్రినాథ్బాబు, జిల్లా పౌరసరఫరాల అధికారి రుక్మిణి, జిల్లా వ్యవసాయాధికారి బాబురావు, జిల్లా సహకార అధికారి సయ్యద్ ఖుర్షీద్ తదితరులు పాల్గొన్నారు.