మామిళ్లగూడెం, డిసెంబర్ 27 : రాష్ట్ర ప్రభుత్వం అభయహస్తం పేరుతో ఆరు గ్యారెంటీల అమలుకు చేపట్టిన ప్రజాపాలన కార్యక్రమం గురువారం ప్రారంభంకానున్నది. నేటి నుంచి వచ్చే జనవరి 6వ తేదీ వరకు ప్రజల నుంచి అధికారులు దరఖాస్తులను స్వీకరించనున్నారు. గ్రామ పంచాయతీ కార్యాలయాలు, పట్టణ వార్డుల్లో అధికారులు ఏర్పాట్లు పూర్తి చేశారు. గ్రామ, వార్డు, డివిజన్స్థాయిలో విజయవంతం చేసేందుకు రాష్ట్ర ప్రభుత్వం ఆదేశాల మేరకు కలెక్టర్ వీపీ గౌతమ్ నియోజకవర్గ, మండల స్థాయిలో ప్రత్యేక అధికారులను నియమించారు.
గ్రామ పంచాయతీ కార్యాలయాలు, మున్సిపాల్టీలు, నగరపాలక సంస్థల్లో డివిజన్లోని ప్రధానకేంద్రాల వద్ద దరఖాస్తులు స్వీకరించనున్నారు. అనంతరం వాటిని పరిశీలన చేసి ప్రభుత్వ మార్గదర్శకాల ప్రకారం లబ్ధిదారులను గుర్తిస్తారు. నియోజకవర్గ, మండల ప్రత్యేక అధికారులు నిరంతర పర్యవేక్షణలో కార్యక్రమాన్ని విజయవంతం చేయాలని కలెక్టర్ ఆదేశించారు.