ఖమ్మం/ మామిళ్లగూడెం/ సత్తుపల్లి టౌన్/ మధిర/ మధిర రూరల్, జూలై 19: భారీ వర్షాలు-వరదల నేపథ్యంలో ఖమ్మం మున్నేరు పరీవాహక ముంపు ప్రాంతాలను మున్సిపల్ కమిషనర్ అభిషేక అగస్త్య శుక్రవారం పరిశీలించారు. మున్నేటికి వరదలు వచ్చినప్పుడు ఏయే ప్రాంతాలు మునుగుతాయని అధికారుల నుంచి తెలుసుకున్నారు. మున్నేటి ప్రవాహ తీవ్రతను ఎప్పటికప్పుడు తన దృష్టికి తేవాలని అధికారులను ఆదేశించారు. మున్నేరు పరీవాహక ప్రాంతాల్లోని ఇళ్లలోకి నీరు వస్తున్నట్లయితే పునరావాస కేంద్రాలుగా ఉపయోగించేందుకు వసతి గృహాలను పరిశీలించారు.
నగరంలోని వివిధ ప్రాంతాల్లో పారిశుధ్య పనులు ముమ్మరంగా సాగుతున్నాయి. వీటిని శుక్రవారం మున్సిపల్ కార్పొరేషన్ అసిస్టెంట్ కమిషనర్ సంపత్కుమార్ పరిశీలించారు. నీరు నిల్వ ఉండకుండా, దోమలు వ్యాపించకుండా ప్రజలు జాగ్రత్తలు తీసుకోవాలని కోరారు. మెప్మా టీఎంసీ సుజాత తదితరులు పాల్గొన్నారు.
భారీ వర్షాలు-వరదల నేపథ్యంలో నగర ప్రజలు అప్రమత్తంగా ఉండాలని పోలీస్ కమిషనర్ సునీల్దత్ కోరారు. అత్యవసరమైతే తప్ప ఇంట్లో నుంచి బయటకు రావద్దని, పిల్లల విషయంలో తల్లిదండ్రులు జాగ్రత్తగా ఉండాలని సూచించారు. అత్యవసర సమయాల్లో సహాయానికి పోలీస్ కంట్రోల్ రూమ్ అందుబాటులో ఉందని, 87126 59111 సెల్ నంబర్లో సంప్రదించవచ్చని తెలిపారు. ప్రమాదకరమైన చెరువులు, కుంటలు, వంతెనలు, చప్టాల వద్ద బారికేడ్లు, సూచిక బోర్డులు ఏర్పాటు చేయాలని పోలీస్ అధికారులను ఆదేశించినట్లు తెలిపారు.
బంగాళాఖాతంలో ఏర్పడిన అల్పపీడనం కారణంగా కల్లూరు డివిజన్లో కురుస్తున్న వర్షాల పట్ల ప్రజలు అప్రమత్తంగా ఉండాలని ఏసీపీ రఘు సూచించారు. స్థానికంగా శుక్రవారం ఏర్పాటు చేసిన విలేకరుల సమావేశంలో ఆయన మాట్లాడారు. వర్షానికి తడిసిన విద్యుత్ స్తంభాలను, గోడలను తాక వద్దని సూచించారు. జీఏ వైర్లపై బట్టలు ఆరవేయవద్దని, శిథిలావస్థలో ఉన్న మట్టిగోడల వద్ద ఉండవద్దని సూచించారు. అలాగే పరిసరాలను పరిశుభ్రంగా ఉంచుకోవాలన్నారు. వాహనదారులు జాగ్రత్తలు పాటించాలన్నారు. అత్యవసర పరిస్థితుల్లో 100కుగానీ, స్థానిక పోలీస్స్టేషన్కుగానీ ఫోన్ చేయాలని సూచించారు.
ఎడతెరిపి లేకుండా వర్షాలు కురుస్తున్నందున ప్రజలు అప్రమత్తంగా ఉండాలని మధిర సీఐ మధు సూచించారు. మధిర శివాలయం వద్ద పొంగి ప్రవహిస్తున్న వైరానదిని మున్సిపల్ కమిషనర్ షఫీఉల్లాతో కలిసి శుక్రవారం ఆయన పరిశీలించారు. ఈ సందర్భంగా సీఐ మాట్లాడుతూ.. వర్షాలకు వాగులు, నదులు పొంగి ప్రవహిస్తున్నందున ప్రజలు చేపల వేటకు వెళ్లవద్దని సూచించారు. వాగులు, నదులు పొంగితే వెంటనే స్థానిక పోలీసులు గానీ, 100 గానీ సమాచారం అందించాలని సూచించారు. మున్సిపల్ కమిషనర్ షఫిఉల్లా మాట్లాడుతూ.. శిథిలావస్థకు చేరిన గృహాల్లో ప్రజలెవరూ ఉండవద్దని సూచించారు. పారిశుధ్యాన్ని మెరుగుపరిచేందుకు ప్రత్యేక చర్యలు తీసుకుంటున్నట్లు తెలిపారు. కౌన్సిలర్ కోన ధనికుమార్ తదితరులు పాల్గొన్నారు.
భారీ వర్షాల నేపథ్యంలో మధిర మండలంలోని చిలుకూరు గ్రామం వద్ద కట్టలేరు నది ప్రవాహ పరిస్థితిని మధిర రూరల్ ఎస్సై లక్ష్మీభార్గవి శుక్రవారం సిబ్బందితో కలిసి పరిశీలించారు. గ్రామంలోని రైతులు, పశువుల కాపరులు అప్రమత్తంగా ఉండాలని సూచించారు.