సత్తుపల్లి/వేంసూరు/పెనుబల్లి, జూలై 19 : సత్తుపల్లి, వేంసూరు, పెనుబల్లి మండలాల్లో శుక్రవారం ఎడతెరిపి లేకుండా వర్షం కురిసింది. సత్తుపల్లి మండలంలోని బేతుపల్లి చెరువు అలుగు పారుతోంది. చెరువు పూర్తిస్థాయి నీటిమట్టం 16 అడుగులు కాగా.. శుక్రవారం ఉదయం 17 అడుగులకు నీరు చేరింది. దీంతో ఐబీ అధికారులు 100 క్యూసెక్కుల నీటిని బేతుపల్లి ప్రత్యామ్నాయ కాలువకు, మరో 4,300 క్యూసెక్కుల నీటిని అలుగు ద్వారా బయటకు వదులుతున్నారు.
వరద ఉధృతిని ఐబీ ఈఈ శ్రీనివాసరెడ్డి, డీఈ వెంకటేశ్వరరావు పరిశీలించారు. అలాగే జీవీఆర్ ఓసీలో 77 మి.మీ వర్షపాతం నమోదుకాగా.. 10 వేల టన్నుల బొగ్గు ఉత్పత్తికి ఆటంకం కలిగింది. కాగా.. మరో 50 వేల క్యూబిక్ మీటర్ల మట్టి వెలికితీత నిలిచిపోయింది. కిష్టారం ఓసీలో 60 వేల క్యూబిక్ మీటర్ల మట్టి వెలికితీత, 8 వేల టన్నుల బొగ్గు ఉత్పత్తి నిలిచిపోయినట్లు పీవోలు చారి, నర్సింహారావు తెలిపారు. వేంసూరు మండలంలో వర్షాలతో చెరువులు నిండడంతోపాటు వాగులు, వంకలు పొంగి ప్రవహిస్తున్నాయి. కందుకూరు-దుద్దేపూడి గ్రామాల మధ్య ఉప్పవాగు పొంగి ప్రవహిస్తుండడం.. తుంగవారికాలనీ వద్ద వంతెనపై నుంచి వరద నీరు ప్రవహిస్తుండడంతో రాకపోకలకు అంతరాయం కలిగింది.
పెనుబల్లి మండలంలో రెండు రోజులుగా కురుస్తున్న వర్షాలతో లంకాసాగర్ మధ్యతరహా ప్రాజెక్టు పొంగి ప్రవహిస్తోంది. ప్రాజెక్టు నీటిమట్టం 16 అడుగులు కాగా.. అది నిండిపోయి రెండు అంగుళాలు పైకి రావడంతో అలుగు పొంగి ప్రవహిస్తోంది. లంకపల్లి, ఏరుగట్ల, శ్రీనివాసపురం, చౌడవరం, మండాలపాడు గ్రామాల నుంచి వరద నీరు ప్రాజెక్టులోకి చేరింది. వీఎం బంజర బస్టాండ్ ప్రాంగణానికి వెళ్లే మార్గమధ్యలో జలమయం కావడంతో ప్రయాణికులు ఇబ్బందిపడ్డారు. అలాగే పురవీధుల్లో వరద నీరు ప్రవహించింది.