బోనకల్లు, జూలై 18 : చట్టవ్యతిరేక కార్యకలాపాలపై ప్రత్యేక దృష్టి సారించాలని పోలీస్ కమిషనర్ సునీల్ దత్ పోలీస్ అధికారులను ఆదేశించారు. స్థానిక పోలీస్స్టేషన్ను గురువారం ఆకస్మికంగా సందర్శించిన ఆయన పలు రికార్డులు తనిఖీ చేశారు. స్టేషన్ నిర్వహణ, పోలీసుల పనితీరును పరిశీలించారు. నేరప్రవర్తన కలిగిన హిస్టరీ షీట్, రౌడీషీటర్ల రికార్డుల గురించి అడిగి తెలుసుకున్నారు. పోలీస్స్టేషన్కు వచ్చిన బాధిత ఫిర్యాదుదారులతో మాట్లాడారు.
అనంతరం సీపీ మాట్లాడుతూ ఖమ్మం కమిషనరేట్ పరిధిలో మాదక ద్రవ్యాల సరఫరా, వినియోగం, నియంత్రణపై నిఘా పెంచాలని, సరిహద్దు రాష్ర్టాల నుంచి అక్రమ రవాణాను నియంత్రించేందుకు రాత్రి గస్తీ, పోలీస్ పెట్రోలింగ్ ముమ్మరం చేయాలని సూచించారు. విద్యార్థులు మత్తు పదార్థాల జోలికి వెళ్లకుండా విద్యాసంస్థల్లో యాంటీ డ్రగ్స్ కమిటీల ద్వారా అవగాహన కార్యక్రమాలు చేపట్టాలని సూచించారు. కేసుల నమోదు విషయంలో తాత్సారం చేయొద్దన్నారు. సైబర్ నేరాలపై ప్రజలను చైతన్యపరచాలని, దీనిపై సదస్సులు నిర్వహించాలని పేర్కొన్నారు.